ਚੰਡੀਗੜ੍ਹ, 05 ਮਾਰਚ 2025: ਪਿਛਲੇ ਪੰਜ ਮਹੀਨਿਆਂ ਤੋਂ ਭਾਰਤੀ ਸਟਾਕ ਮਾਰਕੀਟ (Stock Market) ‘ਚ ਆਈ ਗਿਰਾਵਟ ਨੇ ਨਿਵੇਸ਼ਕਾਂ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਤੇਜ਼ੀ ਨਾਲ ਵੱਧ ਰਹੀ ਗਿਰਾਵਟ ਨੇ ਪਿਛਲੇ 29 ਸਾਲਾਂ ਦਾ ਰਿਕਾਰਡ ਤੋੜ ਦਿੱਤਾ ਹੈ। ਵਿਦੇਸ਼ੀ ਨਿਵੇਸ਼ਕਾਂ ਵੱਲੋਂ ਭਾਰੀ ਵਿਕਰੀ ਕਾਰਨ ਬਾਜ਼ਾਰ ‘ਚ ਡਰ ਦਾ ਮਾਹੌਲ ਹੈ।
ਅੰਕੜਿਆਂ ‘ਤੇ ਨਜ਼ਰ ਮਾਰੀਏ ਤਾਂ ਸਾਲ 2025 ‘ਚ ਹੁਣ ਤੱਕ, ਵਿਦੇਸ਼ੀ ਨਿਵੇਸ਼ਕਾਂ ਨੇ ਹਰ ਰੋਜ਼ ਔਸਤਨ 2,700 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ ਹਨ। ਮੋਤੀਲਾਲ ਓਸਵਾਲ ਦੀ ਰਿਪੋਰਟ ਦੇ ਮੁਤਾਬਕ ਫਰਵਰੀ 2025 ‘ਚ ਨਿਫਟੀ 5.9 ਫੀਸਦੀ ਡਿੱਗ ਗਿਆ, ਜੋ ਕਿ ਮਾਰਚ 2020 ਤੋਂ ਬਾਅਦ ਦੂਜੀ ਸਭ ਤੋਂ ਵੱਡੀ ਮਹੀਨਾਵਾਰ ਗਿਰਾਵਟ ਹੈ।
ਨਿਫਟੀ ਪਿਛਲੇ ਸਾਲ ਸਤੰਬਰ ‘ਚ 26,277 ਦੇ ਸਿਖਰ ‘ਤੇ ਪਹੁੰਚ ਗਿਆ ਸੀ, ਪਰ ਉੱਥੋਂ ਹੁਣ ਤੱਕ ਇਹ 4,273 ਅੰਕ (16 ਫੀਸਦੀ) ਡਿੱਗ ਚੁੱਕਾ ਹੈ। ਇਸੇ ਤਰ੍ਹਾਂ, ਸੈਂਸੈਕਸ ਆਪਣੇ ਸਰਵਕਾਲੀਨ ਉੱਚੇ 85,978 ਤੋਂ 13,200 ਅੰਕ (15 ਫੀਸਦੀ) ਡਿੱਗ ਗਿਆ ਹੈ।
ਬਾਜ਼ਾਰ (Stock Market) ‘ਚ ਗਿਰਾਵਟ ਦੇ ਮੁੱਖ ਕਾਰਨ ?
ਕਮਜ਼ੋਰ ਆਰਥਿਕ ਅੰਕੜੇ: ਸਤੰਬਰ ਅਤੇ ਦਸੰਬਰ 2024 ‘ਚ ਜਾਰੀ ਕੀਤੇ ਗਏ GDP ਵਿਕਾਸ ਦਰ ਉਮੀਦ ਤੋਂ ਘੱਟ ਸਨ, ਜਿਸ ਨਾਲ ਨਿਵੇਸ਼ਕਾਂ ਦਾ ਵਿਸ਼ਵਾਸ ਘਟ ਗਿਆ।
ਘਰੇਲੂ ਕੰਪਨੀਆਂ ਦੀ ਸੁਸਤ ਕਮਾਈ: ਦੂਜੀ ਅਤੇ ਤੀਜੀ ਤਿਮਾਹੀ ‘ਚ ਕਾਰਪੋਰੇਟ ਕਮਾਈ ਉਮੀਦਾਂ ‘ਤੇ ਖਰੀ ਨਹੀਂ ਉਤਰੀ, ਜਿਸ ਕਾਰਨ ਉਨ੍ਹਾਂ ਦੇ ਉੱਚ ਮੁਲਾਂਕਣ ਨੂੰ ਜਾਇਜ਼ ਠਹਿਰਾਉਣਾ ਮੁਸ਼ਕਲ ਹੋ ਗਿਆ।
ਗਲੋਬਲ ਅਨਿਸ਼ਚਿਤਤਾ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਟੈਰਿਫ ਯੁੱਧ ਨੇ ਗਲੋਬਲ ਆਰਥਿਕ ਵਿਕਾਸ ਬਾਰੇ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਟੈਰਿਫ ‘ਚ ਵਾਧੇ ਕਾਰਨ, ਨਾ ਸਿਰਫ਼ ਭਾਰਤੀ ਸਗੋਂ ਹੋਰ ਵਿਦੇਸ਼ੀ ਬਾਜ਼ਾਰ ਵੀ ਹੇਠਾਂ ਵੱਲ ਜਾ ਰਹੇ ਹਨ। ਟਰੰਪ ਦੀ ਟੈਰਿਫ ਵਧਾਉਣ ਦੀ ਧਮਕੀ ਦਾ ਪ੍ਰਭਾਵ ਸਿੱਧੇ ਤੌਰ ‘ਤੇ ਸ਼ੇਅਰ ਬਾਜ਼ਾਰਾਂ ‘ਤੇ ਦੇਖਿਆ ਜਾ ਰਿਹਾ ਹੈ। ਘਰੇਲੂ ਕੰਪਨੀਆਂ ਦੇ ਕਮਜ਼ੋਰ ਤਿਮਾਹੀ ਨਤੀਜੇ ਅਤੇ ਟਰੰਪ ਦੀ ਚੇਤਾਵਨੀ ਨੇ ਘਰੇਲੂ ਸਟਾਕ ਮਾਰਕੀਟ ਨੂੰ ਪਰੇਸ਼ਾਨ ਕੀਤਾ ਹੈ।
ਡਾਲਰ ਦੇ ਮੁਕਾਬਲੇ ਰੁਪਿਆ ਕਮਜ਼ੋਰ: ਵਿਦੇਸ਼ੀ ਨਿਵੇਸ਼ਕ ਭਾਰਤੀ ਬਾਜ਼ਾਰ ਤੋਂ ਲਗਾਤਾਰ ਪੈਸਾ ਕਢਵਾ ਰਹੇ ਹਨ, ਜਿਸ ਨਾਲ ਰੁਪਏ ‘ਤੇ ਦਬਾਅ ਵੀ ਵਧ ਰਿਹਾ ਹੈ। ਰੁਪਿਆ ਲਗਾਤਾਰ ਆਪਣੇ ਸਭ ਤੋਂ ਹੇਠਲੇ ਪੱਧਰ ਦੇ ਆਸ-ਪਾਸ ਵਪਾਰ ਕਰ ਰਿਹਾ ਹੈ।
ਜੇਕਰ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ ਵੱਲੋਂ ਵਿਕਰੀ ਜਾਰੀ ਰਹਿੰਦੀ ਹੈ, ਤਾਂ ਨੇੜਲੇ ਭਵਿੱਖ ਵਿੱਚ ਘਰੇਲੂ ਸਟਾਕ ਮਾਰਕੀਟ ((Stock Market)) ‘ਚ ਸਥਿਰਤਾ ਦੀ ਸੰਭਾਵਨਾ ਬਹੁਤ ਘੱਟ ਹੈ। ਐਚਡੀਐਫਸੀ ਸਿਕਿਓਰਿਟੀਜ਼ ਦੇ ਸੀਨੀਅਰ ਵਿਸ਼ਲੇਸ਼ਕ ਨਾਗਰਾਜ ਸ਼ੈੱਟੀ ਦਾ ਕਹਿਣਾ ਹੈ ਕਿ ਮਾਰਚ ਦੇ ਵਪਾਰਕ ਹਫ਼ਤੇ ‘ਚ ਬਾਜ਼ਾਰ ਕਮਜ਼ੋਰ ਖੁੱਲ੍ਹਿਆ ਅਤੇ ਫਿਰ ਹੋਰ ਕਮਜ਼ੋਰ ਹੋ ਗਿਆ।
Read More: Stock Market Crash: ਸਟਾਕ ਮਾਰਕੀਟ ‘ਚ ਭਾਰੀ ਗਿਰਾਵਟ ਦਰਜ, ਡੋਨਾਲਡ ਟਰੰਪ ਦੇ ਫੈਸਲਿਆਂ ਦਾ ਪਿਆ ਅਸਰ
