ਮਹਾਰਾਸ਼ਟਰ, 03 ਜੁਲਾਈ 2026: ਮਹਾਰਾਸ਼ਟਰ ਸਰਕਾਰ ਨੇ ਸਕੂਲਾਂ ਦੇ ਨੇੜੇ ਐਨਰਜੀ ਡਰਿੰਕ ਸਟਿੰਗ ਦੀ ਵਿਕਰੀ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਫੂਡ ਐਂਡ ਡਰੱਗ ਮੰਤਰੀ ਨਰਹਰੀ ਜ਼ੀਰਵਾਲ ਨੇ ਮਹਾਰਾਸ਼ਟਰ ਵਿਧਾਨ ਸਭਾ ‘ਚ ਇਹ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਸਕੂਲਾਂ ਦੇ 500 ਮੀਟਰ ਦੇ ਦਾਇਰੇ ‘ਚ ਇਸ ਡਰਿੰਕ ਦੀ ਵਿਕਰੀ ‘ਤੇ ਪਾਬੰਦੀ ਹੋਵੇਗੀ। ਇਹ ਐਲਾਨ ਮਹਾਰਾਸ਼ਟਰ ਦੇ ਮਾਨਸੂਨ ਸੈਸ਼ਨ ਦੌਰਾਨ ਕੀਤਾ ਗਿਆ ਸੀ।
ਸਰਕਾਰ ਨੇ ਕਥਿਤ ਤੌਰ ‘ਤੇ ਇਹ ਫੈਸਲਾ ਇਸ ਡਰਿੰਕ ‘ਚ ਕੈਫੀਨ ਦੀ ਮਾਤਰਾ ਆਮ ਨਾਲੋਂ ਵੱਧ ਹੋਣ ਕਾਰਨ ਲਿਆ ਹੈ। ਹਾਲ ਹੀ ‘ਚ, ਫੂਡ ਰੈਗੂਲੇਟਰ FSSAI ਨੇ ਡਰਿੰਕ ਦੇ ਨਿਰਮਾਤਾ ਸਮੇਤ ਛੇ ਕੰਪਨੀਆਂ ਨੂੰ ਗਲਤ ਬ੍ਰਾਂਡਿੰਗ ਲਈ ਨੋਟਿਸ ਜਾਰੀ ਕੀਤੇ ਹਨ।
FSSAI ਨੇ ਛੇ ਐਨਰਜੀ ਡਰਿੰਕ ਬ੍ਰਾਂਡਾਂ – ਰੈੱਡ ਬੁੱਲ ਐਨਰਜੀ ਡਰਿੰਕ, ਪੈਪਸੀਕੋ ਦਾ ਐਡਰੇਨਾਲੀਨ ਰਸ਼ ਐਨਰਜੀ ਡਰਿੰਕ, ਰਿਲਾਇੰਸ ਕੰਜ਼ਿਊਮਰ ਪ੍ਰੋਡਕਟਸ ਦੇ ਕੈਂਪਾ ਐਨਰਜੀ ਡਰਿੰਕ ਗੋਲਡ ਬੂਸਟ, ਸਟਿੰਗ ਐਨਰਜੀ ਡਰਿੰਕ, ਹੈਲ ਐਨਰਜੀ, ਅਤੇ ਕੋਕਾ-ਕੋਲਾ-ਸਮਰਥਿਤ ਮੌਨਸਟਰ ਐਨਰਜੀ – ਨੂੰ ਗਲਤ ਬ੍ਰਾਂਡਿੰਗ ਅਤੇ ਗੁੰਮਰਾਹਕੁੰਨ ਦਾਅਵਿਆਂ ਲਈ ਨੋਟਿਸ ਜਾਰੀ ਕੀਤੇ ਹਨ।
ਸ਼੍ਰੀਗੋਂਦਾ-ਨਗਰ ਵਿਧਾਨ ਸਭਾ ਹਲਕੇ ਤੋਂ ਭਾਜਪਾ ਵਿਧਾਇਕ ਵਿਕਰਮ ਪਾਚਪੁਤੇ ਨੇ ਵਿਧਾਨ ਸਭਾ ‘ਚ ਸਟਿੰਗ ਐਨਰਜੀ ਡਰਿੰਕ ਬਾਰੇ ਗੰਭੀਰ ਸਵਾਲ ਉਠਾਏ। ਉਨ੍ਹਾਂ ਕਿਹਾ ਕਿ ਇਸ ਡਰਿੰਕ ਦਾ ਬੱਚਿਆਂ ਦੀ ਸਿਹਤ ‘ਤੇ ਮਾੜਾ ਪ੍ਰਭਾਵ ਪੈ ਰਿਹਾ ਹੈ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਸਟਿੰਗ ਬੋਤਲ ਖੁਦ ਕਹਿੰਦੀ ਹੈ ਕਿ ਇਹ ਛੋਟੇ ਬੱਚਿਆਂ ਅਤੇ ਗਰਭਵਤੀ ਔਰਤਾਂ ਲਈ ਢੁਕਵੀਂ ਨਹੀਂ ਹੈ, ਫਿਰ ਵੀ ਇਹ ਬੱਚਿਆਂ ਨੂੰ ਵੇਚੀ ਜਾ ਰਹੀ ਹੈ। ਵਿਕਰਮ ਪਾਚਪੁਤੇ ਨੇ ਦਾਅਵਾ ਕੀਤਾ ਕਿ ਸਟਿੰਗ ਐਨਰਜੀ ਡਰਿੰਕ ਸ਼ਰਾਬ ਨਾਲੋਂ ਜ਼ਿਆਦਾ ਨੁਕਸਾਨਦੇਹ ਹੈ, ਅਤੇ ਇਸ ਲਈ ਇਸਦੀ ਵਿਕਰੀ ‘ਤੇ ਸਖ਼ਤ ਨਿਯੰਤਰਣ ਜ਼ਰੂਰੀ ਹੈ।
ਇਸ ਦਾ ਜਵਾਬ ਦਿੰਦੇ ਹੋਏ, ਫੂਡ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ ਮੰਤਰੀ ਨਰਹਰੀ ਝਿਰਵਾਲ ਨੇ ਮੰਨਿਆ ਕਿ ਸਟਿੰਗ ਸਕੂਲਾਂ ਦੇ ਆਲੇ-ਦੁਆਲੇ ਵੇਚਿਆ ਜਾ ਰਿਹਾ ਹੈ। ਉਨ੍ਹਾਂ ਵਿਧਾਨ ਸਭਾ ‘ਚ ਐਲਾਨ ਕੀਤਾ ਕਿ ਸਕੂਲਾਂ ਦੇ 500 ਮੀਟਰ ਦੇ ਅੰਦਰ ਨਸ਼ੀਲੇ ਪਦਾਰਥਾਂ ਦੇ ਨਾਲ-ਨਾਲ ਸਟਿੰਗ ਐਨਰਜੀ ਡਰਿੰਕ ਦੀ ਵਿਕਰੀ ‘ਤੇ ਪਾਬੰਦੀ ਹੋਵੇਗੀ।
Read More: ਅੰਤਰਰਾਸ਼ਟਰੀ ਗੀਤਾ ਮਹੋਤਸਵ ਜਾਪਾਨ ਭਾਰਤ-ਜਾਪਾਨ ਸੱਭਿਆਚਾਰਕ ਸਹਿਯੋਗ ਨੂੰ ਹੋਰ ਮਜ਼ਬੂਤ ਕਰੇਗਾ: CM ਨਾਇਬ ਸੈਣੀ
