12 ਫਰਵਰੀ 2025: ਅੰਮ੍ਰਿਤਸਰ ਪੁਲਿਸ (Amritsar Police) ਨੇ ਪੰਜ ਨਸ਼ਾ ਤਸਕਰਾਂ ਨੂੰ ਕਾਬੂ ਕੀਤਾ ਹੈ। ਮੁਲਜ਼ਮਾਂ ਦੇ ਕਬਜ਼ੇ ਵਿੱਚੋਂ ਢਾਈ ਕਿੱਲੋ ਹੈਰੋਇਨ, ਇੱਕ ਲੱਖ ਪੰਜ ਹਜ਼ਾਰ ਰੁਪਏ ਦੀ ਡਰੱਗ ਮਨੀ, ਇੱਕ ਗਲਾਕ ਪਿਸਤੌਲ ਅਤੇ ਇੱਕ ਕਰੂਜ਼ ਕਾਰ ਬਰਾਮਦ ਕੀਤੀ ਗਈ ਹੈ। ਪੁਲਿਸ ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਹੈ ਕਿ ਇਹ ਸਾਰੇ ਮੁਲਜ਼ਮ ਗੁਰਦਾਸਪੁਰ ਅਤੇ ਫਤਿਹਗੜ੍ਹ ਚੂੜੀਆਂ (Gurdaspur and Fatehgarh Churian) ਇਲਾਕੇ ਦੇ ਵਸਨੀਕ ਹਨ। ਸਾਰੇ ਮੁਲਜ਼ਮ ਲੰਬੇ ਸਮੇਂ ਤੋਂ ਨਸ਼ਾ ਤਸਕਰੀ ਦੇ ਧੰਦੇ ਨਾਲ ਜੁੜੇ ਹੋਏ ਸਨ।
ਇਸ ਗਰੋਹ ਦਾ ਮੁੱਖ ਸਰਗਨਾ ਕਰਮਵੀਰ ਸਿੰਘ ਹੈ। ਮੁਲਜ਼ਮ ਕਰਮਵੀਰ ਸਿੰਘ ਅਮਰੀਕਾ ਭੱਜਣ ਦੀ ਯੋਜਨਾ ਬਣਾ ਰਿਹਾ ਸੀ, ਪਰ ਉਸ ਨੂੰ ਰਸਤੇ ਵਿੱਚ ਹੀ ਡਿਪੋਰਟ ਕਰ ਦਿੱਤਾ ਗਿਆ। ਡਿਪੋਰਟ ਹੋਣ ਤੋਂ ਬਾਅਦ ਮੁਲਜ਼ਮ ਨੇ ਆਪਣੇ ਇਲਾਕੇ ਦੇ ਕੁਝ ਲੋਕਾਂ ਨਾਲ ਗੱਠਜੋੜ ਕਰ ਲਿਆ ਜੋ ਕਿ ਫਰਾਂਸ ਵਿੱਚ ਰਹਿ ਰਹੇ ਸਨ ਅਤੇ ਪਾਕਿਸਤਾਨ ਦੇ ਨਸ਼ਾ ਤਸਕਰਾਂ ਨਾਲ ਸੰਪਰਕ ਬਣਾ ਕੇ ਸਰਹੱਦ ਪਾਰੋਂ ਨਸ਼ਾ ਸਪਲਾਈ ਕਰ ਰਹੇ ਸਨ।
ਪੁਲੀਸ ਨੇ ਪਹਿਲਾਂ ਮੁਲਜ਼ਮ ਕਰਮਵੀਰ ਨੂੰ ਗ੍ਰਿਫ਼ਤਾਰ ਕਰਕੇ ਗੁਰਦਾਸਪੁਰ ਦੇ ਸਰਹੱਦੀ ਖੇਤਰ ਪਿੰਡ ਦੋਰਾਂਗਲਾ ਤੋਂ ਖੇਤਾਂ ਵਿੱਚ ਦੱਬੀ ਹੋਈ ਇੱਕ ਕਿੱਲੋ ਹੈਰੋਇਨ ਬਰਾਮਦ ਕੀਤੀ। ਹੋਰ ਮੁਲਜ਼ਮਾਂ ਵਿੱਚ ਕੀਰਤਪਾਲ ਸਿੰਘ ਉਰਫ਼ ਕੀਰਤ, ਸੁਖਦੀਪ ਸਿੰਘ ਉਰਫ਼ ਸੁੱਖ, ਪਿਆਰਾ ਸਿੰਘ ਅਤੇ ਪੰਕਜ ਵਰਮਾ ਉਰਫ਼ ਬਬਲੂ ਸ਼ਾਮਲ ਹਨ। ਕੀਰਤਪਾਲ ਸਿੰਘ ਖ਼ਿਲਾਫ਼ ਪਹਿਲਾਂ ਵੀ ਬਟਾਲਾ ਵਿੱਚ ਅਸਲਾ ਐਕਟ ਤਹਿਤ ਕੇਸ ਦਰਜ ਹੈ। ਮੁਲਜ਼ਮ 12ਵੀਂ ਪਾਸ ਹੈ ਅਤੇ ਉਸ ਦੀ ਉਮਰ 18 ਸਾਲ ਹੈ। ਗਰੋਹ ਦਾ ਸਰਗਨਾ ਕਰਮਵੀਰ ਸਿੰਘ ਹੈ, ਜਿਸ ਦੀ ਉਮਰ 21 ਸਾਲ ਹੈ।
ਖਾਸ ਗੱਲ ਇਹ ਹੈ ਕਿ ਦੋਸ਼ੀ ਪੰਕਜ ਵਰਮਾ ਪੇਸ਼ੇ ਤੋਂ ਜਵੈਲਰ ਹੈ। ਮੁਲਜ਼ਮਾਂ ਖ਼ਿਲਾਫ਼ ਪਿੰਜੌਰ ਥਾਣਾ ਪੰਚਕੂਲਾ, ਹਰਿਆਣਾ ਵਿਖੇ ਲੁੱਟ-ਖੋਹ ਅਤੇ ਅਸਲਾ ਐਕਟ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਪੁਲੀਸ ਨੇ ਮੁਲਜ਼ਮ ਪੰਕਜ ਵਰਮਾ ਕੋਲੋਂ 225 ਗ੍ਰਾਮ ਹੈਰੋਇਨ ਬਰਾਮਦ ਕੀਤੀ ਹੈ।
Read More: Amritsar: ਅੰਮ੍ਰਿਤਸਰ ‘ਚ ਕੋਈ ਗ੍ਰਨੇਡ ਧ.ਮਾ.ਕਾ ਨਹੀਂ ਹੋਇਆ- ਗੁਰਪ੍ਰੀਤ ਸਿੰਘ ਭੁੱਲਰ
