ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੋਹਾਲੀ), 08 ਅਕਤੂਬਰ 2025: ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (PSPCL) ਨੇ ਖਪਤਕਾਰਾਂ ਲਈ ਬਿਜਲੀ ਸਪਲਾਈ ਸ਼ਿਕਾਇਤ ਨਿਵਾਰਣ ਵਿਧੀ ਨੂੰ ਮਜ਼ਬੂਤ ਕਰਨ ਲਈ ਅੱਜ ਮੋਹਾਲੀ ‘ਚ ਇੱਕ ਨਵੇਂ ਕਾਲ ਸੈਂਟਰ ਦੀ ਸ਼ੁਰੂਆਤ ਕੀਤੀ ਹੈ। ਮੋਹਾਲੀ ਤੋਂ ਵਿਧਾਇਕ ਕੁਲਵੰਤ ਸਿੰਘ ਨੇ ਇਸ ਸੈਂਟਰ ਦਾ ਉਦਘਾਟਨ ਕੀਤਾ | ਇਸ ਨੂੰ ਡਾ. ਆਈ.ਟੀ.ਐਮ. ਪ੍ਰਾਈਵੇਟ ਲਿਮਟਿਡ ਦੁਆਰਾ ਚਲਾਇਆ ਜਾ ਰਿਹਾ ਹੈ। ਇਹ ਪਹਿਲਕਦਮੀ ਪੰਜਾਬ ਸਰਕਾਰ ਵੱਲੋਂ ਸ਼ੁਰੂ ਕੀਤੀ ਬਿਜਲੀ ਕੱਟ ਮੁਕਤ ਪੰਜਾਬ ਯੋਜਨਾ ਦਾ ਹਿੱਸਾ ਹੈ।
ਮੋਹਾਲੀ ਕਾਲ ਸੈਂਟਰ, ਜਿਸ ‘ਚ ਪੀਕ ਮਹੀਨਿਆਂ ਦੌਰਾਨ 450 ਏਜੰਟਾਂ ਦੀ ਸਮਰੱਥਾ ਹੈ, ਮੌਜੂਦਾ ਲੁਧਿਆਣਾ ਸੈਂਟਰ ਦਾ ਪੂਰਕ ਹੋਵੇਗਾ ਅਤੇ ਸੂਬੇ ਦੀ ਸ਼ਿਕਾਇਤ ਨਿਵਾਰਣ ਪ੍ਰਣਾਲੀ ਨੂੰ ਮਹੱਤਵਪੂਰਨ ਤੌਰ ‘ਤੇ ਹੋਰ ਮਜ਼ਬੂਤ ਕਰੇਗਾ। ਖਪਤਕਾਰ 1912 ਡਾਇਲ ਕਰਕੇ, ਮੋਬਾਈਲ ਐਪ, ਐਸ.ਐਮ.ਐਸ. ਜਾਂ ਮਿਸਡ ਕਾਲ ਸੇਵਾ ਰਾਹੀਂ ਬਿਜਲੀ ਨਾਲ ਸਬੰਧਤ ਸ਼ਿਕਾਇਤਾਂ ਦਰਜ ਕਰਵਾ ਸਕਦੇ ਹਨ। ਪੀਕ ਪੀਰੀਅਡ ਦੌਰਾਨ, ਕੇਂਦਰ ਤੇ ਪ੍ਰਤੀ ਦਿਨ 70,000 ਕਾਲਾਂ ਦੇ ਨਿਪਟਾਰੇ ਦੀ ਉਮੀਦ ਹੈ, ਜਿਸ ਨਾਲ ਤੇਜ਼ ਜਵਾਬ ਅਤੇ ਖਪਤਕਾਰਾਂ ਦੀ ਸੰਤੁਸ਼ਟੀ ਯਕੀਨੀ ਬਣਾਈ ਜਾ ਸਕੇਗੀ।
ਇਸ ਮੌਕੇ ਵਿਧਾਇਕ ਕੁਲਵੰਤ ਸਿੰਘ ਨੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਪਿਛਲਾ ਲੁਧਿਆਣਾ ਕਾਲ ਸੈਂਟਰ ਸੂਬੇ ਦੀ ਮੰਗ ਨੂੰ ਪੂਰਾ ਕਰਨ ਲਈ ਨਾਕਾਫ਼ੀ ਸੀ। ਮੋਹਾਲੀ ਸੈਂਟਰ, ਹੋਰ ਆਪਰੇਟਰਾਂ ਦੀ ਪੂਰਤੀ, ਸ਼ਿਕਾਇਤ ਨਿਪਟਾਰੇ ਨੂੰ ਕਾਫ਼ੀ ਹੁਲਾਰਾ ਦੇਵੇਗੀ ਅਤੇ ਇਹ ਯਕੀਨੀ ਬਣਾਏਗੀ ਕਿ ਬਿਜਲੀ ਸਪਲਾਈ ਸੰਬੰਧੀ ਜਨਤਕ ਮੁਸ਼ਿਕਲਾਂ ਨੂੰ ਤੁਰੰਤ ਹੱਲ ਕੀਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਨਵੀਂ ਸਹੂਲਤ 24×7 ਕੰਮ ਕਰੇਗੀ ਅਤੇ 5,000 ਕਰੋੜ ਰੁਪਏ ਦੀ ‘ਆਊਟੇਜ ਰਿਡਕਸ਼ਨ ਯੋਜਨਾ’ ਦਾ ਇੱਕ ਮੁੱਖ ਹਿੱਸਾ ਹੈ ਜਿਸਦਾ ਉਦੇਸ਼ ਪੰਜਾਬ ਭਰ ‘ਚ ਬਿਜਲੀ ਸਪਲਾਈ ਦੀਆਂ ਰੁਕਾਵਟਾਂ ਨੂੰ ਘਟਾਉਣਾ ਅਤੇ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨਾ ਹੈ।
ਮੁੱਖ ਇੰਜੀਨੀਅਰ (ਆਈ.ਟੀ.), ਪੀ.ਐਸ.ਪੀ.ਸੀ.ਐਲ., ਸੁਨੀਲ ਬਾਂਸਲ ਨੇ ਕਿਹਾ ਕਿ ਪੰਜਾਬ ਦੇ ਕਿਸੇ ਵੀ ਵਰਗ ਜਾਂ ਖੇਤਰ ਦੇ ਖਪਤਕਾਰ ਹੁਣ 1912 ਡਾਇਲ ਕਰਕੇ, ਮੋਬਾਈਲ ਐਪ, ਐਸ.ਐਮ.ਐਸ. ਅਤੇ ਮਿਸਡ ਕਾਲ ਸੇਵਾ ਸਮੇਤ ਕਈ ਚੈਨਲਾਂ ਰਾਹੀਂ ਆਪਣੀਆਂ ਬਿਜਲੀ ਨਾਲ ਸਬੰਧਤ ਸ਼ਿਕਾਇਤਾਂ ਆਸਾਨੀ ਨਾਲ ਦਰਜ ਕਰਵਾ ਸਕਦੇ ਹਨ। ਇਸ ਨਾਲ ਪੰਜਾਬ ਭਰ ਦੇ ਸਾਰੇ ਖਪਤਕਾਰਾਂ ਲਈ ਸਮੇਂ ਸਿਰ ਸ਼ਿਕਾਇਤ ਨਿਪਟਾਰੇ ਅਤੇ ਨਿਰਵਿਘਨ ਬਿਜਲੀ ਸਪਲਾਈ ਨੂੰ ਯਕੀਨੀ ਬਣਾਇਆ ਜਾ ਸਕੇਗਾ।
Read More: ਵਿਧਾਇਕ ਕੁਲਵੰਤ ਸਿੰਘ ਵੱਲੋਂ ਸੋਹਾਣਾ ਵਿਖੇ 1.68 ਕਰੋੜ ਰੁਪਏ ਦੀ ਲਾਗਤ ਨਾਲ ਟੋਭੇ ਦੇ ਨਵੀਨੀਕਰਨ ਦਾ ਉਦਘਾਟਨ
