ਸਪੋਰਟਸ, 10 ਅਗਸਤ 2026: IND ਬਨਾਮ SL Test: ਬੱਲੇਬਾਜ਼ ਸਰਫਰਾਜ਼ ਖਾਨ ਨੂੰ ਦੋ ਸਾਲ ਬਾਅਦ ਭਾਰਤੀ ਟੀਮ ‘ਚ ਸ਼ਾਮਲ ਕੀਤਾ ਗਿਆ ਹੈ। ਉਨ੍ਹਾਂ ਨੂੰ ਸ਼੍ਰੀਲੰਕਾ ਦੌਰੇ ‘ਤੇ ਸਾਈ ਸੁਦਰਸ਼ਨ ਦੀ ਜਗ੍ਹਾ ਸ਼ਾਮਲ ਕੀਤਾ ਗਿਆ ਹੈ। ਬੀਸੀਸੀਆਈ ਨੇ ਐਤਵਾਰ ਸ਼ਾਮ ਨੂੰ ਇਹ ਐਲਾਨ ਕੀਤਾ।
ਭਾਰਤੀ ਟੀਮ 15 ਅਗਸਤ ਨੂੰ ਗਾਲ ‘ਚ ਸ਼੍ਰੀਲੰਕਾ ਖ਼ਿਲਾਫ ਪਹਿਲਾ ਟੈਸਟ ਖੇਡੇਗੀ। ਸਰਫਰਾਜ਼ ਦਾ ਆਖਰੀ ਟੈਸਟ 2024 ‘ਚ ਵਾਨਖੇੜੇ ਸਟੇਡੀਅਮ ਵਿੱਚ ਨਿਊਜ਼ੀਲੈਂਡ ਵਿਰੁੱਧ ਸੀ। ਉਨ੍ਹਾਂ ਨੇ ਹੁਣ ਤੱਕ ਸਿਰਫ ਛੇ ਟੈਸਟ ਮੈਚ ਖੇਡੇ ਹਨ।
ਬੀਸੀਸੀਆਈ ਨੇ ਸਾਈ ਸੁਦਰਸ਼ਨ ਦੀ ਰਿਕਵਰੀ ਬਾਰੇ ਵੀ ਇੱਕ ਅਪਡੇਟ ਪ੍ਰਦਾਨ ਕੀਤੀ। ਸਾਈ ਸੁਦਰਸ਼ਨ ਬੈਂਗਲੁਰੂ ਦੇ ਬੀਸੀਸੀਆਈ ਸੈਂਟਰ ਆਫ਼ ਐਕਸੀਲੈਂਸ (ਸੀਓਈ) ‘ਚ ਪੁਨਰਵਾਸ ਤੋਂ ਗੁਜ਼ਰ ਰਿਹਾ ਹੈ। ਉਹ ਠੀਕ ਹੋ ਰਿਹਾ ਹੈ। ਮੈਡੀਕਲ ਟੀਮ ਉਸਦੀ ਰਿਕਵਰੀ ‘ਤੇ ਨੇੜਿਓਂ ਨਜ਼ਰ ਰੱਖ ਰਹੀ ਹੈ।
ਸਾਈ ਸੁਦਰਸ਼ਨ ਨੂੰ ਪਿਛਲੇ ਮਹੀਨੇ ਸ਼੍ਰੀਲੰਕਾ ਏ ਵਿਰੁੱਧ ਦੂਜੇ ਅਣਅਧਿਕਾਰਤ ਟੈਸਟ ਦੌਰਾਨ ਪੈਰ ਦੇ ਅੰਗੂਠੇ ਦੀ ਸੱਟ ਲੱਗੀ ਸੀ। ਉਨ੍ਹਾਂ ਨੇ ਉਸ ਦੌਰੇ ‘ਤੇ ਸ਼ਾਨਦਾਰ ਫਾਰਮ ਦਾ ਪ੍ਰਦਰਸ਼ਨ ਕੀਤਾ ਸੀ, ਲਗਾਤਾਰ ਦੋ ਸੈਂਕੜੇ ਲਗਾਏ ਸਨ। ਭਾਰਤੀ ਟੀਮ ਸ਼੍ਰੀਲੰਕਾ ਦੌਰੇ ਤੋਂ ਪਹਿਲਾਂ ਹੀ ਕਈ ਸੱਟਾਂ ਦਾ ਸਾਹਮਣਾ ਕਰ ਰਹੀ ਹੈ। ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਗੋਡੇ ਦੀ ਸੱਟ ਕਾਰਨ ਪੂਰੀ ਟੈਸਟ ਸੀਰੀਜ਼ ਤੋਂ ਬਾਹਰ ਹੋ ਗਿਆ ਹੈ।
ਵਾਸ਼ਿੰਗਟਨ ਸੁੰਦਰ ਹੈਮਸਟ੍ਰਿੰਗ ਦੀ ਸੱਟ ਕਾਰਨ ਪਹਿਲਾ ਟੈਸਟ ਨਹੀਂ ਖੇਡੇਗਾ। ਹਰਸ਼ਿਤ ਰਾਣਾ (ਹੈਮਸਟ੍ਰਿੰਗ), ਨਿਤੀਸ਼ ਕੁਮਾਰ ਰੈਡੀ (ਕਵਾਡ੍ਰਿਸੈਪਸ), ਅਤੇ ਆਕਾਸ਼ ਦੀਪ (ਪਿੱਠ ਦੀ ਸੱਟ) ਵੀ ਉਪਲਬਧ ਨਹੀਂ ਹਨ।
ਟੈਸਟ ਕਪਤਾਨ ਸ਼ੁਭਮਨ ਗਿੱਲ ਨੂੰ ਨੈੱਟਸ ਦੌਰਾਨ ਆਪਣੀ ਸੱਜੀ ਉਂਗਲ ‘ਚ ਸੱਟ ਲੱਗ ਗਈ। ਉਹ ਸਾਵਧਾਨੀ ਵਜੋਂ ਅਭਿਆਸ ਮੈਚ ਦੇ ਪਹਿਲੇ ਦੋ ਦਿਨ ਨਹੀਂ ਖੇਡਿਆ। ਹਾਲਾਂਕਿ, ਤੀਜੇ ਦਿਨ, ਉਨ੍ਹਾਂ ਨੇ ਯਸ਼ਸਵੀ ਜੈਸਵਾਲ ਨਾਲ ਪਾਰੀ ਦੀ ਸ਼ੁਰੂਆਤ ਕੀਤੀ ਅਤੇ 44 ਦੌੜਾਂ ਬਣਾਈਆਂ।
ਸ਼੍ਰੀਲੰਕਾ ਟੈਸਟ ਸੀਰੀਜ਼ ਲਈ ਭਾਰਤ ਦੀ ਅਪਡੇਟ ਕੀਤੀ ਟੀਮ
ਸ਼ੁਭਮਨ ਗਿੱਲ (ਕਪਤਾਨ), ਕੇਐਲ ਰਾਹੁਲ (ਉਪ-ਕਪਤਾਨ), ਯਸ਼ਸਵੀ ਜੈਸਵਾਲ, ਰਿਸ਼ਭ ਪੰਤ (ਵਿਕਟਕੀਪਰ), ਧਰੁਵ ਜੁਰੇਲ (ਵਿਕਟਕੀਪਰ), ਰਵਿੰਦਰ ਜਡੇਜਾ, ਕੁਲਦੀਪ ਯਾਦਵ, ਮਾਨਵ ਸੁਥਾਰ, ਮੁਹੰਮਦ ਸਿਰਾਜ, ਪ੍ਰਸਿਧ ਕ੍ਰਿਸ਼ਨਾ, ਗੁਰਨੂਰ ਬਰਾੜ, ਦੇਵਦੱਤ ਪਡਿੱਕਲ, ਸਰਾਂਸ਼ ਜੈਨ, ਆਕਿਬ ਨਬੀ ਅਤੇ ਸਰਫਰਾਜ਼ ਖਾਨ।
Read More: IND ਬਨਾਮ SL: ਮੁਹੰਮਦ ਸਿਰਾਜ ਨੇ ਆਖਰੀ ਓਵਰ ‘ਚ ਲਗਾਤਾਰ 3 ਛੱਕੇ ਮਾਰ ਕੇ ਦਿਵਾਈ ਭਾਰਤ ਨੂੰ ਜਿੱਤ
