ਫਤਿਹਗੜ੍ਹ ਸਾਹਿਬ 30 ਅਕਤੂਬਰ 2023: ਖਮਾਣੋਂ ‘ਚ ਪੁੱਤਰ ਵਲੋਂ ਆਪਣੀ ਮਾਂ ਦਾ ਕਥਿਤ ਤੌਰ ਗਲਾ ਘੁੱਟ ਕੇ ਕਤਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਦੱਸਿਆ ਜਾ ਰਿਹਾ ਹੈ ਕਿ ਇਸ ਉਪਰੰਤ ਉਕਤ ਬੰਦੇ ਨੇ ਆਪਣੇ ਆਪ ਨੂੰ ਕੱਚ ਦੇ ਟੁਕੜੇ ਨਾਲ ਗੰਭੀਰ ਜ਼ਖ਼ਮੀ ਕਰ ਲਿਆ, ਜਿਹੜਾ ਕਿ ਚੰਡੀਗੜ੍ਹ ਦੇ ਇਕ ਹਸਪਤਾਲ ‘ਚ ਗੰਭੀਰ ਰੂਪ ‘ਚ ਜ਼ੇਰੇ ਇਲਾਜ ਹੈ।
ਜਾਣਕਾਰੀ ਮੁਤਾਬਕ ਮਰਨ ਵਾਲੀ ਮਹਿਲਾ ਦਾ ਨਾਂਅ ਪਰਮਜੀਤ ਕੌਰ (60 ਸਾਲ) ਪਤਨੀ ਦਿਲਬਾਰਾ ਸਿੰਘ ਹੈ ਜੋ ਕਿ ਵਾਸੀ ਵਾਰਡ ਨੰ 1 ਮਨਸੂਰਪੁਰ ਰੋਡ ਖਮਾਣੋਂ ਹੈ, ਜਿਸ ਨੂੰ ਕਿ ਉਸ ਦੇ ਪੁੱਤਰ ਨਰਿੰਦਰ ਸਿੰਘ ਉਰਫ਼ ਗੋਰਖਾ 22 ਸਾਲ ਵੱਲੋਂ ਕਥਿਤ ਤੌਰ ‘ਤੇ ਘਰ ਦੇ ਅੰਦਰ ਹੀ ਸਵੇਰੇ ਕਰੀਬ ਸਾਢੇ ਛੇ ਵਜੇ ਤੋਂ ਸਾਢੇ ਅੱਠ ਵਜੇ ਦੇ ਦਰਮਿਆਨ ਗਲਾ ਘੁੱਟ ਕਿ ਮਾਰ ਦਿੱਤਾ ਅਤੇ ਆਪਣੇ ਆਪ ਨੂੰ ਕੱਚ ਦੇ ਟੁਕੜੇ ਨਾਲ ਬਾਹਾਂ ਅਤੇ ਗਰਦਨ ‘ਤੇ ਗੰਭੀਰ ਰੂਪ ‘ਚ ਜ਼ਖਮੀ ਕਰ ਲਿਆ |
ਉਸ ਦੇ ਪਿਤਾ ਦਿਲਬਾਰਾ ਸਿੰਘ ਨੇ ਉਦੋਂ ਦੇਖਿਆ ਜਦੋਂ ਉਹ ਖੇਤਾਂ ‘ਚੋਂ ਘਰ ਵਾਪਸ ਆਇਆ | ਘਰ ਦੇ ਮੁੱਖ ਦਰਵਾਜ਼ੇ ਦੀ ਜਾਅਲੀ ਵਾਲੇ ਗੇਟ ਦੀ ਕੁੰਡੀ ਅੰਦਰੋਂ ਲੱਗੀ ਹੋਈ ਹੈ ਅਤੇ ਅੰਦਰ ਨਰਿੰਦਰ ਸਿੰਘ ਉਰਫ਼ ਗੋਰਖਾ ਖੂਨ ਨਾਲ ਲੱਥਪੱਥ ਬੇਹੋਸ਼ ਪਿਆ ਹੈ ਤਾਂ ਉਸ ਦੇ ਪਿਤਾ ਨੇ ਆਂਢ-ਗੁਆਂਢ ਇਕੱਠਾ ਕਰਕੇ ਜਾਅਲੀ ਤੋੜ ਕੇ ਜਦੋਂ ਅੰਦਰ ਜਾ ਕਿ ਦੇਖਿਆ ਤਾਂ ਇਕ ਕਮਰੇ ‘ਚ ਉਸ ਦੀ ਪਤਨੀ ਮੰਜੇ ‘ਤੇ ਮ੍ਰਿਤਕ ਪਈ ਸੀ।
