ਹਰਿਆਣਾ, 18 ਨਵੰਬਰ 2026: ਰਾਜ ਸਭਾ ਮੈਂਬਰ ਸੰਜੇ ਭਾਟੀਆ ਅਤੇ ਵਪਾਰ ਮੇਲਾ ਅਥਾਰਟੀ ਦੀ ਮੁੱਖ ਪ੍ਰਸ਼ਾਸਕ ਸ਼੍ਰੀਮਤੀ ਏ. ਮੋਨਾ ਸ਼੍ਰੀਨਿਵਾਸ ਨੇ ਮੰਗਲਵਾਰ ਨੂੰ ਅੰਤਰਰਾਸ਼ਟਰੀ ਵਪਾਰ ਮੇਲੇ ‘ਚ ਬਣਾਏ ਹਰਿਆਣਾ ਪਵੇਲੀਅਨ ਦਾ ਉਦਘਾਟਨ ਕੀਤਾ। ਇਸ ਦੌਰਾਨ ਉਨ੍ਹਾਂ ਨੇ ਪੂਰੇ ਪਵੇਲੀਅਨ ਦਾ ਬਾਰੀਕੀ ਨਾਲ ਨਿਰੀਖਣ ਕੀਤਾ।
ਇਸ ਮੌਕੇ ਸੰਜੇ ਭਾਟੀਆ ਨੇ ਕਿਹਾ ਕਿ ਹਰਿਆਣਾ ਹਰ ਖੇਤਰ ‘ਚ ਨੰਬਰ-1 ਹੈ, ਇਸ ਦੀ ਝਲਕ ਇਸ ਹਰਿਆਣਾ ਪਵੇਲੀਅਨ ‘ਚ ਵੀ ਦੇਖਣ ਨੂੰ ਮਿਲ ਰਹੀ ਹੈ। ਉਨ੍ਹਾਂ ਨੇ ਸੂਬਾ ਵਾਸੀਆਂ ਨੂੰ ਵੱਧ ਤੋਂ ਵੱਧ ਗਿਣਤੀ ‘ਚ ਇਸ ਮੇਲੇ ‘ਚ ਪਹੁੰਚ ਕੇ ਵਿਰਾਸਤ ਅਤੇ ਵਿਕਾਸ ਦੇ ਇਸ ਅਦਭੁਤ ਸੰਗਮ ਦੀਆਂ ਝਲਕੀਆਂ ਦੇਖਣ ਦਾ ਸੱਦਾ ਦਿੱਤਾ।
ਰਾਜ ਸਭਾ ਮੈਂਬਰ ਸੰਜੇ ਭਾਟੀਆ ਨੇ ਕਿਹਾ ਕਿ ਉਹ ਕਈ ਸਾਲਾਂ ਬਾਅਦ ਵਪਾਰ ਮੇਲੇ ‘ਚ ਆਏ ਹਨ। ਇਸ ਤੋਂ ਪਹਿਲਾਂ ਉਹ ਸਕੂਲ ਦੇ ਸਮੇਂ ਬੱਚਿਆਂ ਨਾਲ ਸੈਰ-ਸਪਾਟੇ ਦੌਰਾਨ ਇੱਥੇ ਆਏ ਸਨ। ਅੱਜ ਹਰਿਆਣਾ ਪਵੇਲੀਅਨ ‘ਚ ਆ ਕੇ ਉਨ੍ਹਾਂ ਨੂੰ ਬਹੁਤ ਚੰਗਾ ਲੱਗਾ। ਉਨ੍ਹਾਂ ਕਿਹਾ ਕਿ ਹਰਿਆਣਾ ਹਰ ਖੇਤਰ ‘ਚ ਨੰਬਰ ਇੱਕ ਹੈ। ਸਾਲ 1966 ‘ਚ ਹਰਿਆਣਾ ਦੇ ਗਠਨ ਤੋਂ ਬਾਅਦ ਲਗਾਤਾਰ ਲੋਕਾਂ ਦਾ ਜੀਵਨ ਪੱਧਰ ਬਦਲ ਰਿਹਾ ਹੈ ਅਤੇ ਲੋਕ ਖੁਸ਼ਹਾਲ ਹੋ ਰਹੇ ਹਨ। ਤਕਨੀਕ ਦੇ ਮਾਮਲੇ ਵਿੱਚ ਵੀ ਹਰਿਆਣਾ ਦਾ ਕੋਈ ਮੁਕਾਬਲਾ ਨਹੀਂ ਹੈ।
ਸੰਸਦ ਮੈਂਬਰ ਸੰਜੇ ਭਾਟੀਆ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਦੇ ‘ਤੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਮੇਲੇ ‘ਚ ਨਿਰਯਾਤ ਕਾਰਨਰ ਬਣਾਇਆ ਗਿਆ ਹੈ। ਇਹ ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਜਨਮ ਸਥਾਨ ਪਾਣੀਪਤ ਹੈ, ਜੋ ਵੱਖ-ਵੱਖ ਉਤਪਾਦਾਂ ਦੇ ਨਿਰਯਾਤ ਵਜੋਂ ਹੀ ਜਾਣਿਆ ਜਾਂਦਾ ਹੈ। ਟੈਕਸਟਾਈਲ ਨਿਰਯਾਤ ਦੇ ਮਾਮਲੇ ‘ਚ ਪਾਣੀਪਤ ਦਾ ਭਾਰਤ ਵਿੱਚ ਅਹਿਮ ਸਥਾਨ ਹੈ।
ਪਵੇਲੀਅਨ ‘ਚ ਉਨ੍ਹਾਂ ਨੇ ਫਰੀਦਾਬਾਦ ਅਤੇ ਗੁਰੂਗ੍ਰਾਮ ਦੇ ਅਨੇਕਾਂ ਉਤਪਾਦ ਵੀ ਦੇਖੇ। ਉਨ੍ਹਾਂ ਨੇ ਕਰਨਾਲ ਲੋਕ ਸਭਾ ਹਲਕੇ ਦੀ ਵੀ ਨੁਮਾਇੰਦਗੀ ਕੀਤੀ ਹੈ। ਉੱਥੋਂ ਦਾ ਬਾਸਮਤੀ ਚੌਲ, ਜਿਸ ਦੀ ਖੁਸ਼ਬੂ ਪੂਰੀ ਦੁਨੀਆ ‘ਚ ਫੈਲੀ ਹੋਈ ਹੈ, ਉਸ ਨੂੰ ਵੀ ਅੱਜ ਪਵੇਲੀਅਨ ‘ਚ ਦਿਖਾਇਆ ਗਿਆ ਹੈ। ਹਰਿਆਣਾ ਪਵੇਲੀਅਨ ‘ਚ ਖੇਤੀਬਾੜੀ ਅਤੇ ਨਿਰਯਾਤ ਦੇ ਸੁਮੇਲ ‘ਤੇ ਸੰਸਦ ਮੈਂਬਰ ਸੰਜੇ ਭਾਟੀਆ ਨੇ ਕਿਹਾ ਕਿ ਇਸ ਵਾਰ ਇਹ ਬਹੁਤ ਸੋਚ-ਸਮਝ ਕੇ ਤੈਅ ਕੀਤਾ ਗਿਆ ਬਹੁਤ ਵਧੀਆ ਸੁਮੇਲ ਹੈ। ਹਰਿਆਣਾ ਨੇ ਆਪਣੀ ਵਿਰਾਸਤ ਨੂੰ ਵੀ ਸੰਭਾਲ ਕੇ ਰੱਖਿਆ ਹੈ ਅਤੇ ਆਉਣ ਵਾਲੀ ਦੁਨੀਆ ਨਾਲ ਵੀ ਕਦਮ ਨਾਲ ਕਦਮ ਮਿਲਾ ਕੇ ਚੱਲ ਰਿਹਾ ਹੈ।
ਹਰਿਆਣਾ ਵਪਾਰ ਮੇਲਾ ਅਥਾਰਟੀ ਦੀ ਮੁੱਖ ਪ੍ਰਸ਼ਾਸਕ ਸ਼੍ਰੀਮਤੀ ਏ. ਮੋਨਾ ਸ਼੍ਰੀਨਿਵਾਸ ਨੇ ਕਿਹਾ ਕਿ ਇਸ ਸਾਲ ਦੇ ਵਪਾਰ ਮੇਲੇ ਦੀ ਥੀਮ “ਵਿਕਾਸ ਅਤੇ ਵਿਰਾਸਤ” ਹੈ, ਜਿਸ ਨੂੰ ਹਰਿਆਣਾ ਪਵੇਲੀਅਨ ‘ਚ ਬਹੁਤ ਹੀ ਪ੍ਰਭਾਵਸ਼ਾਲੀ ਢੰਗ ਨਾਲ ਪ੍ਰਦਰਸ਼ਿਤ ਕੀਤਾ ਗਿਆ ਹੈ। ਹਰਿਆਣਾ ਦੀ ਅਧਿਆਤਮਿਕ ਅਤੇ ਧਾਰਮਿਕ ਵਿਰਾਸਤ ਦੇ ਨਾਲ-ਨਾਲ ਇਸ ਦਾ ਇਤਿਹਾਸ ਵੀ ਬਹੁਤ ਪੁਰਾਣਾ ਹੈ। ਪਵੇਲੀਅਨ ‘ਚ ਰਾਖੀਗੜ੍ਹੀ ਦੀਆਂ ਮੋਹਰਾਂ (ਸੀਲਾਂ) ਤੋਂ ਲੈ ਕੇ ਵਿਕਾਸ ਦੀ ਗਤੀ ਨਾਲ ਅੱਜ ਦੇ ਹਰਿਆਣਾ ਤੱਕ ਦੇ ਸਫ਼ਰ ਨੂੰ ਦਰਸਾਇਆ ਗਿਆ ਹੈ।
ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਦੀ ਸੋਚ ਹੈ ਕਿ ਹਰਿਆਣਾ ਆਪਣੀਆਂ ਪੁਰਾਣੀਆਂ ਚੀਜ਼ਾਂ, ਸੱਭਿਆਚਾਰਕ ਕਦਰਾਂ-ਕੀਮਤਾਂ ਅਤੇ ਅਧਿਆਤਮਿਕ ਕਦਰਾਂ-ਕੀਮਤਾਂ ਨੂੰ ਸੰਜੋਅ ਕੇ ਅੱਗੇ ਵਧੇ। ਹਰਿਆਣਾ ਦੀ ਆਪਣੀ ਇੱਕ ਵਿਕਾਸ ਕਹਾਣੀ (ਗ੍ਰੋਥ ਸਟੋਰੀ) ਹੈ, ਜੋ ਪੂਰੇ ਵਿਸ਼ਵ ‘ਚ ਸਭ ਨੂੰ ਪਤਾ ਹੈ, ਚਾਹੇ ਉਹ ਉਦਯੋਗ ਹੋਵੇ, ਖੇਤੀਬਾੜੀ ਹੋਵੇ ਜਾਂ ਏ.ਆਈ. (AI)। ਇਸ ਨੂੰ ਵੀ ਪਵੇਲੀਅਨ ‘ਚ ਦਰਸਾਇਆ ਗਿਆ ਹੈ।
ਮੁੱਖ ਪ੍ਰਸ਼ਾਸਕ ਏ. ਮੋਨਾ ਸ਼੍ਰੀਨਿਵਾਸ ਨੇ ਕਿਹਾ ਕਿ ਅੱਜ ਸਾਡਾ ਕਿਸਾਨ ਸਿਰਫ਼ ਖੇਤ ‘ਚ ਹੀ ਕੰਮ ਨਹੀਂ ਕਰਦਾ, ਸਗੋਂ ਆਪਣੇ ਮੋਬਾਈਲ ਅਤੇ ਲੈਪਟਾਪ ਰਾਹੀਂ ਮੌਸਮ ਦੀ ਜਾਣਕਾਰੀ ਲੈਂਦਾ ਹੈ ਅਤੇ ਆਪਣੇ ਉਤਪਾਦਾਂ ਨੂੰ ਬਿਹਤਰ ਬਣਾਉਣ ਲਈ ਹਰ ਸੰਭਵ ਯਤਨ ਕਰਦਾ ਹੈ। ਖੇਤੀਬਾੜੀ ਅਤੇ ਉਦਯੋਗ ਦੇ ਨਾਲ ਤਕਨੀਕ ਦਾ ਇਹੀ ਸੰਗਮ “ਵਿਕਾਸ ਅਤੇ ਵਿਰਾਸਤ” ਦੀ ਥੀਮ ਨੂੰ ਬਾਖੂਬੀ ਦਰਸਾਉਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਪਵੇਲੀਅਨ ‘ਚ ਦਰਸ਼ਕਾਂ ਲਈ ਕੁਇਜ਼ ਬੂਥ ਬਣਾਇਆ ਗਿਆ ਹੈ, ਇਸ ਦੇ ਨਾਲ ਹੀ ਇੱਕ ਫੋਟੋ ਬੂਥ ਵੀ ਤਿਆਰ ਕੀਤਾ ਗਿਆ ਹੈ, ਜਿਸ ‘ਚ ਲੋਕ ਹਰਿਆਣਾ ਦੇ ਖੇਡ ਸਿਤਾਰਿਆਂ ਨਾਲ ਫੋਟੋ ਖਿਚਵਾ ਸਕਦੇ ਹਨ।
Read More: ਹਰਿਆਣਾ ਸਰਕਾਰ ਵੱਲੋਂ HCS ਅਧਿਕਾਰੀਆਂ ਦੇ PAR ਮੁਲਾਂਕਣ ਦੀ ਸਮਾਂ-ਸੀਮਾ ‘ਚ ਵਾਧਾ




