ਕਰਨਾਟਕ, 28 ਮਈ 2026: ਕਰਨਾਟਕ ਦੇ ਮੁੱਖ ਮੰਤਰੀ ਸਿੱਧਰਮਈਆ ਅੱਜ ਦੁਪਹਿਰ ਅਸਤੀਫ਼ਾ ਦੇਣਗੇ। ਸਿੱਧਰਮਈਆ ਨੇ ਬੈਂਗਲੁਰੂ ਸਥਿਤ ਆਪਣੇ ਘਰ ‘ਤੇ ਆਪਣੇ ਮੰਤਰੀਆਂ ਨਾਲ ਨਾਸ਼ਤੇ ਦੀ ਬੈਠਕ ਬੁਲਾਈ ਸੀ, ਜਿੱਥੇ ਉਨ੍ਹਾਂ ਨੇ ਸਾਰੇ ਮੰਤਰੀਆਂ ਨੂੰ ਆਪਣੇ ਫੈਸਲੇ ਬਾਰੇ ਜਾਣਕਾਰੀ ਦਿੱਤੀ।
ਉਪ ਮੁੱਖ ਮੰਤਰੀ ਡੀਕੇ ਸ਼ਿਵਕੁਮਾਰ ਵੀ ਬੈਠਕ ‘ਚ ਸ਼ਾਮਲ ਹੋਏ। ਸ਼ਿਵਕੁਮਾਰ ਨੇ ਸਿੱਧਰਮਈਆ ਦੇ ਪੈਰ ਛੂਹੇ, ਜਿਸ ਤੋਂ ਬਾਅਦ ਮੁੱਖ ਮੰਤਰੀ ਨੇ ਉਨ੍ਹਾਂ ਨੂੰ ਗਲੇ ਲਗਾਇਆ। ਕਰਨਾਟਕ ਸਰਕਾਰ ਦੇ ਮੰਤਰੀ ਐੱਚਕੇ ਪਾਟਿਲ ਨੇ ਕਿਹਾ ਕਿ ਬੈਠਕ ਨੇ ਅਗਲੇ ਮੁੱਖ ਮੰਤਰੀ ਵਜੋਂ ਡੀਕੇ ਸ਼ਿਵਕੁਮਾਰ ਦੇ ਨਾਮ ਨੂੰ ਮਨਜ਼ੂਰੀ ਦੇ ਦਿੱਤੀ।
ਸਿੱਧਰਮਈਆ ਨੇ ਰਾਜਪਾਲ ਥਾਵਰਚੰਦ ਗਹਿਲੋਤ ਨਾਲ ਮੁਲਾਕਾਤ ਦੀ ਬੇਨਤੀ ਕੀਤੀ ਸੀ। ਹਾਲਾਂਕਿ, ਰਾਜਪਾਲ ਪਰਿਵਾਰਕ ਕਾਰਨਾਂ ਕਰਕੇ ਬੰਗਲੁਰੂ ਤੋਂ ਬਾਹਰ ਹਨ। ਅਜਿਹੀ ਸਥਿਤੀ ‘ਚ, ਸਿੱਧਰਮਈਆ ਆਪਣਾ ਅਸਤੀਫ਼ਾ ਰਾਜਪਾਲ ਦਫ਼ਤਰ ਨੂੰ ਸੌਂਪ ਸਕਦੇ ਹਨ।
ਨਿਯਮਾਂ ਮੁਤਾਬਕ, ਭਾਵੇਂ ਰਾਜਪਾਲ ਕਰਨਾਟਕ ‘ਚ ਮੌਜੂਦ ਨਾ ਹੋਵੇ, ਮੁੱਖ ਮੰਤਰੀ ਰਾਜ ਭਵਨ ਦੇ ਅਧਿਕਾਰੀਆਂ ਨੂੰ ਈਮੇਲ ਰਾਹੀਂ ਜਾਂ ਵਿਅਕਤੀਗਤ ਤੌਰ ‘ਤੇ ਲਿਖਤੀ ਅਸਤੀਫ਼ਾ ਦੇ ਸਕਦੇ ਹਨ। ਫਿਰ ਰਾਜਪਾਲ ਇਸਨੂੰ ਸਵੀਕਾਰ ਕਰਨਗੇ। ਮੌਜੂਦਾ ਮੁੱਖ ਮੰਤਰੀ ਅਸਤੀਫ਼ਾ ਸਵੀਕਾਰ ਹੋਣ ਤੱਕ ਅਹੁਦੇ ‘ਤੇ ਬਣੇ ਰਹਿਣਗੇ। 35 ਮੰਤਰੀਆਂ ‘ਚੋਂ ਲਗਭਗ 25 ਨੂੰ ਹਟਾਇਆ ਜਾ ਸਕਦਾ ਹੈ। ਦੋ ਉਪ ਮੁੱਖ ਮੰਤਰੀ ਸੰਭਵ ਹਨ। ਇੱਕ ਅਹੁਦਾ ਕਿਸੇ ਦਲਿਤ ਆਗੂ ਨੂੰ ਜਾ ਸਕਦਾ ਹੈ, ਅਤੇ ਦੂਜਾ ਲਿੰਗਾਇਤ ਜਾਂ ਓਬੀਸੀ ਆਗੂ ਨੂੰ ਦਿੱਤਾ ਜਾ ਸਕਦਾ ਹੈ।
26 ਮਈ ਨੂੰ ਸਿੱਧਰਮਈਆ ਅਤੇ ਡੀਕੇ ਸ਼ਿਵਕੁਮਾਰ ਦਿੱਲੀ ਪਹੁੰਚੇ। ਦੋਵਾਂ ਆਗੂਆਂ ਨੇ ਮੰਗਲਵਾਰ ਨੂੰ ਦਿੱਲੀ ‘ਚ ਕਾਂਗਰਸ ਪ੍ਰਧਾਨ ਮੱਲਿਕਾਰਜੁਨ ਖੜਗੇ ਅਤੇ ਸੰਸਦ ਮੈਂਬਰ ਰਾਹੁਲ ਗਾਂਧੀ ਨਾਲ ਛੇ ਘੰਟੇ ਦੀ ਬੈਠਕ ਕੀਤੀ। ਕਰਨਾਟਕ ‘ਚ ਮੁੱਖ ਮੰਤਰੀ ਬਦਲਣ ਬਾਰੇ ਚਰਚਾ 2023 ਤੋਂ ਚੱਲ ਰਹੀ ਹੈ।
ਕਰਨਾਟਕ ‘ਚ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਲੈ ਕੇ ਚੱਲ ਰਹੇ ਸਸਪੈਂਸ ਦੇ ਵਿਚਕਾਰ, ਕਰਨਾਟਕ ਕਾਂਗਰਸ ਵਰਕਰ ਉਮਾ ਸ਼ੰਕਰ ਨੇ ਮੀਡੀਆ ਨੂੰ ਦੱਸਿਆ, “ਡੀਕੇ ਸ਼ਿਵਕੁਮਾਰ ਕੱਲ੍ਹ ਮੁੱਖ ਮੰਤਰੀ ਵਜੋਂ ਸਹੁੰ ਚੁੱਕਣਗੇ, ਅਤੇ ਅਸੀਂ ਇਸਨੂੰ ਵੱਡੇ ਪੱਧਰ ‘ਤੇ ਮਨਾਵਾਂਗੇ।
Read More: CM Vijay Delhi Visit: ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਰਾਹੁਲ ਗਾਂਧੀ ਤੇ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕਰਨਗੇ
