ਸਪੋਰਟਸ, 13 ਮਾਰਚ 2026: ਭਾਰਤੀ ਮਾਲਕੀ ਵਾਲੀ ਫਰੈਂਚਾਇਜ਼ੀ ਸਨਰਾਈਜ਼ਰਜ਼ ਲੀਡਜ਼ ਨੇ ਵੀਰਵਾਰ ਨੂੰ ਪਾਕਿਸਤਾਨੀ ਸਪਿਨਰ ਅਬਰਾਰ ਅਹਿਮਦ ਲਈ ਬੋਲੀ ਲਗਾਈ। ਸਨਰਾਈਜ਼ਰਜ਼ ਦੀ ਸੀਈਓ ਕਾਵਿਆ ਮਾਰਨ ਨੇ ਨਿੱਜੀ ਤੌਰ ‘ਤੇ ਉਸਨੂੰ £190,000 (ਲਗਭੱਗ ₹2.34 ਕਰੋੜ) ‘ਚ ਖਰੀਦਿਆ। ਇਸ ਦੇ ਨਾਲ ਅਬਰਾਰ 21 ਜੁਲਾਈ ਤੋਂ ਸ਼ੁਰੂ ਹੋਣ ਵਾਲੀ ਦ ਹੰਡਰੇਡ ਲੀਗ ‘ਚ ਭਾਰਤੀ ਮਾਲਕੀ ਵਾਲੀ ਫਰੈਂਚਾਇਜ਼ੀ ‘ਚ ਸ਼ਾਮਲ ਹੋਣ ਵਾਲਾ ਪਹਿਲਾ ਪਾਕਿਸਤਾਨੀ ਖਿਡਾਰੀ ਬਣ ਗਿਆ।
ਅਬਰਾਰ ਨੂੰ ਖਰੀਦਣ ਲਈ ਕਾਵਿਆ ਮਾਰਨ ਦੀ ਸੋਸ਼ਲ ਮੀਡੀਆ ‘ਤੇ ਆਲੋਚਨਾ ਕੀਤੀ ਜਾ ਰਹੀ ਹੈ। ਬੀਸੀਸੀਆਈ ਦੇ ਉਪ ਪ੍ਰਧਾਨ ਰਾਜੀਵ ਸ਼ੁਕਲਾ ਨੇ ਕਿਹਾ, “ਸਾਡੇ ਆਈਪੀਐਲ ‘ਚ ਅਜਿਹਾ ਕੁਝ ਨਹੀਂ ਹੈ। ਸਾਡਾ ਅਧਿਕਾਰ ਖੇਤਰ ਆਈਪੀਐਲ ਤੱਕ ਹੈ। ਅਸੀਂ ਹੋਰ ਲੀਗਾਂ ‘ਚ ਕੋਈ ਕੀ ਕਰ ਰਿਹਾ ਹੈ ਇਸ ‘ਚ ਕਿਵੇਂ ਦਖਲ ਦੇ ਸਕਦੇ ਹਾਂ? ਇਹ ਉਨ੍ਹਾਂ ‘ਤੇ ਨਿਰਭਰ ਕਰਦਾ ਹੈ। ਆਈਪੀਐਲ ‘ਚ ਅਜਿਹਾ ਕੋਈ ਖਿਡਾਰੀ ਨਹੀਂ ਹੈ।”
ਭਾਰਤ ਅਤੇ ਪਾਕਿਸਤਾਨ ਦੇ ਤਣਾਅਪੂਰਨ ਸਬੰਧਾਂ ਦੇ ਕਾਰਨ, ਆਈਪੀਐਲ ਫਰੈਂਚਾਇਜ਼ੀ ਨੇ 2009 ਤੋਂ ਬਾਅਦ ਕਿਸੇ ਵੀ ਪਾਕਿਸਤਾਨੀ ਖਿਡਾਰੀ ਨੂੰ ਸਾਈਨ ਨਹੀਂ ਕੀਤਾ ਹੈ। ਪਿਛਲੇ ਸਾਲ, ਚੇਨਈ ਸਥਿਤ ਮੀਡੀਆ ਕੰਪਨੀ ਸਨ ਗਰੁੱਪ ਨੇ ਈਸੀਬੀ ਤੋਂ ਨੌਰਦਰਨ ਸੁਪਰਚਾਰਜਰਜ਼ ‘ਚ 49% ਹਿੱਸੇਦਾਰੀ ਅਤੇ ਯੌਰਕਸ਼ਾਇਰ ਕਾਉਂਟੀ ਕਲੱਬ ਤੋਂ ਬਾਕੀ 51% ਹਿੱਸੇਦਾਰੀ ਲਗਭਗ £100 ਮਿਲੀਅਨ ‘ਚ ਹਾਸਲ ਕੀਤੀ। ਬਾਅਦ ‘ਚ ਟੀਮ ਦਾ ਨਾਮ ਬਦਲ ਕੇ ਸਨਰਾਈਜ਼ਰਜ਼ ਲੀਡਜ਼ ਰੱਖਿਆ ਗਿਆ।
ਸਨ ਗਰੁੱਪ ਆਈਪੀਐਲ ‘ਚ ਸਨਰਾਈਜ਼ਰਜ਼ ਹੈਦਰਾਬਾਦ ਅਤੇ ਐਸਏ20 ‘ਚ ਸਨਰਾਈਜ਼ਰਜ਼ ਈਸਟਰਨ ਕੇਪ ਦਾ ਵੀ ਮਾਲਕ ਹੈ, ਪਰ ਇਨ੍ਹਾਂ ਟੀਮਾਂ ਕੋਲ ਇਸ ਸਮੇਂ ਕੋਈ ਪਾਕਿਸਤਾਨੀ ਖਿਡਾਰੀ ਨਹੀਂ ਹੈ।
Read More: ਪਾਕਿਸਤਾਨੀ ਗੇਂਦਬਾਜ਼ ਨੂੰ ਖਰੀਦਣ ਤੋਂ ਬਾਅਦ ਕਾਵਿਆ ਮਾਰਨ ਦਾ ਸਨਰਾਈਜ਼ਰਜ਼ ਲੀਡਜ਼ ਦਾ ਐਕਸ ਅਕਾਊਂਟ ਸਸਪੈਂਡ
