ਸਪੋਰਟਸ, 20 ਮਈ 2026: ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ 2026-27 ਦੇ ਘਰੇਲੂ ਕ੍ਰਿਕਟ ਸੀਜ਼ਨ ਲਈ ਸ਼ਡਿਊਲ ਦਾ ਐਲਾਨ ਕੀਤਾ ਹੈ। ਆਉਣ ਵਾਲੇ ਘਰੇਲੂ ਸੀਜ਼ਨ ‘ਚ ਪੁਰਸ਼ਾਂ ਅਤੇ ਔਰਤਾਂ ਦੋਵਾਂ ਲਈ ਵੱਖ-ਵੱਖ ਉਮਰ ਸਮੂਹਾਂ ਅਤੇ ਫਾਰਮੈਟਾਂ ‘ਚ ਕੁੱਲ 1,788 ਮੈਚ ਹੋਣਗੇ। ਇਹ ਸੀਜ਼ਨ 23 ਅਗਸਤ, 2026 ਨੂੰ ਵੱਕਾਰੀ ਦਲੀਪ ਟਰਾਫੀ ਨਾਲ ਸ਼ੁਰੂ ਹੋਵੇਗਾ। ਬੀਸੀਸੀਏ ਦੇ ਅਨੁਸਾਰ, ਇਸ ਸੀਜ਼ਨ ਲਈ ਕੈਲੰਡਰ ਘਰੇਲੂ ਢਾਂਚੇ ਨੂੰ ਹੋਰ ਮਜ਼ਬੂਤ ਕਰਨ, ਖਿਡਾਰੀਆਂ ਲਈ ਬਿਹਤਰ ਪ੍ਰਤੀਯੋਗੀ ਮਾਹੌਲ ਪ੍ਰਦਾਨ ਕਰਨ ਅਤੇ ਸਾਰੇ ਫਾਰਮੈਟਾਂ ‘ਚ ਸੰਤੁਲਿਤ ਤਰੱਕੀ ਨੂੰ ਯਕੀਨੀ ਬਣਾਉਣ ਲਈ ਤਿਆਰ ਕੀਤਾ ਗਿਆ ਹੈ।
ਘਰੇਲੂ ਕ੍ਰਿਕਟ ਦਾ ਲਾਲ-ਬਾਲ ਸੀਜ਼ਨ ਦਲੀਪ ਟਰਾਫੀ ਨਾਲ ਸ਼ੁਰੂ ਹੋਵੇਗਾ, ਜਿਸ ‘ਚ ਛੇ ਜ਼ੋਨਲ ਟੀਮਾਂ ਸ਼ਾਮਲ ਹਨ। ਫਿਰ ਈਰਾਨੀ ਕੱਪ 1 ਅਕਤੂਬਰ ਤੋਂ ਸ਼ੁਰੂ ਹੋਵੇਗਾ।
ਦੋ ਪੜਾਵਾਂ ‘ਚ ਖੇਡੀ ਜਾਵੇਗੀ ਰਣਜੀ ਟਰਾਫੀ
ਇਸ ਵਾਰ ਵੀ, ਖਿਡਾਰੀਆਂ ਲਈ ਢੁਕਵਾਂ ਆਰਾਮ ਯਕੀਨੀ ਬਣਾਉਣ ਅਤੇ ਘਰੇਲੂ ਕ੍ਰਿਕਟ ‘ਚ ਮਲਟੀ-ਡੇਅ ਕ੍ਰਿਕਟ ਨੂੰ ਤਰਜੀਹ ਦੇਣ ਲਈ ਰਣਜੀ ਟਰਾਫੀ ਅਤੇ ਕਰਨਲ ਸੀ.ਕੇ. ਨਾਇਡੂ ਟਰਾਫੀ ਦੋ ਪੜਾਵਾਂ ‘ਚ ਖੇਡੀ ਜਾਵੇਗੀ। ਰਣਜੀ ਟਰਾਫੀ ਏਲੀਟ ਗਰੁੱਪ ‘ਚ 32 ਟੀਮਾਂ ਹੋਣਗੀਆਂ। ਚਾਰ ਗਰੁੱਪ ਬਣਾਏ ਜਾਣਗੇ। ਪਲੇਟ ਗਰੁੱਪ ‘ਚ ਛੇ ਟੀਮਾਂ ਹਿੱਸਾ ਲੈਣਗੀਆਂ।
ਸੀ.ਕੇ. ਨਾਇਡੂ ਟਰਾਫੀ ਜੇਤੂ ਬਨਾਮ ਰੈਸਟ ਆਫ ਇੰਡੀਆ ਮੈਚ ਦੀ ਵਾਪਸੀ
ਬੀ.ਸੀ.ਸੀ.ਆਈ. ਨੇ ਅੰਡਰ-23 ਕ੍ਰਿਕਟਰਾਂ ਲਈ ਇੱਕ ਬਿਹਤਰ ਪਲੇਟਫਾਰਮ ਪ੍ਰਦਾਨ ਕਰਨ ਲਈ ਘਰੇਲੂ ਕੈਲੰਡਰ ‘ਚ ਕਰਨਲ ਸੀ.ਕੇ. ਨਾਇਡੂ ਟਰਾਫੀ ਜੇਤੂ ਬਨਾਮ ਰੈਸਟ ਆਫ ਇੰਡੀਆ ਮੈਚ ਨੂੰ ਬਹਾਲ ਕਰ ਦਿੱਤਾ ਹੈ। ਇਹ ਮੈਚ 1 ਤੋਂ 4 ਅਕਤੂਬਰ, 2026 ਤੱਕ ਖੇਡਿਆ ਜਾਵੇਗਾ।
ਅੰਡਰ-23 ਟੂਰਨਾਮੈਂਟ ਹੁਣ ਟੀ-20 ਫਾਰਮੈਟ ‘ਚ ਹੋਵੇਗਾ
ਬੀ.ਸੀ.ਸੀ.ਆਈ. ਨੇ ਆਧੁਨਿਕ ਕ੍ਰਿਕਟ ਦੀਆਂ ਮੰਗਾਂ ਨੂੰ ਪੂਰਾ ਕਰਨ ਲਈ ਮਹੱਤਵਪੂਰਨ ਬਦਲਾਅ ਕੀਤੇ ਹਨ। ਵਿਜ਼ੀ ਟਰਾਫੀ ਹੁਣ ਵਨਡੇ ਦੀ ਬਜਾਏ ਟੀ-20 ਫਾਰਮੈਟ ‘ਚ ਖੇਡੀ ਜਾਵੇਗੀ। ਇਸਦੇ ਨਾਲ ਹੀ ਕੂਚ ਬਿਹਾਰ ਟਰਾਫੀ ਦੇ ਨਾਕਆਊਟ ਮੈਚ ਬੰਗਲੁਰੂ ਅਤੇ ਮੈਸੂਰ ‘ਚ ਖੇਡੇ ਜਾਣਗੇ।
ਅੰਡਰ-19 ਕੂਚ ਬਿਹਾਰ ਟਰਾਫੀ (ਏਲੀਟ ਗਰੁੱਪ) ਦੇ ਨਾਕਆਊਟ ਮੈਚ ਇਸ ਵਾਰ ਬੰਗਲੁਰੂ ਅਤੇ ਮੈਸੂਰ ‘ਚ ਖੇਡੇ ਜਾਣਗੇ। ਬੀਸੀਸੀਆਈ ਦਾ ਮੰਨਣਾ ਹੈ ਕਿ ਇਹ ਫੈਸਲਾ ਜਨਵਰੀ ਦੌਰਾਨ ਵੱਖ-ਵੱਖ ਖੇਤਰਾਂ ਵਿੱਚ ਵੱਖ-ਵੱਖ ਮੌਸਮੀ ਹਲਾਤਾਂ ਨੂੰ ਦੇਖਦੇ ਹੋਏ ਸਾਰੀਆਂ ਟੀਮਾਂ ਲਈ ਬਿਹਤਰ ਪ੍ਰਤੀਯੋਗੀ ਸੰਤੁਲਨ ਯਕੀਨੀ ਬਣਾਏਗਾ।
ਵਿਜੇ ਮਰਚੈਂਟ ਟਰਾਫੀ ਸ਼ਡਿਊਲ ਚ ਬਦਲਾਅ
ਅੰਡਰ-16 ਵਿਜੇ ਮਰਚੈਂਟ ਟਰਾਫੀ ਨੂੰ ਘਰੇਲੂ ਕੈਲੰਡਰ ‘ਚ ਪਹਿਲਾਂ ਵਾਲੀ ਸਥਿਤੀ ‘ਚ ਤਬਦੀਲ ਕਰ ਦਿੱਤਾ ਗਿਆ ਹੈ। ਇਹ ਟੂਰਨਾਮੈਂਟ ਹੁਣ ਨਵੰਬਰ ਅਤੇ ਜਨਵਰੀ ਦੇ ਵਿਚਕਾਰ ਖੇਡਿਆ ਜਾਵੇਗਾ, ਜਿਸ ਨਾਲ ਖਿਡਾਰੀਆਂ ਨੂੰ ਬਿਹਤਰ ਤਿਆਰੀ ਅਤੇ ਸੰਤੁਲਿਤ ਸ਼ਡਿਊਲ ਮਿਲੇਗਾ।
ਮਹਿਲਾ ਕ੍ਰਿਕਟ ਨੂੰ ਇੱਕ ਵੱਡਾ ਪਲੇਟਫਾਰਮ ਵੀ ਮਿਲੇਗਾ
2026-27 ਦੇ ਘਰੇਲੂ ਸੀਜ਼ਨ ‘ਚ ਮਹਿਲਾ ਕ੍ਰਿਕਟ ਲਈ ਇੱਕ ਵਿਸਤ੍ਰਿਤ ਸ਼ਡਿਊਲ ਵੀ ਤਿਆਰ ਕੀਤਾ ਗਿਆ ਹੈ। ਇਸ ‘ਚ ਸੀਨੀਅਰ, ਅੰਡਰ-23, ਅੰਡਰ-19 ਅਤੇ ਅੰਡਰ-15 ਸ਼੍ਰੇਣੀਆਂ ‘ਚ ਮੁਕਾਬਲੇ ਸ਼ਾਮਲ ਹੋਣਗੇ।
ਬੀਸੀਸੀਆਈ ਨੇ ਕਿਹਾ ਕਿ ਘਰੇਲੂ ਕ੍ਰਿਕਟ ਭਾਰਤੀ ਕ੍ਰਿਕਟ ਦੀ ਰੀੜ੍ਹ ਦੀ ਹੱਡੀ ਹੈ ਅਤੇ ਬੋਰਡ ਇੱਕ ਅਜਿਹਾ ਢਾਂਚਾ ਵਿਕਸਤ ਕਰਨ ਲਈ ਲਗਾਤਾਰ ਕੰਮ ਕਰ ਰਿਹਾ ਹੈ ਜੋ ਨੌਜਵਾਨ ਖਿਡਾਰੀਆਂ ਨੂੰ ਉੱਚ-ਪੱਧਰੀ ਮੁਕਾਬਲੇ ਅਤੇ ਤਰੱਕੀ ਲਈ ਵਧੇਰੇ ਮੌਕੇ ਪ੍ਰਦਾਨ ਕਰਦਾ ਹੈ।
Read More: BAN ਬਨਾਮ PAK: ਬੰਗਲਾਦੇਸ਼ ਵੱਲੋਂ ਪਾਕਿਸਤਾਨ ਦਾ ਟੈਸਟ ਸੀਰੀਜ਼ ‘ਚ ਕਲੀਨ ਸਵੀਪ, ਭਾਰਤ ਨੂੰ ਅੰਕ ਸੂਚੀ ‘ਚ ਨੁਕਸਾਨ
