ਸਪੋਰਟਸ, 30 ਸਤੰਬਰ 2026: IND ਬਨਾਮ WI: ਭਾਰਤ ਅਤੇ ਵੈਸਟਇੰਡੀਜ਼ ਵਿਚਾਲੇ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਦਾ ਦੂਜਾ ਮੈਚ ਅੱਜ ਖੇਡਿਆ ਜਾਵੇਗਾ। ਇਹ ਮੈਚ ਗੁਹਾਟੀ ‘ਚ ਦੁਪਹਿਰ 2 ਵਜੇ ਤੋਂ ਖੇਡਿਆ ਜਾਵੇਗਾ।
ਭਾਰਤ ਨੇ ਵੈਸਟਇੰਡੀਜ਼ ਵਿਰੁੱਧ ਖੇਡੇ ਗਏ ਪਿਛਲੇ 12 ਵਨਡੇ ਮੈਚਾਂ ‘ਚੋਂ 11 ਜਿੱਤੇ ਹਨ, ਜਦੋਂ ਕਿ ਵੈਸਟਇੰਡੀਜ਼ ਨੇ ਸਿਰਫ਼ ਇੱਕ ਜਿੱਤਿਆ ਹੈ। ਦੋਵਾਂ ਟੀਮਾਂ ਵਿਚਾਲੇ ਕੁੱਲ 143 ਵਨਡੇ ਮੈਚ ਖੇਡੇ ਗਏ ਹਨ। ਭਾਰਤ ਨੇ 73 ਮੈਚ ਜਿੱਤੇ ਹਨ, ਜਦੋਂ ਕਿ ਵੈਸਟਇੰਡੀਜ਼ ਨੇ 64 ਜਿੱਤੇ ਹਨ।
ਰੋਹਿਤ ਸ਼ਰਮਾ 12,000 ਵਨਡੇ ਦੌੜਾਂ ਤੱਕ ਪਹੁੰਚਣ ਤੋਂ 73 ਦੌੜਾਂ ਦੂਰ
ਓਪਨਰ ਰੋਹਿਤ ਸ਼ਰਮਾ 12,000 ਵਨਡੇ ਦੌੜਾਂ ਤੱਕ ਪਹੁੰਚਣ ਤੋਂ 73 ਦੌੜਾਂ ਦੂਰ ਹੈ। ਇਸ ਮੀਲ ਪੱਥਰ ‘ਤੇ ਪਹੁੰਚ ਕੇ, ਉਹ ਇਹ ਉਪਲਬਧੀ ਹਾਸਲ ਕਰਨ ਵਾਲਾ ਤੀਜਾ ਭਾਰਤੀ ਬੱਲੇਬਾਜ਼ ਬਣ ਜਾਵੇਗਾ। ਸਚਿਨ ਤੇਂਦੁਲਕਰ ਅਤੇ ਵਿਰਾਟ ਕੋਹਲੀ ਪਹਿਲਾਂ ਹੀ ਇਹ ਉਪਲਬਧੀ ਹਾਸਲ ਕਰ ਚੁੱਕੇ ਹਨ।
ਤਿਰੂਵਨੰਤਪੁਰਮ ‘ਚ ਖੇਡੀ ਗਈ ਲੜੀ ਦੇ ਪਹਿਲੇ ਮੈਚ ‘ਚ ਵਿਰਾਟ ਕੋਹਲੀ 15,000 ਵਨਡੇ ਦੌੜਾਂ ਤੱਕ ਪਹੁੰਚਣ ਵਾਲੇ ਸਭ ਤੋਂ ਤੇਜ਼ ਖਿਡਾਰੀ ਬਣ ਗਏ। ਭਾਰਤ ਨੇ ਇਹ ਮੈਚ 8 ਵਿਕਟਾਂ ਨਾਲ ਜਿੱਤਿਆ ਅਤੇ ਲੜੀ ਵਿੱਚ 1-0 ਦੀ ਬੜ੍ਹਤ ਬਣਾਈ।
ਮੈਚ ਤੋਂ ਪਹਿਲਾਂ ਵੈਸਟਇੰਡੀਜ਼ ਨੂੰ ਵੱਡਾ ਝਟਕਾ ਲੱਗਾ। ਪਿਛਲੇ ਮੈਚ ‘ਚ 101 ਦੌੜਾਂ ਬਣਾਉਣ ਵਾਲੇ ਸਲਾਮੀ ਬੱਲੇਬਾਜ਼ ਜਸਟਿਨ ਗ੍ਰੀਵਜ਼ ਸੱਟ ਕਾਰਨ ਇਸ ਮੈਚ ਤੋਂ ਬਾਹਰ ਹੋ ਗਏ ਹਨ। ਉਨ੍ਹਾਂ ਨੂੰ ਗੰਭੀਰ ਸੱਟ ਲੱਗੀ ਹੈ। ਗ੍ਰੀਵਜ਼ ਦੀ ਜਗ੍ਹਾ ਸ਼ੇਰਫੇਨ ਰਦਰਫੋਰਡ ਨੂੰ ਵਿਚਾਰਿਆ ਜਾ ਸਕਦਾ ਹੈ।
ਬਾਰਸਾਪਾਰਾ ਸਟੇਡੀਅਮ ਦੀ ਪਿੱਚ ਰਿਪੋਰਟ
ਹੁਣ ਤੱਕ ਬਾਰਸਾਪਾਰਾ ਸਟੇਡੀਅਮ ‘ਚ ਦੋ ਵਨਡੇ ਮੈਚ ਖੇਡੇ ਜਾ ਚੁੱਕੇ ਹਨ। ਚਾਰਾਂ ਪਾਰੀਆਂ ‘ਚ 300 ਤੋਂ ਵੱਧ ਦੌੜਾਂ ਦਰਜ ਕੀਤੀਆਂ ਗਈਆਂ ਹਨ। ਮੈਚ ਦੌਰਾਨ ਗੁਹਾਟੀ ‘ਚ ਮੌਸਮ ਗਰਮ ਅਤੇ ਨਮੀ ਵਾਲਾ ਰਹਿਣ ਦੀ ਉਮੀਦ ਹੈ। ਤਾਪਮਾਨ 30 ਡਿਗਰੀ ਸੈਲਸੀਅਸ ਤੋਂ ਉੱਪਰ ਰਹਿਣ ਦੀ ਉਮੀਦ ਹੈ। ਮੌਸਮ ਵਿਭਾਗ ਨੇ ਤੂਫ਼ਾਨ ਦੀ ਸੰਭਾਵਨਾ ਬਾਰੇ ਵੀ ਚੇਤਾਵਨੀ ਦਿੱਤੀ ਹੈ।
2018 ‘ਚ ਇਸ ਮੈਦਾਨ ‘ਤੇ ਰੋਹਿਤ ਤੇ ਕੋਹਲੀ ਨੇ ਲਗਾਏ ਸੀ ਸੈਂਕੜੇ
ਗੁਹਾਟੀ ਦੇ ਬਾਰਸਾਪਾਰਾ ਕ੍ਰਿਕਟ ਸਟੇਡੀਅਮ ‘ਚ ਦੋ ਵਨਡੇ ਖੇਡੇ ਗਏ ਹਨ। 2018 ‘ਚ ਭਾਰਤ-ਵੈਸਟਇੰਡੀਜ਼ ਵਨਡੇ ਮੈਚ ਵੀ ਇੱਥੇ ਖੇਡਿਆ ਗਿਆ ਸੀ। ਵੈਸਟਇੰਡੀਜ਼ ਨੇ 323 ਦੌੜਾਂ ਦਾ ਟੀਚਾ ਰੱਖਿਆ। ਇਸਦੇ ਜਵਾਬ ‘ਚ ਭਾਰਤ ਨੇ ਰੋਹਿਤ ਅਤੇ ਕੋਹਲੀ ਦੇ ਸੈਂਕੜੇ ਦੀ ਬਦੌਲਤ 8 ਵਿਕਟਾਂ ਬਾਕੀ ਰਹਿੰਦਿਆਂ ਜਿੱਤ ਪ੍ਰਾਪਤ ਕੀਤੀ। ਰੋਹਿਤ ਨੇ 117 ਗੇਂਦਾਂ ‘ਤੇ ਨਾਬਾਦ 152 ਦੌੜਾਂ ਬਣਾਈਆਂ, ਜਦੋਂ ਕਿ ਕੋਹਲੀ ਨੇ 107 ਗੇਂਦਾਂ ‘ਤੇ 140 ਦੌੜਾਂ ਬਣਾਈਆਂ।
ਕੁਲਦੀਪ ਯਾਦਵ 200 ਵਨਡੇ ਵਿਕਟਾਂ ਤੋਂ ਦੋ ਵਿਕਟਾਂ ਦੂਰ
ਕੁਲਦੀਪ ਯਾਦਵ 200 ਵਨਡੇ ਵਿਕਟਾਂ ਪੂਰੀਆਂ ਕਰਨ ਤੋਂ ਸਿਰਫ਼ ਦੋ ਵਿਕਟਾਂ ਦੂਰ ਹੈ। ਇਸ ਮੀਲ ਪੱਥਰ ਨੂੰ ਪ੍ਰਾਪਤ ਕਰਨ ਨਾਲ ਉਹ 200 ਇੱਕ ਰੋਜ਼ਾ ਵਿਕਟਾਂ ਪੂਰੀਆਂ ਕਰਨ ਵਾਲਾ ਨੌਵਾਂ ਭਾਰਤੀ ਗੇਂਦਬਾਜ਼ ਬਣ ਜਾਵੇਗਾ।
ਅਨਿਲ ਕੁੰਬਲੇ ਦੇ ਕੋਲ ਭਾਰਤ ਲਈ ਸਭ ਤੋਂ ਵੱਧ ਵਨਡੇ ਵਿਕਟਾਂ ਦਾ ਰਿਕਾਰਡ ਹੈ। ਉਨ੍ਹਾਂ ਨੇ 269 ਮੈਚਾਂ ‘ਚ 334 ਵਿਕਟਾਂ ਲਈਆਂ ਹਨ। ਭਾਰਤੀ ਗੇਂਦਬਾਜ਼ਾਂ ‘ਚ, ਰਵਿੰਦਰ ਜਡੇਜਾ (232 ਵਿਕਟਾਂ) ਅਤੇ ਮੁਹੰਮਦ ਸ਼ਮੀ (206 ਵਿਕਟਾਂ) ਕੁਲਦੀਪ ਤੋਂ ਅੱਗੇ ਹਨ।
