ਅਰੁਣਾਚਲ ਪ੍ਰਦੇਸ਼, 25 ਨਵੰਬਰ 2025: ਅਰੁਣਾਚਲ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਪੇਮਾ ਖਾਂਡੂ ਨੇ ਮੰਗਲਵਾਰ ਨੂੰ ਚੀਨੀ ਇਮੀਗ੍ਰੇਸ਼ਨ ਅਧਿਕਾਰੀਆਂ ਦੀ ਨਿੰਦਾ ਕੀਤੀ। ਖਾਂਡੂ ਨੇ ਸੂਬੇ ਦੀ ਇੱਕ ਔਰਤ ਨਾਲ ਕੀਤੇ ਵਿਵਹਾਰ ਨੂੰ ਅਸਵੀਕਾਰਨਯੋਗ ਦੱਸਿਆ। ਅਧਿਕਾਰੀਆਂ ਵੱਲੋਂ ਕਥਿਤ ਤੌਰ ‘ਤੇ ਉਸਦੇ ਭਾਰਤੀ ਪਾਸਪੋਰਟ ਨੂੰ ਮਾਨਤਾ ਦੇਣ ਤੋਂ ਇਨਕਾਰ ਕਰਨ ਤੋਂ ਬਾਅਦ ਔਰਤ ਨੂੰ ਸ਼ੰਘਾਈ ਪੁਡੋਂਗ ਹਵਾਈ ਅੱਡੇ ‘ਤੇ ਲਗਭੱਗ 18 ਘੰਟਿਆਂ ਲਈ ਹਿਰਾਸਤ ‘ਚ ਰੱਖਿਆ ਗਿਆ।
ਮੁੱਖ ਮੰਤਰੀ ਖਾਂਡੂ ਨੇ ਕਿਹਾ ਕਿ ਉਹ ਯੂਕੇ ‘ਚ ਰਹਿਣ ਵਾਲੀ ਇੱਕ ਭਾਰਤੀ ਨਾਗਰਿਕ ਪੇਮਾ ਵਾਂਗਜੋਮ ਥੋਂਗਡੋਕ ਨਾਲ ਹੋਈ ਘਟਨਾ ਤੋਂ ਹੈਰਾਨ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਚੀਨੀ ਅਧਿਕਾਰੀਆਂ ਦਾ ਵਿਵਹਾਰ “ਅਪਮਾਨਜਨਕ ਅਤੇ ਨਸਲੀ ਟਿੱਪਣੀਆਂ” ਦੇ ਬਰਾਬਰ ਹੈ।
ਐਕਸ ‘ਤੇ ਇੱਕ ਪੋਸਟ ‘ਚ ਮੁੱਖ ਮੰਤਰੀ ਨੇ ਕਿਹਾ ਕਿ “ਵੈਧ ਭਾਰਤੀ ਪਾਸਪੋਰਟ ਹੋਣ ਦੇ ਬਾਵਜੂਦ ਉਸ ਨਾਲ ਇਹ ਵਿਵਹਾਰ ਗਲਤ ਹੈ।” ਉਨ੍ਹਾਂ ਨੇ ਕਿਹਾ, “ਅਰੁਣਾਚਲ ਪ੍ਰਦੇਸ਼ ਭਾਰਤ ਦਾ ਅਨਿੱਖੜਵਾਂ ਅੰਗ ਹੈ ਅਤੇ ਹਮੇਸ਼ਾ ਰਹੇਗਾ। ਇਸ ਦੇ ਉਲਟ ਕੋਈ ਵੀ ਦੋਸ਼ ਬੇਬੁਨਿਆਦ ਅਤੇ ਇਤਰਾਜ਼ਯੋਗ ਹਨ।”
ਇਸ ਘਟਨਾ ਨੂੰ ਅੰਤਰਰਾਸ਼ਟਰੀ ਨਿਯਮਾਂ ਦੀ ਉਲੰਘਣਾ ਅਤੇ ਭਾਰਤੀ ਨਾਗਰਿਕਾਂ ਦੇ ਸਨਮਾਨ ਦਾ ਅਪਮਾਨ ਦੱਸਦੇ ਹੋਏ, ਖਾਂਡੂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਵਿਸ਼ਵਾਸ ਹੈ ਕਿ ਵਿਦੇਸ਼ ਮੰਤਰਾਲਾ ਇਸ ਮਾਮਲੇ ਨੂੰ ਤੁਰੰਤ ਚੁੱਕੇਗਾ ਤਾਂ ਜੋ ਅਜਿਹੀਆਂ ਘਟਨਾਵਾਂ ਦੁਬਾਰਾ ਨਾ ਵਾਪਰਨ। ਪੱਛਮੀ ਕਾਮੇਂਗ ਜ਼ਿਲ੍ਹੇ ਦੇ ਰੂਪਾ ਦੀ ਰਹਿਣ ਵਾਲੀ ਥੋਂਗਡੋਕ ਇਸ ਸਮੇਂ ਯੂਕੇ ‘ਚ ਰਹਿੰਦੀ ਹੈ। 21 ਨਵੰਬਰ ਨੂੰ ਥੋਂਗਡੋਕ ਲੰਡਨ ਤੋਂ ਜਾਪਾਨ ਜਾ ਰਹੀ ਸੀ ਜਦੋਂ ਉਸਦਾ ਤਿੰਨ ਘੰਟੇ ਦਾ ਸਫ਼ਰ ਇੱਕ ਲੰਬੇ ਅਤੇ ਟਕਰਾਅ ‘ਚ ਬਦਲ ਗਿਆ।
ਥੋਂਗਡੋਕ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਹੋਰ ਸੀਨੀਅਰ ਅਧਿਕਾਰੀਆਂ ਨੂੰ ਪੱਤਰ ਲਿਖ ਕੇ ਇਸ ਘਟਨਾ ਨੂੰ ਭਾਰਤ ਦੀ ਪ੍ਰਭੂਸੱਤਾ ਅਤੇ ਅਰੁਣਾਚਲ ਪ੍ਰਦੇਸ਼ ਦੇ ਲੋਕਾਂ ਦਾ ਸਿੱਧਾ ਅਪਮਾਨ ਦੱਸਿਆ। ਉਨ੍ਹਾਂ ਨੇ ਭਾਰਤ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਹ ਇਸ ਮਾਮਲੇ ਨੂੰ ਬੀਜਿੰਗ ਕੋਲ ਜ਼ੋਰਦਾਰ ਢੰਗ ਨਾਲ ਉਠਾਏ, ਜਵਾਬਦੇਹੀ ਦੀ ਮੰਗ ਕਰੇ, ਸ਼ਾਮਲ ਲੋਕਾਂ ਵਿਰੁੱਧ ਅਨੁਸ਼ਾਸਨੀ ਕਾਰਵਾਈ ਕਰੇ ਅਤੇ ਪਰੇਸ਼ਾਨੀ ਲਈ ਮੁਆਵਜ਼ਾ ਦਿੱਤਾ ਜਾਵੇ।
Read More: ਚੀਨੀ ਹਵਾਈ ਅੱਡੇ ‘ਤੇ ਭਾਰਤੀ ਮਹਿਲਾ ਨਾਗਰਿਕ ਦੇ ਪਾਸਪੋਰਟ ਨੂੰ ਦੱਸਿਆ ਅਵੈਧ, ਕਿਹਾ-“ਅਰੁਣਾਚਲ ਭਾਰਤ ਦਾ ਹਿੱਸਾ ਨਹੀਂ”
