ਦਿੱਲੀ,11 ਸਤੰਬਰ 2026: BRICS Summit 2026: ਈਰਾਨ ਦੇ ਰਾਸ਼ਟਰਪਤੀ ਮਸੂਦ ਪੇਜ਼ੇਸ਼ਕੀਅਨ ਬ੍ਰਿਕਸ ਸੰਮੇਲਨ ‘ਚ ਹਿੱਸਾ ਲੈਣ ਲਈ ਦਿੱਲੀ ਪਹੁੰਚੇ ਹਨ। ਕਿਸੇ ਈਰਾਨੀ ਰਾਸ਼ਟਰਪਤੀ ਦੇ ਭਾਰਤ ਆਉਣ ਨੂੰ ਅੱਠ ਸਾਲ ਹੋ ਗਏ ਹਨ। ਹਸਨ ਰੂਹਾਨੀ 2018 ‘ਚ ਆਏ ਸਨ। ਪੇਜ਼ੇਸ਼ਕੀਅਨ ਅੱਜ ਸ਼ਾਮ ਨੂੰ ਪ੍ਰਧਾਨ ਮੰਤਰੀ ਮੋਦੀ ਨਾਲ ਮੁਲਾਕਾਤ ਕਰਨਗੇ। ਤਹਿਰਾਨ ਤੋਂ ਰਵਾਨਾ ਹੋਣ ਤੋਂ ਪਹਿਲਾਂ, ਰਾਸ਼ਟਰਪਤੀ ਪੇਜ਼ੇਸ਼ਕੀਅਨ ਨੇ ਸੰਯੁਕਤ ਰਾਜ ਅਮਰੀਕਾ ਨੂੰ ਇੱਕ ਸੁਨੇਹਾ ਦਿੱਤਾ।
ਉਨ੍ਹਾਂ ਕਿਹਾ ਕਿ ਬ੍ਰਿਕਸ ਵਿੱਚ ਇੱਕਪਾਸੜਵਾਦ ਦਾ ਮੁਕਾਬਲਾ ਕਰਨ ਅਤੇ ਆਪਣੇ ਮੈਂਬਰਾਂ ‘ਚ ਆਰਥਿਕ ਸਹਿਯੋਗ ਵਧਾਉਣ ਦੀ ਕਾਫ਼ੀ ਸੰਭਾਵਨਾ ਹੈ। ਉਨ੍ਹਾਂ ਆਰਥਿਕ ਲੈਣ-ਦੇਣ ‘ਚ ਡਾਲਰ ‘ਤੇ ਨਿਰਭਰਤਾ ਘਟਾਉਣ ਦੀ ਜ਼ਰੂਰਤ ‘ਤੇ ਵੀ ਜ਼ੋਰ ਦਿੱਤਾ। ਇਸ ਤੋਂ ਇਲਾਵਾ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਪੇਜ਼ੇਸ਼ਕੀਅਨ ਦੀ ਦੁਵੱਲੀ ਮੁਲਾਕਾਤ ਚਾਬਹਾਰ ਬੰਦਰਗਾਹ, ਤੇਲ ਅਤੇ ਗੈਸ, ਵਪਾਰ ਅਤੇ ਸੰਪਰਕ ਦੇ ਨਾਲ-ਨਾਲ ਖਾੜੀ ਸੰਕਟ ‘ਤੇ ਕੇਂਦ੍ਰਿਤ ਹੋਣ ਦੀ ਉਮੀਦ ਹੈ।
ਰਾਸ਼ਟਰਪਤੀ ਪੇਜ਼ੇਸ਼ਕੀਅਨ ਨੇ ਇਸ ਗਲੋਬਲ ਸਮੂਹ ਦੇ 18ਵੇਂ ਸੰਮੇਲਨ ਨੂੰ ਬਹੁਪੱਖੀਵਾਦ ਨੂੰ ਮਜ਼ਬੂਤ ਕਰਨ ਲਈ ਇੱਕ ਮਹੱਤਵਪੂਰਨ ਮੌਕਾ ਦੱਸਿਆ। ਬ੍ਰਿਕਸ ਲਈ ਭਾਰਤ ਰਵਾਨਾ ਹੋਣ ਤੋਂ ਪਹਿਲਾਂ ਸ਼ੁੱਕਰਵਾਰ ਨੂੰ ਤਹਿਰਾਨ ‘ਚ ਬੋਲਦੇ ਹੋਏ, ਪੇਜ਼ੇਸ਼ਕੀਅਨ ਨੇ ਕਿਹਾ ਕਿ ਇਹ ਬੈਠਕ ਮੈਂਬਰ ਦੇਸ਼ਾਂ ‘ਚ ਆਰਥਿਕ, ਵਪਾਰ, ਉਦਯੋਗਿਕ ਅਤੇ ਵਿਗਿਆਨਕ ਸਹਿਯੋਗ ਨੂੰ ਵਧਾਉਣ ਦੇ ਨਾਲ-ਨਾਲ ਅੰਤਰਰਾਸ਼ਟਰੀ ਪ੍ਰਣਾਲੀ ‘ਚ ਬਹੁਪੱਖੀ ਪਹੁੰਚ ਨੂੰ ਮਜ਼ਬੂਤ ਕਰਨ ਦਾ ਇੱਕ ਮਹੱਤਵਪੂਰਨ ਮੌਕਾ ਪ੍ਰਦਾਨ ਕਰੇਗੀ।
Read More: “ਸੜਕ ਤੋਂ ਹਟ ਜਾਓ, ਮਿਸਟਰ ਸਿੰਘ!” ਟਰੰਪ ਪ੍ਰਸ਼ਾਸਨ ਦੇ ਨਸਲਵਾਦੀ ਪੋਸਟਰ ‘ਤੇ ਭਾਰਤੀ ਭਾਈਚਾਰਾ ਭੜਕਿਆ
