ਸਪੋਰਟਸ, 14 ਸਤੰਬਰ 2026: IND W ਬਨਾਮ SL W Result: ਭਾਰਤ ਅੱਠਵੀਂ ਵਾਰ ਮਹਿਲਾ ਏਸ਼ੀਆ ਕੱਪ ਚੈਂਪੀਅਨ ਬਣਿਆ ਹੈ। ਟੀਮ ਨੇ ਦੁਬਈ ‘ਚ ਖੇਡੇ ਗਏ ਫਾਈਨਲ ‘ਚ ਸ਼੍ਰੀਲੰਕਾ ਨੂੰ 72 ਦੌੜਾਂ ਨਾਲ ਹਰਾ ਕੇ ਖਿਤਾਬ ਜਿੱਤਿਆ। ਭਾਰਤੀ ਟੀਮ ਨੇ ਟੂਰਨਾਮੈਂਟ ‘ਚ ਸਭ ਤੋਂ ਵੱਧ 32 ਛੱਕੇ ਮਾਰੇ। ਸਮ੍ਰਿਤੀ ਅਤੇ ਸ਼ੇਫਾਲੀ ਨੇ ਪਹਿਲੀ ਵਿਕਟ ਲਈ 129 ਦੌੜਾਂ ਜੋੜੀਆਂ। ਇਹ ਮਹਿਲਾ ਟੀ-20 ਏਸ਼ੀਆ ਕੱਪ ‘ਚ ਕਿਸੇ ਵੀ ਵਿਕਟ ਲਈ ਸਭ ਤੋਂ ਵੱਧ ਸਾਂਝੇਦਾਰੀ ਹੈ।
ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ 20 ਓਵਰਾਂ ‘ਚ 5 ਵਿਕਟਾਂ ‘ਤੇ 183 ਦੌੜਾਂ ਬਣਾਈਆਂ। ਓਪਨਰ ਸ਼ੇਫਾਲੀ ਵਰਮਾ ਅਤੇ ਸਮ੍ਰਿਤੀ ਮੰਧਾਨਾ ਨੇ ਪਹਿਲੀ ਵਿਕਟ ਲਈ 129 ਦੌੜਾਂ ਜੋੜੀਆਂ। ਸ਼ੇਫਾਲੀ ਨੇ 68 ਅਤੇ ਸਮ੍ਰਿਤੀ ਨੇ 59 ਦੌੜਾਂ ਬਣਾਈਆਂ।
184 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ, ਸ਼੍ਰੀਲੰਕਾ 19.6 ਓਵਰਾਂ ‘ਚ 111 ਦੌੜਾਂ ‘ਤੇ ਆਲ ਆਊਟ ਹੋ ਗਿਆ। ਭਾਰਤ ਲਈ ਸ਼੍ਰੀ ਚਰਨੀ ਨੇ 4 ਵਿਕਟਾਂ ਲਈਆਂ, ਜਦੋਂ ਕਿ ਦੀਪਤੀ ਸ਼ਰਮਾ ਨੇ 3 ਵਿਕਟਾਂ ਲਈਆਂ।
ਇਸ ਮੈਚ ‘ਚ, ਸਮ੍ਰਿਤੀ ਮੰਧਾਨਾ ਅਤੇ ਸ਼ੇਫਾਲੀ ਵਰਮਾ ਨੇ ਟੂਰਨਾਮੈਂਟ ਦੇ ਇਤਿਹਾਸ ‘ਚ ਸਭ ਤੋਂ ਵੱਧ ਸਾਂਝੇਦਾਰੀ ਕੀਤੀ। ਹਾਲਾਂਕਿ, ਜਿੱਤ ਤੋਂ ਬਾਅਦ ਭਾਰਤੀ ਟੀਮ ਨੇ ਏਸ਼ੀਅਨ ਕ੍ਰਿਕਟ ਕੌਂਸਲ ਦੇ ਪ੍ਰਧਾਨ ਅਤੇ ਪਾਕਿਸਤਾਨ ਕ੍ਰਿਕਟ ਬੋਰਡ ਦੇ ਚੇਅਰਮੈਨ ਮੋਹਸਿਨ ਨਕਵੀ ਤੋਂ ਟਰਾਫੀ ਲੈਣ ਤੋਂ ਇਨਕਾਰ ਕਰ ਦਿੱਤਾ।
ਭਾਰਤੀ ਮਹਿਲਾ ਟੀਮ ਦੇ ਮੁੱਖ ਕੋਚ ਅਮੋਲ ਮਜ਼ੂਮਦਾਰ ਨੇ ਮੈਚ ਤੋਂ ਬਾਅਦ ਪ੍ਰੈਸ ਕਾਨਫਰੰਸ ‘ਚ ਕਿਹਾ, “ਟਰਾਫੀ ਨੂੰ ਸਵੀਕਾਰ ਨਾ ਕਰਨ ਦਾ ਫੈਸਲਾ ਬੀਸੀਸੀਆਈ ਨੇ ਲਿਆ ਸੀ ਅਤੇ ਅਸੀਂ ਇਸ ‘ਤੇ ਕਾਇਮ ਹਾਂ। ਇਹ ਟੂਰਨਾਮੈਂਟ ਸਾਡੇ ਲਈ ਖਤਮ ਹੋ ਗਿਆ ਹੈ। ਅਸੀਂ ਚੈਂਪੀਅਨ ਹਾਂ, ਸਾਡੇ ਲਈ ਇਹ ਕਾਫ਼ੀ ਹੈ। ਹੁਣ ਸਾਡਾ ਧਿਆਨ ਏਸ਼ੀਅਨ ਖੇਡਾਂ ‘ਤੇ ਹੈ। ਮੈਨੂੰ ਟੀਮ ਦੇ ਹਰ ਖਿਡਾਰੀ ਅਤੇ ਸਹਾਇਕ ਸਟਾਫ ‘ਤੇ ਮਾਣ ਹੈ।”
ਬੀਸੀਸੀਆਈ ਨੇ ਦਿੱਤੇ ਸੀ ਦੋ ਵਿਕਲਪ
ਬੀਸੀਸੀਆਈ ਦੇ ਸਕੱਤਰ ਦੇਵਜੀਤ ਸੈਕੀਆ ਨੇ ਕਿਹਾ ਕਿ ਭਾਰਤੀ ਟੀਮ ਨਕਵੀ ਤੋਂ ਟਰਾਫੀ ਸਵੀਕਾਰ ਕਰਨ ਦੇ ਹੱਕ ‘ਚ ਨਹੀਂ ਸੀ। ਬੋਰਡ ਨੇ ਸਮਾਗਮ ਲਈ ਦੋ ਵਿਕਲਪ ਸੁਝਾਏ ਸਨ। ਪਹਿਲਾ ਵਿਕਲਪ ਏਸੀਸੀ ਦੇ ਡਿਪਟੀ ਚੇਅਰਮੈਨ ਖਾਲਿਦ ਅਲ ਜ਼ਾਰੂਨੀ ਨੂੰ ਟਰਾਫੀ ਪੇਸ਼ ਕਰਨਾ ਸੀ। ਦੂਜਾ ਵਿਕਲਪ ਜੇਤੂ ਬੋਰਡ ਦੇ ਪ੍ਰਤੀਨਿਧੀ ਦੁਆਰਾ ਟਰਾਫੀ ਪੇਸ਼ ਕਰਨਾ ਸੀ, ਜਿਵੇਂ ਕਿ ਹਾਲ ਹੀ ਦੀ ਪਰੰਪਰਾ ਹੈ। ਸੈਕੀਆ ਨੇ ਕਿਹਾ ਕਿ ਨਕਵੀ ਨੇ ਦੋਵਾਂ ਵਿਕਲਪਾਂ ਤੋਂ ਇਨਕਾਰ ਕਰ ਦਿੱਤਾ, ਅਤੇ ਦੋਵੇਂ ਧਿਰਾਂ ਆਪਣੇ ਸਟੈਂਡ ‘ਤੇ ਅੜੀਆਂ ਰਹੀਆਂ।
ਭਾਰਤ ਨੇ ਮੋਹਸਿਨ ਨਕਵੀ ਤੋਂ ਟਰਾਫੀ ਅਤੇ ਤਗਮੇ ਸਵੀਕਾਰ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਨਕਵੀ ਪੇਸ਼ਕਾਰੀ ਸਮਾਗਮ ਦੌਰਾਨ ਸਟੇਜ ‘ਤੇ ਪਹੁੰਚੇ ਸਨ। ਉਨ੍ਹਾਂ ਨੇ ਸ਼੍ਰੀਲੰਕਾ ਦੀ ਟੀਮ ਨੂੰ ਮੈਡਲ ਅਤੇ ਉਪ ਜੇਤੂ ਦਾ ਚੈੱਕ ਕਪਤਾਨ ਚਮਾਰੀ ਅਟਾਪੱਟੂ ਨੂੰ ਭੇਟ ਕੀਤਾ। ਬਾਅਦ ‘ਚ ਪੇਸ਼ਕਾਰੀ ਰੱਦ ਕਰ ਦਿੱਤੀ ਗਈ।
Read More: ENG ਬਨਾਮ PAK Result: ਇੰਗਲੈਂਡ ਦੇ ਕਪਤਾਨ ਜੋ ਰੂਟ ਨੇ ਟੈਸਟ ਕ੍ਰਿਕਟ ‘ਚ ਸਚਿਨ ਤੇਂਦੁਲਕਰ ਦਾ ਰਿਕਾਰਡ ਤੋੜਿਆ
