ਇਹ ਪਾਕਿਸਤਾਨੀ ਪਰਬਤਾਰੋਹੀ ਨੈਲਾ ਕਿਆਨੀ ਹੈ । ਪਿੱਛੇ ਜਿਹੇ ਭਾਰਤ ਦੀ ਕੁੜੀ ਬਲਜੀਤ ਕੌਰ ਹੋਰਾਂ ਦੀ ਟੀਮ ਦੇ ਨਾਲ਼ ਇੱਕ ਟੀਮ ਇਹਨਾਂ ਦੀ ਵੀ ਅੰਨਾਪੂਰਨਾ – 1 ਦੇ ਸਿਖ਼ਰ ‘ਤੇ ਚੜ੍ਹਨ ਗਈ ਸੀ। ਉਸ ਟੀਮ ‘ਚ ਪਾਕਿਸਤਾਨੀ ਪਰਬਤਾਰੋਹੀ ਸ਼ਹਿਰੋਜ਼ ਅਸ਼ਰਿਫ ਵੀ ਸ਼ਾਮਲ ਸੀ ਜੋ ਸਭ ਤੋਂ ਛੋਟੀ ਉਮਰ ਵਿੱਚ ਅੰਨਾਪੂਰਨਾ ਨੂੰ ਫਤਹਿ ਕਰਨ ਵਾਲਾ ਪਾਕਿਸਤਾਨੀ ਹੈ । ਮਿਸ਼ਨ ਅੰਨਾਪੂਰਨਾ ਦੌਰਾਨ ਬਲਜੀਤ ਹੋਰਾਂ ਦੇ ਨਾਲ਼ ਹੀ ਕੁਝ ਹੋਰ ਪਰਬਤਾਰੋਹੀ ਵੀ ਲਾਪਤਾ ਹੋ ਗਏ ਸੀ।ਨੈਲਾ ਵੀ ਉਹਨਾਂ ‘ਚ ਸ਼ਾਮਲ ਸੀ ਪਰ ਉਸਨੂੰ ਛੇਤੀ ਹੀ ਲੱਭ ਲਿਆ ਸੀ। ਅੱਠ ਦਸ ਵਾਰ ਐਵਰੈਸਟ ਸਰ ਕਰਨ ਵਾਲਾ ਇੱਕ ਆਇਰਿਸ਼ ਪਰਬਤਾਰੋਹੀ ਵੀ ਇਸ ਦੁਰਘਟਨਾ ਵਿੱਚ ਦੁਨੀਆਂ ਨੂੰ ਅਲਵਿਦਾ ਕਹਿ ਗਿਆ।
K2 ਅਤੇ ਅੰਨਾਪੂਰਨਾ ਅੱਠ ਹਜ਼ਾਰ ਮੀਟਰ ਤੋਂ ਜ਼ਿਆਦਾ ਉੱਚੀਆਂ ਉਹ ਚੋਟੀਆਂ ਹਨ, ਜਿਹਨਾਂ ਉੱਤੇ ਚੜ੍ਹਨਾ ਸਭ ਤੋਂ ਜ਼ਿਆਦਾ ਔਖਾ ਹੈ। ਇਹਨਾਂ ਦੋਵਾਂ ਚੋਟੀਆਂ ‘ਤੇ ਹਰ ਸਾਲ ਕਿੰਨੇ ਹੀ ਪਰਬਤਾਰੋਹੀ ਆਪਣੀਆਂ ਜਾਨਾਂ ਤੋਂ ਹੱਥ ਧੋ ਬੈਠਦੇ ਹਨ । ਆਪਣੇ ਇਸ ਮਿਸ਼ਨ ਨੂੰ ਪੂਰਾ ਕਰਨ ਨਾਲ ਨੈਲਾ ਅੰਨਾਪੂਰਨਾ ਨੂੰ ਫਤਹਿ ਕਰਨ ਵਾਲੀ ਪਹਿਲੀ ਪਾਕਿਸਤਾਨੀ ਔਰਤ ਬਣ ਗਈ ਹੈ। ਇਸਤੋਂ ਪਹਿਲਾਂ ਉਹ K2 ਨੂੰ ਵੀ ਫ਼ਤਹਿ ਕਰਨ ਵਾਲੀ ਦੂਜੀ ਪਾਕਿਸਤਾਨੀ ਔਰਤ ਸੀ।
ਅੱਠ ਹਜ਼ਾਰ ਮੀਟਰ ਦੇ ਕਿਸੇ ਵੀ ਪਹਾੜ ‘ਤੇ ਚੜ੍ਹਨ ਵਾਲੀ ਵੀ ਉਹ ਸਭ ਤੋਂ ਪਹਿਲੀ ਪਾਕਿਸਤਾਨੀ ਮਹਿਲਾ ਹੈ। ਅੱਠ ਹਜ਼ਾਰ ਮੀਟਰ ਤੋਂ ਜ਼ਿਆਦਾ ਉੱਚੀਆਂ ਚਾਰ ਚੋਟੀਆਂ ‘ਤੇ ਚੜ੍ਹਨ ਵਾਲ਼ੀ ਪਹਿਲੀ ਪਾਕਿਸਤਾਨੀ ਮਹਿਲਾ ਹੋਣ ਦਾ ਰਿਕਾਰਡ ਵੀ ਨੈਲਾ ਦੇ ਨਾਂ ‘ਤੇ ਹੀ ਬੋਲਦਾ।ਅਜੇ ਦੋ ਕੁ ਸਾਲ ਪਹਿਲਾਂ ਹੀ ਉਨ੍ਹਾਂ ਨੇ ਪਰਬਤਾਰੋਹੀ ਵਜੋਂ ਆਪਣਾਂ ਕੈਰੀਅਰ ਸ਼ੁਰੂ ਕੀਤਾ ਸੀ। ਇਨ੍ਹੇ ਕੁ-ਟਾਈਮ ‘ਚ ਵਿੱਚ ਹੀ ਉਸਨੇ ਰਿਕਾਰਡ ਬੋਲਣ ਲਾ ਦਿੱਤੇ। ਮੈਨੂੰ ਉਮੀਦ ਹੀ ਨੀ ਪੂਰਾ ਯਕੀਨ ਹੈ ਕਿ ਅੱਗੇ ਵੀ ਕੁੜੀ ਪਤਾ ਨੀ ਕਿੰਨੇ ਹੀ ਰਿਕਾਰਡ ਤੋੜਕੇ ਆਪਣੇ ਨਾਂ ਕਰੇਗੀ।
ਇੱਕ ਪਰਬਤਾਰੋਹੀ ਹੋਣ ਦੇ ਨਾਲ ਉਹ ਬੌਕਸਿੰਗ ਦੀ ਵੀ ਖਿਡਾਰਨ ਹੈ ਤੇ ਇਸ ਸਮੇਂ ਦੁਬਈ ‘ਚ ਇੱਕ ਬੈਂਕਰ ਵਜੋਂ ਕੰਮ ਕਰਦੀ ਹੈ । 2018 ਵਿੱਚ ਉਸਨੇ ਆਪਣਾਂ ਪਹਿਲਾ ਵੱਡਾ ਟ੍ਰੈਕ K2 ਬੇਸ ਕੈਂਪ ਦਾ ਕੀਤਾ। ਇਥੇ ਬੇਸ ਕੈਂਪ ‘ਤੇ ਹੀ ਉਸਦਾ ਵਿਆਹ ਹੋਇਆ। ਇਸਤੋਂ ਬਾਅਦ ਹੀ ਉਸਨੇ ਪਰਬਤਾਰੋਹਣ ਬਾਰੇ ਗੰਭੀਰਤਾ ਨਾਲ ਸੋਚਣਾ ਸ਼ੁਰੂ ਕੀਤਾ ਤੇ ਪਹਾੜ ਚੜ੍ਹਨ ਦੀ ਟ੍ਰੇਨਿੰਗ ਲੈਣੀ ਸ਼ੁਰੂ ਕਰਤੀ। ਟ੍ਰੇਨਿੰਗ ਦੌਰਾਨ ਹੀ ਉਹ ਪ੍ਰੈਗਨੈਂਟ ਹੋ ਗਈ। ਜਦੋਂ ਉਹ ਆਪਣੀ ਪਹਿਲੀ ਮੁਹਿੰਮ Gasherburm-2 ਪਰਬਤ ਸਿਖ਼ਰ ਲਈ ਚੱਲੀ ਤਾਂ ਉਸਦੀ ਬੇਟੀ ਮਸਾਂ ਹੀ ਡੂਢ ਕੁ ਮਹੀਨੇ ਦੀ ਹੋਣੀਂ। ਇੱਕ ਮਾਂ ਵਾਸਤੇ ਡੂਢ ਮਹੀਨੇ ਦੀ ਧੀ ਨੂੰ ਛੱਡ ਕੇ ਅੱਠ ਹਜ਼ਾਰ ਤੋਂ ਜ਼ਿਆਦਾ ਉੱਚੇ ਪਹਾੜ ‘ਤੇ ਚੜ੍ਹਨ ਨਿਕਲਣਾ ਕਿੰਨਾ ਔਖਾ ਰਿਹਾ ਹੋਣਾਂ। ਖੈਰ ਜਨੂੰਨ ਅੱਗੇ ਸਭ ਔਖਾਂ ਸੌਖਾਂ ਹਾਰ ਜਾਂਦੀਆਂ ਹਨ ।
ਨੈਲਾ ਨੇ Gasherburm-2 ਨੂੰ ਫਤਹਿ ਕਰਕੇ ਅੱਠ ਹਜ਼ਾਰ ਮੀਟਰ ਚੜ੍ਹਨ ਵਾਲੀ ਪਾਕਿਸਤਾਨ ਦੀ ਪਹਿਲੀ ਔਰਤ ਹੋਣ ਦਾ ਤਾਜ਼ ਆਪਣੇ ਸਿਰ ਸਜਾਇਆ। ਇਸਤੋਂ ਬਾਅਦ ਉਸਨੇ ਦੁਨੀਆਂ ਦੀ ਦੂਜੀ ਸਭ ਤੋਂ ਉੱਚੀ ਚੋਟੀ K2 ਉੱਤੇ ਚੜ੍ਹਨ ਦੀ ਤਿਆਰੀ ਸ਼ੁਰੂ ਕਰਤੀ। ਇਸਤੋਂ ਪਹਿਲਾਂ ਕੋਈ ਵੀ ਪਾਕਿਸਤਾਨੀ ਔਰਤ k2 ਉੱਤੇ ਨਹੀਂ ਚੜ੍ਹੀ ਸੀ। ਉਸਦੀ ਟੀਮ ‘ਚ ਸ਼ਾਮਲ ਸਮੀਨਾ ਬੇਗ 22 ਜੁਲਾਈ 2022 ਨੂੰ ਸਵੇਰੇ ਪੌਣੇ ਅੱਠ ਵਜੇ K2 ਦੇ ਸਿਖ਼ਰ ‘ਤੇ ਪਹੁੰਚ ਕੇ ਸਭ ਤੋਂ ਪਹਿਲੀ ਪਾਕਿਸਤਾਨੀ ਔਰਤ ਬਣਗੀ ਜਦੋਂ ਕਿ ਨੈਲਾ ਉਹਦੇ ਨਾਲੋਂ ਪੌਣੇ ਕੁ ਤਿੰਨ ਘੰਟਿਆਂ ਬਾਅਦ ਸਾਢੇ ਦਸ ਵਜੇ ਸਿਖਰ ‘ਤੇ ਪਹੁੰਚ ਸਕੀ।ਦੋ ਬੱਚਿਆਂ ਦੀ ਮਾਂ ਨੈਲਾ ਕਿਆਨੀ ਕਿੰਨੇ ਹੀ ਲੋਕਾਂ ਲਈ ਪ੍ਰੇਰਨਾ ਸਰੋਤ ਹੈ । ਅਸੀਂ ਇਸ ਭੈਣ ਦੇ ਉੱਜਵਲ ਭਵਿੱਖ ਲਈ ਕਾਮਨਾ ਕਰਦੇ ਹਾਂ।
