ਸਪੋਰਟਸ, 14 ਸਤੰਬਰ 2026: Sher-e-Punjab T20 League 2026: ਅਭਿਸ਼ੇਕ ਸ਼ਰਮਾ ਦੀ ਗੈਰ-ਹਾਜ਼ਰੀ ‘ਚ, ਨਮਨ ਧੀਰ ਦੀ ਕਪਤਾਨੀ ਵਾਲੀ ਅੰਮ੍ਰਿਤਸਰ ਸੁਰਮਾਜ (Amritsar Soormas) ਨੇ ਫਾਈਨਲ ‘ਚ ਲੁਧਿਆਣਾ ਲਾਇਨਜ਼ ਨੂੰ ਹਰਾ ਕੇ ਸ਼ੇਰ-ਏ-ਪੰਜਾਬ ਟੀ-20 ਲੀਗ 2026 ਦਾ ਪਹਿਲਾ ਖ਼ਿਤਾਬ ਜਿੱਤਿਆ ਹੈ। ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ, ਲੁਧਿਆਣਾ 20 ਓਵਰਾਂ ‘ਚ ਸਿਰਫ਼ 142 ਦੌੜਾਂ ‘ਤੇ ਢੇਰ ਹੋ ਗਿਆ। ਇਸਦੇ ਜਵਾਬ ‘ਚ ਅੰਮ੍ਰਿਤਸਰ ਨੇ 16.4 ਓਵਰਾਂ ‘ਚ ਸਿਰਫ਼ 2 ਵਿਕਟਾਂ ਗੁਆ ਕੇ 8 ਵਿਕਟਾਂ ਨਾਲ ਮੈਚ ਜਿੱਤ ਲਿਆ। ਫਾਈਨਲ ਤੋਂ ਬਾਅਦ, ਚੈਂਪੀਅਨ ਕਪਤਾਨ ਨਮਨ ਧੀਰ ਚੋਟੀ ਦੇ 5 ਬੱਲੇਬਾਜ਼ਾਂ ਦੀ ਸੂਚੀ ‘ਚ ਪਹਿਲੇ ਸਥਾਨ ‘ਤੇ ਰਿਹਾ।
ਮੁੰਬਈ ਇੰਡੀਅਨਜ਼ ਦੇ ਸਟਾਰ ਖਿਡਾਰੀ ਨਮਨ ਧੀਰ ਨੇ ਪੂਰੇ ਟੂਰਨਾਮੈਂਟ ਦੌਰਾਨ 10 ਮੈਚ ਖੇਡੇ, 10 ਪਾਰੀਆਂ ‘ਚ 655 ਦੌੜਾਂ ਬਣਾਈਆਂ। ਉਸਨੇ ਪੂਰੀ ਲੀਗ ‘ਚ ਸਭ ਤੋਂ ਵੱਧ ਦੌੜਾਂ, 49 ਛੱਕੇ ਅਤੇ 49 ਚੌਕੇ ਵੀ ਲਗਾਏ। ਪ੍ਰਭਸਿਮਰਨ ਸਿੰਘ 575 ਦੌੜਾਂ ਨਾਲ ਇਸ ਸੂਚੀ ‘ਚ ਦੂਜੇ ਸਥਾਨ ‘ਤੇ ਰਿਹਾ। ਅਨਮੋਲਪ੍ਰੀਤ ਸਿੰਘ 497 ਦੌੜਾਂ ਨਾਲ ਤੀਜੇ ਸਥਾਨ ‘ਤੇ ਰਿਹਾ।
ਗੇਂਦਬਾਜ਼ਾਂ ‘ਚ ਸਾਹਿਲ ਭਾਸਕਰ ਟਾਪ ਗੇਂਦਬਾਜ਼
ਇਸਦੇ ਨਾਲ ਹੀ ਸਾਹਿਲ ਭਾਸਕਰ ਗੇਂਦਬਾਜ਼ਾਂ ‘ਚ 20 ਵਿਕਟਾਂ ਨਾਲ ਸਿਖਰ ‘ਤੇ ਰਿਹਾ। ਦੂਜੇ ਨੰਬਰ ‘ਤੇ 14 ਵਿਕਟਾਂ ਨਾਲ ਕਾਰਤਿਕ ਚੱਢਾ, ਤੀਜੇ ਸਥਾਨ ‘ਤੇ 12 ਵਿਕਟਾਂ ਨਾਲ ਆਕਾਸ਼ ਪਾਂਡੇ, 12 ਵਿਕਟਾਂ ਨਾਲ ਚੌਥੇ ਸਥਾਨ ‘ਤੇ ਸੁਮੀਤ ਸ਼ਰਮਾ ਅਤੇ ਰਘੁ ਸ਼ਰਮਾ 11 ਵਿਕਟਾਂ ਨਾਲ ਪੰਜਵੇਂ ਸਥਾਨ ‘ਤੇ ਰਿਹਾ।
ਫਾਈਨਲ ‘ਚ 143 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ, ਅੰਮ੍ਰਿਤਸਰ ਸੁਰਮਾਜ ਦੇ ਓਪਨਰ ਸਾਜ ਧਵਨ ਨੇ ਅਰਧ ਸੈਂਕੜਾ ਲਗਾਇਆ। ਉਨ੍ਹਾਂ ਨੇ 53 ਗੇਂਦਾਂ ‘ਚ ਨਾਬਾਦ 63 ਦੌੜਾਂ ਬਣਾਈਆਂ, ਜਦੋਂ ਕਿ ਕਪਤਾਨ ਨਮਨ ਧੀਰ ਨੇ 12 ਗੇਂਦਾਂ ‘ਚ 29 ਦੌੜਾਂ ਦਾ ਯੋਗਦਾਨ ਪਾਇਆ। ਰਾਹੁਲ ਕੁਮਾਰ 30 ਗੇਂਦਾਂ ‘ਚ 42 ਦੌੜਾਂ ਬਣਾ ਕੇ ਨਾਬਾਦ ਰਿਹਾ ਅਤੇ ਧਵਨ ਦੇ ਨਾਲ ਮਿਲ ਕੇ ਟੀਮ ਨੂੰ ਆਸਾਨ ਜਿੱਤ ਅਤੇ ਖਿਤਾਬ ਦਿਵਾਇਆ।
ਅਭਿਸ਼ੇਕ ਸ਼ਰਮਾ ਵੀ ਚੋਟੀ ਦੇ 10 ‘ਚੋਂ ਬਾਹਰ
ਭਾਰਤੀ ਕ੍ਰਿਕਟ ਟੀਮ ਲਈ ਆਪਣੇ ਰਾਸ਼ਟਰੀ ਫਰਜ਼ਾਂ ਕਾਰਨ ਅਭਿਸ਼ੇਕ ਸ਼ਰਮਾ ਲੀਗ ‘ਚ ਸਿਰਫ਼ ਪੰਜ ਮੈਚ ਹੀ ਖੇਡ ਸਕਿਆ। ਉਸਦੀ ਗੈਰਹਾਜ਼ਰੀ ਦੇ ਬਾਵਜੂਦ, ਉਸਦੀ ਟੀਮ ਜੇਤੂ ਰਹੀ। ਅਭਿਸ਼ੇਕ ਨਾ ਸਿਰਫ਼ ਅਫਗਾਨਿਸਤਾਨ ਵਿਰੁੱਧ ਪਹਿਲੇ ਟੀ-20 ‘ਚ ਚਮਕਿਆ, ਸਗੋਂ ਇਸ ਲੀਗ ‘ਚ ਪੰਜ ਪਾਰੀਆਂ ‘ਚ 242 ਦੌੜਾਂ ਵੀ ਬਣਾਈਆਂ। ਉਹ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਿਆਂ ਦੀ ਸੂਚੀ ‘ਚ 13ਵੇਂ ਸਥਾਨ ‘ਤੇ ਰਿਹਾ।
Read More: ਭਾਰਤੀ ਮਹਿਲਾ ਟੀਮ ਦਾ ਮੋਹਸਿਨ ਨਕਵੀ ਤੋਂ ਟਰਾਫੀ ਲੈਣ ਤੋਂ ਇਨਕਾਰ, BCCI ਨੇ ਦਿੱਤੇ ਸੀ ਦੋ ਵਿਕਲਪ
