ਉਤਰਾਖੰਡ, 26 ਅਗਸਤ 2026: Swine flu in Uttarakhand: ਉਤਰਾਖੰਡ ‘ਚ ਸਵਾਈਨ ਫਲੂ (ਇਨਫਲੂਐਂਜ਼ਾ H1N1) ਦੇ ਮਾਮਲੇ ਸਿਹਤ ਵਿਭਾਗ ਲਈ ਚਿੰਤਾਵਾਂ ਵਧਾ ਰਹੇ ਹਨ। ਇਸ ਇਨਫੈਕਸ਼ਨ ਨਾਲ ਪੰਜ ਜਣਿਆਂ ਦੀ ਮੌਤ ਹੋ ਗਈ ਹੈ। ਸਿਹਤ ਵਿਭਾਗ ਦੇ ਮੁਤਾਬਕ, ਇਹ ਮਰੀਜ਼ ਹੋਰ ਬਿਮਾਰੀਆਂ ਤੋਂ ਵੀ ਪੀੜਤ ਸਨ। ਇਸ ਦੌਰਾਨ, ਸੂਬੇ ‘ਚ ਮਰੀਜ਼ਾਂ ਦੀ ਗਿਣਤੀ 31 ਤੋਂ ਵੱਧ ਕੇ 49 ਹੋ ਗਈ ਹੈ। ਹੁਣ ਤੱਕ ਰਿਪੋਰਟ ਕੀਤੇ ਗਏ ਮਰੀਜ਼ਾਂ ‘ਚੋਂ 34 ਦੇਹਰਾਦੂਨ ਤੋਂ ਹਨ।
ਉਤਰਾਖੰਡ ‘ਚ 1 ਅਗਸਤ ਤੋਂ 49 ਜਣਿਆਂ ਨੂੰ ਸਵਾਈਨ ਫਲੂ ਦੀ ਪੁਸ਼ਟੀ ਹੋਈ ਹੈ। ਏਕੀਕ੍ਰਿਤ ਰੋਗ ਨਿਗਰਾਨੀ ਪ੍ਰੋਗਰਾਮ (IDSP) ਦੇ ਰਾਜ ਨਿਗਰਾਨੀ ਅਧਿਕਾਰੀ ਡਾ. ਪੰਕਜ ਦੇ ਮੁਤਾਬਕ, ਉਨ੍ਹਾਂ ਖੇਤਰਾਂ ‘ਚ ਸਕ੍ਰੀਨਿੰਗ ਤੇਜ਼ ਕਰ ਦਿੱਤੀ ਗਈ ਹੈ ਜਿੱਥੇ ਕੇਸ ਰਿਪੋਰਟ ਕੀਤੇ ਗਏ ਹਨ। ਸਾਰੇ ਜ਼ਿਲ੍ਹਿਆਂ ‘ਚ ਮਾਈਕ੍ਰੋ-ਪੱਧਰ ‘ਤੇ ਰੈਪਿਡ ਰਿਸਪਾਂਸ ਟੀਮਾਂ ਕੰਮ ਕਰ ਰਹੀਆਂ ਹਨ। ਇੱਕ ਡਾਕਟਰ ਅਤੇ ਇੱਕ ਮਾਹਰ ਸਮੇਤ ਚਾਰ ਸਿਹਤ ਕਰਮਚਾਰੀ ਪ੍ਰਭਾਵਿਤ ਖੇਤਰਾਂ ‘ਚ ਸਕ੍ਰੀਨਿੰਗ ਕਰਨ ਲਈ ਪਹੁੰਚ ਰਹੇ ਹਨ।
ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਦੇ ਮੁਤਾਬਕ, ਪਿਛਲੇ 10 ਤੋਂ 15 ਦਿਨਾਂ ‘ਚ ਸੰਕਰਮਿਤ ਵਿਅਕਤੀ ਦੇ ਯਾਤਰਾ ਇਤਿਹਾਸ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ, ਇਹ ਵੀ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਮਰੀਜ਼ ਦੇ ਸੰਪਰਕ ‘ਚ ਕਿਹੜੇ ਲੋਕ ਆਏ ਹਨ। ਸੰਕਰਮਿਤ ਵਿਅਕਤੀ ਦੇ ਸੰਪਰਕ ‘ਚ ਆਏ ਲੋਕਾਂ ਦਾ ਵੀ ਇਨਫਲੂਐਂਜ਼ਾ H1N1 ਲਈ ਟੈਸਟ ਕੀਤਾ ਜਾ ਰਿਹਾ ਹੈ।
ਏਮਜ਼ ਰਿਸ਼ੀਕੇਸ਼ ਦੇ ਇੰਟਰਨਲ ਮੈਡੀਸਨ ਵਿਭਾਗ ਦੇ ਸੀਨੀਅਰ ਡਾਕਟਰ ਡਾ. ਅਖਿਲੇਸ਼ ਕੁਮਾਰ ਦਾ ਕਹਿਣਾ ਹੈ ਕਿ ਸੰਕਰਮਿਤ ਵਿਅਕਤੀ ਅਤੇ ਉਸ ਦੇ ਸੰਪਰਕ ‘ਚ ਆਏ ਲੋਕਾਂ ਨੂੰ ਅਲੱਗ ਕਰਨਾ ਮਹੱਤਵਪੂਰਨ ਹੈ। ਇਸ ਨਾਲ ਸੰਕਰਮਣ ਦੀ ਲੜੀ ਨੂੰ ਤੋੜਨ ‘ਚ ਮੱਦਦ ਮਿਲੇਗੀ। ਸਵਾਈਨ ਫਲੂ ਦੇ ਲੱਛਣਾਂ ਨੂੰ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਜੇਕਰ ਸਾਹ ਲੈਣ ‘ਚ ਮੁਸ਼ਕਿਲ, ਅਚਾਨਕ ਬੁਖਾਰ, ਠੰਢ, ਖੰਘ, ਨੱਕ ਵਗਣਾ, ਮਾਸਪੇਸ਼ੀਆਂ ‘ਚ ਦਰਦ, ਉਲਟੀਆਂ ਅਤੇ ਬਹੁਤ ਜ਼ਿਆਦਾ ਥਕਾਵਟ ਵਰਗੇ ਲੱਛਣ ਦਿਖਾਈ ਦਿੰਦੇ ਹਨ, ਤਾਂ ਬਿਨਾਂ ਕਿਸੇ ਦੇਰੀ ਦੇ ਡਾਕਟਰੀ ਜਾਂਚ ਕਰਵਾਉਣੀ ਚਾਹੀਦੀ ਹੈ।
Read More: ਭਾਰਤ ਦੇਸ਼ ਕੋਈ ਧਰਮਸ਼ਾਲਾ ਨਹੀਂ, ਇੱਥੇ ਰਹਿਣ ਦਾ ਹੱਕ ਸਿਰਫ਼ ਨਾਗਰਿਕਾਂ ਨੂੰ ਹੈ: ਅਮਿਤ ਸ਼ਾਹ
