ਸਪੋਰਟਸ, 10 ਸਤੰਬਰ 2026: IND W ਬਨਾਮ BAN W: ਮਹਿਲਾ ਏਸ਼ੀਆ ਕੱਪ ਦੇ ਪਹਿਲੇ ਸੈਮੀਫਾਈਨਲ ‘ਚ ਭਾਰਤ ਦਾ ਸਾਹਮਣਾ ਬੰਗਲਾਦੇਸ਼ ਨਾਲ ਹੋਵੇਗਾ। ਇਹ ਮੈਚ ਦੁਬਈ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ‘ਚ ਅੱਜ ਰਾਤ 8 ਵਜੇ ਸ਼ੁਰੂ ਹੋਵੇਗਾ।
ਭਾਰਤੀ ਟੀਮ ਹੁਣ ਤੱਕ ਟੂਰਨਾਮੈਂਟ ‘ਚ ਇੱਕ ਵੀ ਮੈਚ ਨਹੀਂ ਹਾਰੀ ਹੈ। ਭਾਰਤ ਪਿਛਲੇ ਅੱਠ ਮਹਿਲਾ ਟੀ-20 ਅੰਤਰਰਾਸ਼ਟਰੀ ਮੈਚਾਂ ‘ਚ ਬੰਗਲਾਦੇਸ਼ ਵਿਰੁੱਧ ਜੇਤੂ ਰਹੀ ਹੈ। ਬੰਗਲਾਦੇਸ਼ ਨੇ ਆਖਰੀ ਵਾਰ 13 ਜੁਲਾਈ, 2023 ਨੂੰ ਭਾਰਤ ਨੂੰ ਹਰਾਇਆ ਸੀ। ਭਾਰਤ ਨੇ ਹੁਣ ਤੱਕ 24 ਅੰਤਰਰਾਸ਼ਟਰੀ ਮੈਚ ਖੇਡੇ ਹਨ, ਜਿਨ੍ਹਾਂ ‘ਚੋਂ ਭਾਰਤ ਨੇ 21 ਜਿੱਤੇ ਹਨ।
ਭਾਰਤ ਆਪਣੇ ਤਿੰਨੋਂ ਮੈਚ ਜਿੱਤਣ ਤੋਂ ਬਾਅਦ ਛੇ ਅੰਕਾਂ ਨਾਲ ਗਰੁੱਪ ਏ ‘ਚ ਸਿਖਰ ‘ਤੇ ਰਿਹਾ। ਟੀਮ ਨੇ ਥਾਈਲੈਂਡ ਨੂੰ 94 ਦੌੜਾਂ ਨਾਲ, ਹਾਂਗਕਾਂਗ ਨੂੰ 137 ਦੌੜਾਂ ਨਾਲ ਅਤੇ ਪਾਕਿਸਤਾਨ ਨੂੰ ਸੱਤ ਵਿਕਟਾਂ ਨਾਲ ਹਰਾਇਆ।
ਬੰਗਲਾਦੇਸ਼ ਚਾਰ ਅੰਕਾਂ ਨਾਲ ਗਰੁੱਪ ਬੀ ‘ਚ ਦੂਜੇ ਸਥਾਨ ‘ਤੇ ਰਿਹਾ। ਉਨ੍ਹਾਂ ਨੇ ਇੰਡੋਨੇਸ਼ੀਆ ਨੂੰ 71 ਦੌੜਾਂ ਨਾਲ ਅਤੇ ਯੂਏਈ ਨੂੰ 34 ਦੌੜਾਂ ਨਾਲ ਹਰਾਇਆ, ਜਦੋਂ ਕਿ ਸ਼੍ਰੀਲੰਕਾ ਤੋਂ ਚਾਰ ਵਿਕਟਾਂ ਨਾਲ ਹਾਰ ਗਿਆ।
ਸਮ੍ਰਿਤੀ ਤੇ ਸ਼ੈਫਾਲੀ ਦੀ ਸ਼ਾਨਦਾਰ ਫਾਰਮ
ਭਾਰਤ ਦੀ ਓਪਨਰ ਸਮ੍ਰਿਤੀ ਮੰਧਾਨਾ ਟੂਰਨਾਮੈਂਟ ‘ਚ ਸ਼ਾਨਦਾਰ ਫਾਰਮ ‘ਚ ਰਹੀ ਹੈ। ਉਨ੍ਹਾਂ ਨੇ ਤਿੰਨ ਮੈਚਾਂ ‘ਚ 178.82 ਦੇ ਸਟ੍ਰਾਈਕ ਰੇਟ ਨਾਲ 152 ਦੌੜਾਂ ਬਣਾਈਆਂ ਹਨ, ਜਿਸ ‘ਚ ਹਾਂਗਕਾਂਗ ਵਿਰੁੱਧ 124 ਦਾ ਸੈਂਕੜਾ ਵੀ ਸ਼ਾਮਲ ਹੈ। ਉਸਦੀ ਓਪਨਿੰਗ ਸਾਥੀ, ਸ਼ੈਫਾਲੀ ਵਰਮਾ ਨੇ ਵੀ ਤਿੰਨ ਮੈਚਾਂ ‘ਚ 104 ਦੌੜਾਂ ਬਣਾਈਆਂ ਹਨ।
ਬੰਗਲਾਦੇਸ਼ ਲਈ ਦੀਪਤੀ ਸ਼ਰਮਾ ਦੀ ਸਪਿਨ ਚੁਣੌਤੀ
ਦੀਪਤੀ ਸ਼ਰਮਾ ਗੇਂਦਬਾਜ਼ੀ ‘ਚ ਭਾਰਤ ਦੀ ਸਭ ਤੋਂ ਸਫਲ ਗੇਂਦਬਾਜ਼ ਰਹੀ ਹੈ। ਦੀਪਤੀ ਨੇ ਤਿੰਨ ਮੈਚਾਂ ‘ਚ 1.90 ਦੇ ਇਕਾਨਮੀ ਰੇਟ ਨਾਲ 8 ਵਿਕਟਾਂ ਲਈਆਂ ਹਨ। ਉਸਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਬਿਨਾਂ ਕੋਈ ਦੌੜ ਦਿੱਤੇ 3 ਵਿਕਟਾਂ ਹਨ। ਦੀਪਤੀ ਤੋਂ ਇਲਾਵਾ, ਨੰਦਨੀ ਸ਼ਰਮਾ ਅਤੇ ਪ੍ਰੇਮਾ ਰਾਵਤ ਨੇ 5-5 ਵਿਕਟਾਂ ਲਈਆਂ ਹਨ।
ਸ਼ੋਬਨਾ ਮੋਸਤਾਰੀ ਟੂਰਨਾਮੈਂਟ ‘ਚ ਬੰਗਲਾਦੇਸ਼ ਦੀ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੀ ਖਿਡਾਰਨ ਹੈ। ਉਨ੍ਹਾਂ ਨੇ ਤਿੰਨ ਮੈਚਾਂ ‘ਚ 86.52 ਦੇ ਸਟ੍ਰਾਈਕ ਰੇਟ ਨਾਲ 77 ਦੌੜਾਂ ਬਣਾਈਆਂ ਹਨ, ਜਿਸਦਾ ਸਭ ਤੋਂ ਵਧੀਆ ਸਕੋਰ 40 ਹੈ। ਗੇਂਦਬਾਜ਼ੀ ‘ਚ, ਮਾਰੂਫਾ ਅਖ਼ਤਰ ਨੇ ਤਿੰਨ ਮੈਚਾਂ ‘ਚ 8 ਵਿਕਟਾਂ ਲਈਆਂ ਹਨ, ਜਿਸਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ 21 ਦੌੜਾਂ ਦੇ ਕੇ 3 ਵਿਕਟਾਂ ਹੈ।
Read More: ENG ਬਨਾਮ PAK: ਬਰਮਿੰਘਮ ਟੈਸਟ ‘ਚ ਪਾਕਿਸਤਾਨ ਦੀ ਅੱਧੀ ਟੀਮ 48 ਦੌੜਾਂ ‘ਤੇ ਪਵੇਲੀਅਨ ਪਰਤੀ
