ਨਵੀਂ ਦਿੱਲੀ, 17 ਸਤੰਬਰ 2026: Semicon India 2026: ਸੈਮੀਕੌਨ ਇੰਡੀਆ 2026, ਜੋ ਕਿ ਭਾਰਤ ਦੇ ਸੈਮੀਕੰਡਕਟਰ ਮਿਸ਼ਨ ਨੂੰ ਅੱਗੇ ਵਧਾਉਣ ਵਾਲੇ ਪ੍ਰਮੁੱਖ ਸਮਾਗਮਾਂ ‘ਚੋਂ ਇੱਕ ਹੈ, ਸ਼ੁਰੂ ਹੋ ਗਿਆ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਨਵੀਂ ਦਿੱਲੀ ਦੇ ਯਸ਼ੋਭੂਮੀ ਵਿਖੇ ਇਸਦੇ ਪੰਜਵੇਂ ਐਡੀਸ਼ਨ ਦਾ ਉਦਘਾਟਨ ਕੀਤਾ। ਇਹ ਤਿੰਨ ਦਿਨਾਂ ਸਮਾਗਮ ਦੁਨੀਆ ਭਰ ਦੇ ਸੈਮੀਕੰਡਕਟਰ ਅਤੇ ਇਲੈਕਟ੍ਰਾਨਿਕਸ ਉਦਯੋਗਾਂ ਨੂੰ ਇਕੱਠਾ ਕਰਦਾ ਹੈ। ਸਮਾਗਮ ਦੌਰਾਨ, ਪ੍ਰਧਾਨ ਮੰਤਰੀ ਮੋਦੀ ਨੇ ਯਸ਼ੋਭੂਮੀ ਵਿਖੇ ਭਾਰਤ ਦੇ ਸੈਮੀਕੰਡਕਟਰ ਮਿਸ਼ਨ ‘ਤੇ ਨੌਜਵਾਨਾਂ ਨਾਲ ਗੱਲਬਾਤ ਕੀਤੀ। 52 ਦੇਸ਼ਾਂ ਦੀਆਂ 600 ਤੋਂ ਵੱਧ ਕੰਪਨੀਆਂ ਹਿੱਸਾ ਲੈ ਰਹੀਆਂ ਹਨ।
ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਚਿਪਸ ਹੁਣ ਭਾਰਤੀ ਪਲਾਂਟਾਂ ਤੋਂ ਤਿਆਰ ਕੀਤੇ ਜਾ ਰਹੇ ਹਨ ਅਤੇ ਦੁਨੀਆ ਤੱਕ ਪਹੁੰਚ ਰਹੇ ਹਨ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕਿਸੇ ਵੀ ਦੇਸ਼ ਲਈ ਇੰਨੇ ਘੱਟ ਸਮੇਂ ‘ਚ ਇਹ ਪ੍ਰਾਪਤ ਕਰਨਾ ਆਸਾਨ ਨਹੀਂ ਹੈ, ਪਰ ਭਾਰਤ ਨੇ ਇਹ ਉਪਲਬਧੀ ਹਾਸਲ ਕੀਤੀ। ਮੋਦੀ ਨੇ ਉਦਯੋਗ ਦੇ ਆਗੂਆਂ ਨੂੰ ਦੇਸ਼ ਦੀ ਨੀਂਹ ਦੱਸਿਆ ਅਤੇ ਕਿਹਾ ਕਿ ਉਹ ਸਾਡੇ ਭਾਈਵਾਲ ਹਨ।
ਸੈਮੀਕੌਨ ਇੰਡੀਆ 2026 17 ਤੋਂ 19 ਸਤੰਬਰ ਤੱਕ ਕਰਵਾਇਆ ਜਾਵੇਗਾ। ਇਸਦਾ ਥੀਮ ‘ਸਿਲਿਕੌਨ ਤੋਂ ਸਿਸਟਮ: ਬਿਲਡਿੰਗ ਦ ਈਕੋਸਿਸਟਮ’ ਹੈ। ਇਹ ਕਾਨਫਰੰਸ ਗਲੋਬਲ ਕੰਪਨੀਆਂ, ਨੀਤੀ ਨਿਰਮਾਤਾਵਾਂ, ਨਿਵੇਸ਼ਕਾਂ, ਖੋਜਕਰਤਾਵਾਂ, ਸਟਾਰਟਅੱਪਸ ਅਤੇ ਵਿਦਿਅਕ ਸੰਸਥਾਵਾਂ ਦੇ ਪ੍ਰਤੀਨਿਧੀਆਂ ਨੂੰ ਇਕੱਠੇ ਕਰੇਗੀ। ਇਸ ਸਮਾਗਮ ਦਾ ਉਦੇਸ਼ ਸੈਮੀਕੰਡਕਟਰ ਉਦਯੋਗ ਵਿੱਚ ਸਹਿਯੋਗ, ਨਿਵੇਸ਼, ਨਵੀਨਤਾ ਅਤੇ ਹੁਨਰਮੰਦ ਪ੍ਰਤਿਭਾ ਦੇ ਵਿਕਾਸ ਨੂੰ ਉਤਸ਼ਾਹਿਤ ਕਰਨਾ ਹੈ।
ਇਹ ਸਮਾਗਮ ਇੰਡੀਆ ਸੈਮੀਕੰਡਕਟਰ ਮਿਸ਼ਨ, ਇਲੈਕਟ੍ਰਾਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ ਅਤੇ ਗਲੋਬਲ ਉਦਯੋਗ ਸੰਗਠਨ SEMI ਦੇ ਸਹਿਯੋਗ ਨਾਲ ਆਯੋਜਿਤ ਕੀਤਾ ਜਾ ਰਿਹਾ ਹੈ।
600 ਤੋਂ ਵੱਧ ਕੰਪਨੀਆਂ ਤਕਨਾਲੋਜੀਆਂ ਦਾ ਪ੍ਰਦਰਸ਼ਨ ਕਰਨਗੀਆਂ
ਸੈਮੀਕੌਨ ਇੰਡੀਆ 2026 ਪ੍ਰਦਰਸ਼ਨੀ ‘ਚ 52 ਦੇਸ਼ਾਂ ਦੀਆਂ 600 ਤੋਂ ਵੱਧ ਕੰਪਨੀਆਂ ਹਿੱਸਾ ਲੈਣਗੀਆਂ, ਜਿਸ ‘ਚ ਲਗਭਗ 300 ਵਿਦੇਸ਼ੀ ਕੰਪਨੀਆਂ ਸ਼ਾਮਲ ਹਨ। ਪ੍ਰਦਰਸ਼ਨੀ ਲਈ ਲਗਭਗ 15,000 ਵਰਗ ਮੀਟਰ ਜਗ੍ਹਾ ਨਿਰਧਾਰਤ ਕੀਤੀ ਗਈ ਹੈ। 150 ਤੋਂ ਵੱਧ ਬੁਲਾਰੇ ਵੱਖ-ਵੱਖ ਸੈਸ਼ਨਾਂ ‘ਚ ਸੈਮੀਕੰਡਕਟਰ ਅਤੇ ਇਲੈਕਟ੍ਰਾਨਿਕਸ ਉਦਯੋਗ ਨਾਲ ਸਬੰਧਤ ਮੁੱਦਿਆਂ ‘ਤੇ ਚਰਚਾ ਕਰਨਗੇ, ਜਿਸ ਵਿੱਚ ਚਿੱਪ ਨਿਰਮਾਣ, ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਚਿੱਪ ਡਿਜ਼ਾਈਨ, ਐਡਵਾਂਸਡ ਪੈਕੇਜਿੰਗ ਅਤੇ ਸਪਲਾਈ ਚੇਨ ਵਰਗੇ ਵਿਸ਼ਿਆਂ ਨੂੰ ਸ਼ਾਮਲ ਕੀਤਾ ਜਾਵੇਗਾ।
ਇਸ ਸਮਾਗਮ ‘ਚ ਛੇ ਦੇਸ਼ਾਂ ਦੇ ਪੈਵੇਲੀਅਨ ਸਥਾਪਤ ਕੀਤੇ ਗਏ ਹਨ। 12 ਸੂਬਾ ਸਰਕਾਰਾਂ ਦੁਆਰਾ ਵੱਖਰੇ ਪੈਵੇਲੀਅਨ ਵੀ ਸਥਾਪਤ ਕੀਤੇ ਜਾਣਗੇ। ਇਸ ਤੋਂ ਇਲਾਵਾ, ਸਟਾਰਟਅੱਪਸ, ਨਵੀਨਤਾ, ਵਿਦਿਆਰਥੀਆਂ, ਹੁਨਰ ਵਿਕਾਸ ਅਤੇ ਸੈਮੀਕੰਡਕਟਰ ਖੇਤਰ ਵਿੱਚ ਔਰਤਾਂ ਦੀ ਭਾਗੀਦਾਰੀ ‘ਤੇ ਕੇਂਦ੍ਰਿਤ ਸਮਰਪਿਤ ਫੋਰਮ ਹੋਣਗੇ। ਸਟਾਰਟਅੱਪ ਪੈਵੇਲੀਅਨ ਲਗਭਗ 40 ਸਟਾਰਟਅੱਪਸ ਦੀਆਂ ਤਕਨਾਲੋਜੀਆਂ ਅਤੇ ਹੱਲਾਂ ਨੂੰ ਪ੍ਰਦਰਸ਼ਿਤ ਕਰੇਗਾ। ਵਰਕਫੋਰਸ ਡਿਵੈਲਪਮੈਂਟ ਪੈਵੇਲੀਅਨ ਮਾਈਕ੍ਰੋਇਲੈਕਟ੍ਰੋਨਿਕਸ ਖੇਤਰ ਵਿੱਚ ਰੁਜ਼ਗਾਰ, ਸਿਖਲਾਈ ਅਤੇ ਹੁਨਰ ਦੇ ਮੌਕਿਆਂ ‘ਤੇ ਕੇਂਦ੍ਰਤ ਕਰੇਗਾ।
ਸੈਮੀਕੌਨ ਇੰਡੀਆ ਭਾਰਤ ਲਈ ਮਹੱਤਵਪੂਰਨ ਕਿਉਂ ਹੈ?
ਸੈਮੀਕੌਨ ਇੰਡੀਆ 2026 ਅਜਿਹੇ ਸਮੇਂ ‘ਚ ਆ ਰਿਹਾ ਹੈ ਜਦੋਂ ਭਾਰਤ ਗਲੋਬਲ ਸੈਮੀਕੰਡਕਟਰ ਸਪਲਾਈ ਚੇਨ ‘ਚ ਆਪਣੀ ਭੂਮਿਕਾ ਨੂੰ ਮਜ਼ਬੂਤ ਕਰਨ ਲਈ ਯਤਨਸ਼ੀਲ ਹੈ। ਵਧਦੀ ਗਲੋਬਲ ਚਿੱਪ ਮੰਗ ਅਤੇ ਵਧੇਰੇ ਭਰੋਸੇਮੰਦ ਸਪਲਾਈ ਚੇਨਾਂ ਦੀ ਜ਼ਰੂਰਤ ਭਾਰਤ ਲਈ ਨਵੇਂ ਨਿਵੇਸ਼ ਅਤੇ ਭਾਈਵਾਲੀ ਦੇ ਮੌਕੇ ਪੈਦਾ ਕਰ ਰਹੀ ਹੈ।
Read M0re: ਅਮਰੀਕਾ ਦੇ ਟੈਰਿਫ ਕਾਨੂੰਨ ‘ਤੇ ਭਾਰਤ ਦੀ ਪਹਿਲੀ ਪ੍ਰਤੀਕਿਰਿਆ, ‘ਵਪਾਰ ਤੇ ਆਰਥਿਕ ਹਿੱਤਾਂ ਦੀ ਰੱਖਿਆ ਕਰਾਂਗੇ’
