ਚੰਡੀਗੜ੍ਹ, 10 ਫਰਵਰੀ 2023: ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ (Rohit Sharma) ਨੇ ਨਾਗਪੁਰ ‘ਚ ਆਸਟ੍ਰੇਲੀਆ ਖ਼ਿਲਾਫ਼ ਪਹਿਲੇ ਟੈਸਟ ‘ਚ ਸ਼ਾਨਦਾਰ ਸੈਂਕੜਾ ਲਗਾਇਆ। ਰੋਹਿਤ ਨੇ ਸ਼ੁੱਕਰਵਾਰ (10 ਫਰਵਰੀ) ਨੂੰ ਮੈਚ ਦੀ ਪਹਿਲੀ ਪਾਰੀ ਵਿੱਚ ਆਪਣਾ ਸੈਂਕੜਾ ਪੂਰਾ ਕੀਤਾ ਹੈ । ਹਿਟਮੈਨ ਨੇ 17 ਮਹੀਨਿਆਂ ਬਾਅਦ ਟੈਸਟ ‘ਚ ਸੈਂਕੜਾ ਲਗਾਇਆ ਹੈ। ਪਿਛਲੀ ਵਾਰ ਰੋਹਿਤ ਨੇ ਸਤੰਬਰ 2021 ਵਿੱਚ ਓਵਲ ਵਿੱਚ ਇੰਗਲੈਂਡ ਖ਼ਿਲਾਫ਼ 127 ਦੌੜਾਂ ਦੀ ਪਾਰੀ ਖੇਡੀ ਸੀ। ਰੋਹਿਤ ਨੇ ਵੀ ਆਸਟ੍ਰੇਲੀਆ ਲਈ ਸੈਂਕੜਾ ਲਗਾ ਕੇ ਇਤਿਹਾਸ ਰਚ ਦਿੱਤਾ।
ਰੋਹਿਤ ਸ਼ਰਮਾ (Rohit Sharma) ਨੇ ਬਤੌਰ ਕਪਤਾਨ ਵਜੋਂ ਤਿੰਨੋਂ ਫਾਰਮੈਟਾਂ (ਟੈਸਟ, ਵਨਡੇ ਅਤੇ ਟੀ-20) ਵਿੱਚ ਸੈਂਕੜਾ ਲਗਾਉਣ ਵਾਲਾ ਪਹਿਲਾ ਭਾਰਤੀ ਬੱਲੇਬਾਜ਼ ਬਣ ਗਿਆ ਹੈ। ਅਜਿਹਾ ਕਰਨ ਵਾਲਾ ਉਹ ਦੁਨੀਆ ਦਾ ਚੌਥਾ ਖਿਡਾਰੀ ਹੈ। ਸ਼੍ਰੀਲੰਕਾ ਦੇ ਤਿਲਕਰਤਨੇ ਦਿਲਸ਼ਾਨ, ਦੱਖਣੀ ਅਫਰੀਕਾ ਦੇ ਫਾਫ ਡੁਪਲੇਸਿਸ ਅਤੇ ਪਾਕਿਸਤਾਨ ਦੇ ਬਾਬਰ ਆਜ਼ਮ ਨੇ ਬਤੌਰ ਕਪਤਾਨ ਤਿੰਨੋਂ ਫਾਰਮੈਟਾਂ ਵਿੱਚ ਸੈਂਕੜੇ ਲਗਾਏ ਹਨ। ਰੋਹਿਤ ਨੇ ਕਪਤਾਨ ਦੇ ਤੌਰ ‘ਤੇ ਵਨਡੇ ‘ਚ ਤਿੰਨ ਅਤੇ ਟੀ-20 ‘ਚ ਦੋ ਸੈਂਕੜੇ ਲਗਾਏ ਹਨ।
ਰੋਹਿਤ ਸ਼ਰਮਾ ਦੇ ਟੈਸਟ ਕਰੀਅਰ ਦਾ ਇਹ ਨੌਵਾਂ ਸੈਂਕੜਾ ਹੈ। ਇਸ ਤੋਂ ਇਲਾਵਾ ਆਸਟ੍ਰੇਲੀਆ ਦੇ ਖ਼ਿਲਾਫ਼ ਰੋਹਿਤ ਨੇ ਪਹਿਲੀ ਵਾਰ ਕਿਸੇ ਟੈਸਟ ਮੈਚ ‘ਚ ਸੈਂਕੜਾ ਲਗਾਇਆ ਹੈ। ਰੋਹਿਤ ਭਾਰਤ ਲਈ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਦੇ ਮਾਮਲੇ ਵਿੱਚ ਸਾਬਕਾ ਅਨੁਭਵੀ ਕਪਤਾਨ ਕਪਿਲ ਦੇਵ ਤੋਂ ਅੱਗੇ ਨਿਕਲ ਗਏ ਹਨ। ਕਪਿਲ ਦੇਵ ਨੇ 131 ਟੈਸਟ ਮੈਚਾਂ ਵਿੱਚ ਅੱਠ ਸੈਂਕੜੇ ਲਗਾਏ ਹਨ। ਹਿਟਮੈਨ ਨੇ ਆਪਣਾ ਨੌਵਾਂ ਸੈਂਕੜਾ ਲਗਾ ਕੇ ਸਾਬਕਾ ਸਲਾਮੀ ਬੱਲੇਬਾਜ਼ ਗੌਤਮ ਗੰਭੀਰ ਅਤੇ ਨਵਜੋਤ ਸਿੰਘ ਸਿੱਧੂ ਦੀ ਬਰਾਬਰੀ ਕਰ ਲਈ ਹੈ। ਗੰਭੀਰ ਨੇ 58 ਅਤੇ ਸਿੱਧੂ ਨੇ 51 ਟੈਸਟਾਂ ਵਿੱਚ 9-9 ਸੈਂਕੜੇ ਲਗਾਏ ਸਨ।
