ਚੰਡੀਗੜ੍ਹ, 21 ਜਨਵਰੀ, 2025: Stock Market Crash: ਡੋਨਾਲਡ ਟਰੰਪ ਦੇ ਅਮਰੀਕਾ ਦੇ 47ਵੇਂ ਰਾਸ਼ਟਰਪਤੀ ਵਜੋਂ ਸਹੁੰ ਚੁੱਕਣ ਤੋਂ ਬਾਅਦ ਬ੍ਰਿਕਸ ਦੇਸ਼ਾਂ ‘ਤੇ ਟੈਰਿਫ ਲਗਾਉਣ ਖ਼ਬਰ ਸਾਹਮਣੇ ਆਈ। ਇਸ ਆਦੇਸ਼ ਤੋਂ ਬਾਅਦ,ਮੰਗਲਵਾਰ 21 ਜਨਵਰੀ 2025 ਨੂੰ ਭਾਰਤੀ ਸਟਾਕ ਮਾਰਕੀਟ ਕਰੈਸ਼ ਹੋ ਗਿਆ।
ਕਾਰੋਬਾਰ ਦੇ ਅੰਤ ‘ਤੇ ਬੰਬੇ ਸਟਾਕ ਐਕਸਚੇਂਜ (BSE) ਦਾ ਮੁੱਖ ਸੰਵੇਦੀ ਸੂਚਕਾਂਕ ਸੈਂਸੈਕਸ 1235.08 ਅੰਕ ਜਾਂ 1.60 ਫੀਸਦੀ ਦੀ ਭਾਰੀ ਗਿਰਾਵਟ ਨਾਲ 75,838.36 ਅੰਕਾਂ ‘ਤੇ ਬੰਦ ਹੋਇਆ। ਨੈਸ਼ਨਲ ਸਟਾਕ ਐਕਸਚੇਂਜ (NSE) ਨਿਫਟੀ ਵੀ 320.10 ਅੰਕ ਜਾਂ 1.37% ਡਿੱਗ ਕੇ 23,024.65 ਅੰਕ ‘ਤੇ ਆ ਗਿਆ।
ਡੋਨਾਲਡ ਟਰੰਪ ਦੇ ਰਾਸ਼ਟਰਪਤੀ ਵਜੋਂ ਸਹੁੰ ਚੁੱਕਣ ਤੋਂ ਬਾਅਦ ਕਿਸੇ ਨੂੰ ਉਮੀਦ ਨਹੀਂ ਸੀ ਕਿ ਸਟਾਕ ਮਾਰਕੀਟ ‘ਚ ਇੰਨਾ ਤੂਫਾਨ (Stock Market Crash) ਆਵੇਗਾ। ਕਾਰੋਬਾਰੀ ਸੈਸ਼ਨ ਦੌਰਾਨ ਨਿਵੇਸ਼ਕਾਂ ਨੂੰ 8.30 ਲੱਖ ਕਰੋੜ ਰੁਪਏ ਤੋਂ ਵੱਧ ਦਾ ਨੁਕਸਾਨ ਹੋਇਆ। ਸੈਂਸੈਕਸ 75 ਹਜ਼ਾਰ ਅੰਕਾਂ ਦੇ ਪੱਧਰ ‘ਤੇ ਪਹੁੰਚ ਗਿਆ ਹੈ। ਜਦੋਂ ਕਿ ਨਿਫਟੀ 23 ਹਜ਼ਾਰ ਅੰਕਾਂ ਤੋਂ ਹੇਠਾਂ ਦੇਖਿਆ ਗਿਆ। ਟਰੰਪ ਦੀ ਨੀਤੀ ਅਤੇ ਉਸ ਤੋਂ ਬਾਅਦ ਆਈ ਅਸਥਿਰਤਾ ਕਾਰਨ ਸਟਾਕ ਮਾਰਕੀਟ ‘ਚ ਗਿਰਾਵਟ ਦੇਖਣ ਨੂੰ ਮਿਲੀ ਹੈ।
ਦੂਜੇ ਪਾਸੇ ਵਿਦੇਸ਼ੀ ਨਿਵੇਸ਼ਕਾਂ ਵੱਲੋਂ ਵਿਕਰੀ ਜਾਰੀ ਹੈ। ਖਪਤਕਾਰ ਟਿਕਾਊ ਵਸਤੂਆਂ ਅਤੇ ਰੀਅਲਟੀ ਸਟਾਕਾਂ ‘ਚ ਗਿਰਾਵਟ ਨੇ ਵੀ ਸਟਾਕ ਮਾਰਕੀਟ ‘ਚ ਨੁਕਸਾਨ ਕੀਤਾ ਹੈ। ਤੀਜੀ ਤਿਮਾਹੀ ਦੇ ਨਤੀਜੇ ਚੰਗੇ ਨਹੀਂ ਲੱਗ ਰਹੇ ਹਨ। ਦੂਜੇ ਪਾਸੇ ਜ਼ੋਮੈਟੋ ਅਤੇ ਸਟਾਕ ਮਾਰਕੀਟ ਦੇ ਹੈਵੀਵੇਟ ਸ਼ੇਅਰਾਂ ‘ਚ ਵੱਡੀ ਗਿਰਾਵਟ ਦੇਖੀ ਗਈ ਹੈ। ਜਿਸਦਾ ਅਸਰ ਸ਼ੇਅਰ ਬਾਜ਼ਾਰ ‘ਚ ਸਾਫ਼ ਦਿਖਾਈ ਦੇ ਰਿਹਾ ਹੈ।
ਸ਼ੇਅਰ ਬਾਜ਼ਾਰ ਦੇ ਕਾਰੋਬਾਰ ਦੇ ਅੰਤ ‘ਤੇ, ਬੀਐਸਈ ਸੈਂਸੈਕਸ ਸੂਚਕਾਂਕ ਦੇ 30 ਸ਼ੇਅਰਾਂ ‘ਤੇ ਆਧਾਰਿਤ 28 ਸ਼ੇਅਰ ਗਿਰਾਵਟ ਨਾਲ ਬੰਦ ਹੋਏ। ਇਨ੍ਹਾਂ ਵਿੱਚੋਂ, ਜ਼ੋਮੈਟੋ ਦਾ ਸਟਾਕ ਸਭ ਤੋਂ ਵੱਧ 10.92% ਡਿੱਗ ਕੇ 214.65 ਰੁਪਏ ਪ੍ਰਤੀ ਸ਼ੇਅਰ ‘ਤੇ ਪਹੁੰਚ ਗਿਆ।
ਸੈਂਸੈਕਸ ਦੇ ਦੋ ਸਟਾਕ ਜਿਨ੍ਹਾਂ ਵਿੱਚ ਵਾਧਾ ਦਰਜ ਕੀਤਾ ਗਿਆ, ਉਨ੍ਹਾਂ ਵਿੱਚ ਅਲਟਰਾਟੈਕ ਸੀਮੈਂਟ ਅਤੇ ਐਚਸੀਐਲ ਟੈਕਨਾਲੋਜੀ ਸ਼ਾਮਲ ਹਨ। ਅਲਟਰਾਟੈਕ ਸੀਮੈਂਟ ਦੇ ਸ਼ੇਅਰ 0.76% ਵਧ ਕੇ 10705.05 ਰੁਪਏ ਪ੍ਰਤੀ ਸ਼ੇਅਰ ‘ਤੇ ਬੰਦ ਹੋਏ। ਇਸ ਦੇ ਨਾਲ ਹੀ, ਐਚਸੀਐਲ ਟੈਕਨਾਲੋਜੀਜ਼ ਦਾ ਸ਼ੇਅਰ 0.49% ਵਧ ਕੇ 1804.50 ਰੁਪਏ ਪ੍ਰਤੀ ਸ਼ੇਅਰ ਹੋ ਗਿਆ।
ਐਨਐਸਈ ਦਾ 50-ਸ਼ੇਅਰਾਂ ਵਾਲਾ ਸੂਚਕਾਂਕ, ਨਿਫਟੀ, 41 ਸ਼ੇਅਰ ਲਾਲ ਰੰਗ ‘ਚ ਅਤੇ 9 ਸ਼ੇਅਰ ਹਰੇ ਰੰਗ ‘ਚ ਬੰਦ ਹੋਇਆ। ਇਨ੍ਹਾਂ ‘ਚੋਂ ਟਾਟਾ ਗਰੁੱਪ ਦੀ ਕੰਪਨੀ ਟ੍ਰੇਂਟ ਨੂੰ ਸਭ ਤੋਂ ਵੱਧ 6.00% ਦਾ ਨੁਕਸਾਨ ਹੋਇਆ। ਵਪਾਰ ਦੇ ਅੰਤ ‘ਤੇ ਇਸਦਾ ਸਟਾਕ 5724.75 ਰੁਪਏ ਪ੍ਰਤੀ ਸ਼ੇਅਰ ‘ਤੇ ਬੰਦ ਹੋਇਆ।
ਜਿਕਰਯੋਗ ਹੈ ਕਿ ਜਨਵਰੀ ਮਹੀਨੇ ਦੀ ਗੱਲ ਕਰੀਏ ਤਾਂ ਸ਼ੇਅਰ ਬਾਜ਼ਾਰ ‘ਚ 3 ਪ੍ਰਤੀਸ਼ਤ ਦੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਜਿੱਥੇ ਸੈਂਸੈਕਸ ‘ਚ 3 ਪ੍ਰਤੀਸ਼ਤ ਤੋਂ ਵੱਧ ਦੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਜਦੋਂ ਕਿ ਨਿਫਟੀ ‘ਚ ਵੀ 2.80 ਪ੍ਰਤੀਸ਼ਤ ਦਾ ਵਾਧਾ ਦੇਖਣ ਨੂੰ ਮਿਲਿਆ ਹੈ। ਮਾਹਰਾਂ ਅਨੁਸਾਰ, ਸਟਾਕ ਮਾਰਕੀਟ ਵਿੱਚ ਹੋਰ ਗਿਰਾਵਟ ਦੇਖਣ ਨੂੰ ਮਿਲ ਸਕਦੀ ਹੈ। ਟਰੰਪ ਦੇ ਐਲਾਨਾਂ ਨੂੰ ਅਜੇ ਵਿਸਥਾਰ ਵਿੱਚ ਜਾਰੀ ਨਹੀਂ ਕੀਤਾ ਗਿਆ ਹੈ। ਜਦੋਂ ਉਹ ਅੱਗੇ ਆਉਣਗੇ, ਤਾਂ ਉਨ੍ਹਾਂ ਦਾ ਹਿੱਸਾ ਬਾਜ਼ਾਰ ਵਿੱਚ ਜ਼ਰੂਰ ਦਿਖਾਈ ਦੇਵੇਗਾ।
ਏਸ਼ੀਆ ਦੇ ਹੋਰ ਬਾਜ਼ਾਰਾਂ ‘ਚ ਮਿਲਿਆ-ਜੁਲਿਆ ਰੁਝਾਨ ਦੇਖਿਆ ਜਾ ਰਿਹਾ ਹੈ। ਜਾਪਾਨ ਦਾ ਨਿੱਕੇਈ 225 ਅਤੇ ਹਾਂਗ ਕਾਂਗ ਦਾ ਹੈਂਗ ਸੇਂਗ ਵਾਧੇ ਨਾਲ ਬੰਦ ਹੋਇਆ, ਜਦੋਂ ਕਿ ਦੱਖਣੀ ਕੋਰੀਆ ਦਾ ਕੋਸਪੀ ਅਤੇ ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ ਗਿਰਾਵਟ ਨਾਲ ਬੰਦ ਹੋਇਆ। ਸੋਮਵਾਰ ਨੂੰ ਅਮਰੀਕੀ ਬਾਜ਼ਾਰ ਵਾਧੇ ਨਾਲ ਬੰਦ ਹੋਏ। ਯੂਰਪੀ ਬਾਜ਼ਾਰ ‘ਚ ਇੱਕ ਸਕਾਰਾਤਮਕ ਰੁਝਾਨ ਦੇਖਿਆ ਜਾ ਰਿਹਾ ਹੈ। ਗਲੋਬਲ ਤੇਲ ਬਾਜ਼ਾਰ ‘ਚ ਬ੍ਰੈਂਟ ਕਰੂਡ 0.17% ਵੱਧ ਕੇ $80.93 ਪ੍ਰਤੀ ਬੈਰਲ ‘ਤੇ ਵਪਾਰ ਕਰ ਰਿਹਾ ਹੈ। ਗਲੋਬਲ ਬਾਜ਼ਾਰਾਂ ‘ਚ ਗਿਰਾਵਟ ਦਾ ਭਾਰਤੀ ਸ਼ੇਅਰ ਬਾਜ਼ਾਰ ‘ਤੇ ਵੀ ਮਾੜਾ ਪ੍ਰਭਾਵ ਪਿਆ ਹੈ।
Read More: Share Market: ਸ਼ੇਅਰ ਮਾਰਕੀਟ ‘ਚ ਮਚੀ ਹਾਹਾਕਾਰ, 6 ਲੱਖ ਕਰੋੜ ਰੁਪਏ ਦਾ ਨੁਕਸਾਨ
