ਪੱਛਮੀ ਬੰਗਾਲ, 8 ਜੂਨ 2026: ਵਿਧਾਇਕਾਂ ਤੋਂ ਬਾਅਦ ਤ੍ਰਿਣਮੂਲ ਕਾਂਗਰਸ ਦੇ ਸੰਸਦ ਮੈਂਬਰ ਹੁਣ ਮਮਤਾ ਬੈਨਰਜੀ ਨੂੰ ਛੱਡਣ ਦੀ ਤਿਆਰੀ ਕਰ ਰਹੇ ਹਨ। ਸੋਮਵਾਰ ਦੁਪਹਿਰ ਨੂੰ 21 ਸੰਸਦ ਮੈਂਬਰਾਂ ਨੇ ਕੇਂਦਰੀ ਮੰਤਰੀ ਅਤੇ ਭਾਜਪਾ ਦੇ ਬੰਗਾਲ ਇੰਚਾਰਜ, ਭੂਪੇਂਦਰ ਯਾਦਵ ਦੇ ਘਰ ਇੱਕ ਬੈਠਕ ਕੀਤੀ।
ਸੁਖੇਂਦੂ ਸ਼ੇਖਰ ਰਾਏ, ਜਿਨ੍ਹਾਂ ਨੇ ਸਵੇਰੇ ਟੀਐਮਸੀ ਦੇ ਰਾਜ ਸਭਾ ਮੈਂਬਰ ਵਜੋਂ ਅਸਤੀਫਾ ਦੇ ਦਿੱਤਾ ਸੀ, ਵੀ ਮੌਜੂਦ ਸਨ। ਇਸ ਦੌਰਾਨ, ਬੰਗਾਲ ਦੇ ਮੁੱਖ ਮੰਤਰੀ ਸੁਵੇਂਦੂ ਅਧਿਕਾਰੀ ਨੇ ਵੀ ਉਨ੍ਹਾਂ ਨੂੰ ਮਿਲਣ ਦੀ ਪੇਸ਼ਕਸ਼ ਕੀਤੀ। ਇਹ ਸਪੱਸ਼ਟ ਨਹੀਂ ਹੈ ਕਿ 21 ਸੰਸਦ ਮੈਂਬਰਾਂ ‘ਚੋਂ ਕਿੰਨੇ ਲੋਕ ਸਭਾ ਅਤੇ ਰਾਜ ਸਭਾ ਦੇ ਸਨ।
ਕਾਕੋਲੀ ਘੋਸ਼, ਸ਼ਤਾਬਦੀ ਰਾਏ, ਅਬੂ ਤਾਹਿਰ, ਅਰੂਪ ਚੱਕਰਵਰਤੀ, ਖਲੀਲੁਰ ਰਹਿਮਾਨ, ਸ਼ਰਮੀਲਾ ਸਰਕਾਰ, ਅਸਿਤ ਮਲ, ਕਾਲੀਪਦਾ ਸੋਰੇਨ, ਜਗਦੀਸ਼ ਬਾਸੁਨੀਆ ਅਤੇ ਪ੍ਰਸੂਨ ਬੈਨਰਜੀ ਮੀਟਿੰਗ ‘ਚ ਮੌਜੂਦ ਸਨ। ਬਾਕੀ ਸੰਸਦ ਮੈਂਬਰਾਂ ਦੇ ਨਾਮ ਜਾਰੀ ਨਹੀਂ ਕੀਤੇ ਗਏ ਹਨ। ਟੀਐਮਸੀ ਦੇ ਇਸ ਸਮੇਂ ਲੋਕ ਸਭਾ ‘ਚ 28 ਅਤੇ ਰਾਜ ਸਭਾ ‘ਚ 13 ਸੰਸਦ ਮੈਂਬਰ ਹਨ। ਇਸ ਤੋਂ ਪਹਿਲਾਂ 3 ਜੂਨ ਨੂੰ ਬੰਗਾਲ ਦੇ 80 ਵਿਧਾਇਕਾਂ ‘ਚੋਂ 58 ਨੇ ਇੱਕ ਵੱਖਰਾ ਧੜਾ ਬਣਾਇਆ, ਜਿਸਨੇ ਰਿਤਾਬ੍ਰਤ ਨੂੰ ਆਪਣਾ ਆਗੂ ਨਿਯੁਕਤ ਕੀਤਾ।
ਸੀਨੀਅਰ ਟੀਐਮਸੀ ਨੇਤਾ ਸੁਖੇਂਦੂ ਸ਼ੇਖਰ ਨੇ ਆਪਣੇ ਰਾਜ ਸਭਾ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਅਤੇ ਪਾਰਟੀ ਛੱਡ ਦਿੱਤੀ। ਆਪਣੇ ਅਸਤੀਫ਼ੇ ਪੱਤਰ ‘ਚ, ਉਨ੍ਹਾਂ ਨੇ ਪਾਰਟੀ ਦੀ ਹਾਰ ਲਈ ਮਮਤਾ ਬੈਨਰਜੀ ਦੇ 15 ਸਾਲਾਂ ਦੇ ਸ਼ਾਸਨ ਨੂੰ ਜ਼ਿੰਮੇਵਾਰ ਠਹਿਰਾਇਆ ਅਤੇ ਭਾਜਪਾ ਦੀ ਪ੍ਰਸ਼ੰਸਾ ਕੀਤੀ। ਰਾਜ ਸਭਾ ਚੇਅਰਮੈਨ ਸੀਪੀ ਰਾਧਾਕ੍ਰਿਸ਼ਨਨ ਨੇ ਸ਼ੇਖਰ ਦਾ ਅਸਤੀਫ਼ਾ ਸਵੀਕਾਰ ਕਰ ਲਿਆ ਹੈ।
ਅਸਤੀਫ਼ਾ ਦੇਣ ਤੋਂ ਬਾਅਦ, ਸੁਖੇਂਦੂ ਨੇ ਮੀਡੀਆ ਨੂੰ ਦੱਸਿਆ ਕਿ ਪਾਰਟੀ ‘ਚ ਬਹੁਤ ਸਾਰੇ ਲੋਕ ਮਮਤਾ ਬੈਨਰਜੀ ਦੀ ਅਗਵਾਈ ‘ਚ ਮਨਮਾਨੇ ਢੰਗ ਨਾਲ ਪਾਰਟੀ ਚਲਾ ਰਹੇ ਸਨ, ਜਿਸ ਕਾਰਨ ਉਨ੍ਹਾਂ ਨੇ ਅਸਤੀਫਾ ਦੇ ਦਿੱਤਾ। ਸੁਖੇਂਦੂ ਸ਼ੇਖਰ ਦੀ ਰਾਜ ਸਭਾ ਸੀਟ ਪੱਛਮੀ ਬੰਗਾਲ ਤੋਂ ਹੈ, ਅਤੇ ਉਨ੍ਹਾਂ ਦਾ ਕਾਰਜਕਾਲ 2029 ਤੱਕ ਸੀ। ਸੀਟ ਖਾਲੀ ਹੋ ਗਈ ਹੈ ਅਤੇ ਹੁਣ ਉਪ-ਚੋਣ ਹੋ ਸਕਦੀ ਹੈ।
ਸੁਖੇਂਦੂ ਸ਼ੇਖਰ ਦੇ ਅਸਤੀਫ਼ੇ ‘ਤੇ ਪ੍ਰਤੀਕਿਰਿਆ ਦਿੰਦੇ ਹੋਏ, ਬੰਗਾਲ ਦੇ ਬਾਗ਼ੀ ਟੀਐਮਸੀ ਆਗੂ ਰਿਤਬ੍ਰਤ ਬੈਨਰਜੀ ਨੇ ਕਿਹਾ, “ਇਹ ਸਿਰਫ਼ ਸੁਖੇਂਦੂ ਦਾ ਨਿੱਜੀ ਮਾਮਲਾ ਨਹੀਂ ਹੈ। ਮੈਂ ਸੁਖੇਂਦੂ ਨਾਲ ਸਿੱਧੇ ਤੌਰ ‘ਤੇ ਗੱਲ ਨਹੀਂ ਕੀਤੀ, ਪਰ ਮੈਂ ਟੀਵੀ ‘ਤੇ ਉਨ੍ਹਾਂ ਦੇ ਬਿਆਨ ਦੇਖੇ ਅਤੇ ਸੁਣੇ ਹਨ। ਮੈਂ ਉਨ੍ਹਾਂ ਨਾਲ ਸਹਿਮਤ ਹਾਂ। ਰਾਜ ਸਭਾ ਦੇ ਕੰਮਕਾਜ ਬਾਰੇ ਸੁਖੇਂਦੂ ਦੀਆਂ ਟਿੱਪਣੀਆਂ ਕਾਫ਼ੀ ਹੱਦ ਤੱਕ ਸਹੀ ਹਨ। ਸੰਸਦ ਸਵਾਲਾਂ ਦੀ ਜਗ੍ਹਾ ਨਹੀਂ ਹੈ।”
Read More: TMC ਨੂੰ ਵੱਡਾ ਝਟਕਾ, ਰਾਜ ਸਭਾ ਮੈਂਬਰ ਸੁਖੇਂਦੂ ਸ਼ੇਖਰ ਰਾਏ ਨੇ ਦਿੱਤਾ ਅਸਤੀਫਾ
