ਪੰਜਾਬ, 22 ਨਵੰਬਰ 2025: ਪੰਜਾਬ, ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਤੋਂ ਆਉਣ ਵਾਲੇ ਵਾਹਨਾਂ ਨੂੰ ਹੁਣ ਹਰਿਆਣਾ ਅਤੇ ਦਿੱਲੀ ਜਾਣ ਵੇਲੇ ਮੋਹਾਲੀ ਦੇ ਖਰੜ ਵਿਖੇ ਟ੍ਰੈਫਿਕ ਜਾਮ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ। ਲੰਮੇ ਇੰਤਜ਼ਾਰ ਤੋਂ ਬਾਅਦ ਮੋਹਾਲੀ-ਕੁਰਾਲੀ ਬਾਈਪਾਸ ਦਾ ਕੰਮ ਪੂਰਾ ਹੋ ਗਿਆ ਹੈ। ਇਹ ਸੜਕ 1 ਦਸੰਬਰ 2025 ਨੂੰ ਜਨਤਾ ਲਈ ਖੋਲ੍ਹ ਦਿੱਤੀ ਜਾਵੇਗੀ।
ਇਹ NH-205A ਦਾ ਹੀ ਭਾਗ ਹੈ, ਜੋ ਕੁਰਾਲੀ ਰਾਹੀਂ ਏਅਰਪੋਰਟ ਰੋਡ ਨਾਲ ਜੁੜਦਾ ਹੈ, ਮੋਹਾਲੀ ਅਤੇ ਖਰੜ ਵਿਚਾਲੇ ਟ੍ਰੈਫਿਕ ਜਾਮ ਨੂੰ ਘੱਟ ਕਰੇਗਾ। ਇਹ 31 ਕਿਲੋਮੀਟਰ ਲੰਬੀ ਸੜਕ ਮੋਹਾਲੀ ਦੇ ਆਈਟੀ ਚੌਕ ਤੋਂ ਸ਼ੁਰੂ ਹੁੰਦੀ ਹੈ ਅਤੇ ਕੁਰਾਲੀ ਤੱਕ ਬਣਾਈ ਗਈ ਹੈ। ਕੁਰਾਲੀ ਤੋਂ ਬਾਅਦ, ਇਹ ਸੜਕ ਸਿਸਵਾਂ-ਬੱਦੀ ਰੂਟ ਨਾਲ ਜੁੜ ਜਾਵੇਗੀ। ਇਹ ਬਾਈਪਾਸ ਕੇਂਦਰ ਸਰਕਾਰ ਦੇ ਭਾਰਤਮਾਲਾ ਪ੍ਰੋਜੈਕਟ ਤਹਿਤ ₹1,400 ਕਰੋੜ ਦੀ ਲਾਗਤ ਨਾਲ ਬਣਾਇਆ ਗਿਆ ਸੀ।
ਨੈਸ਼ਨਲ ਹਾਈਵੇ ਅਥਾਰਟੀ ਦੇ ਅਧਿਕਾਰੀਆਂ ਮੁਤਾਬਕ ਕੁਰਾਲੀ ‘ਚ ਕੰਮ, ਜੋ ਕਿ ਹਾਈ-ਟੈਂਸ਼ਨ ਪਾਵਰ ਲਾਈਨਾਂ ਕਾਰਨ ਰੁਕਿਆ ਹੋਇਆ ਸੀ, ਹੁਣ ਪੂਰਾ ਹੋ ਗਿਆ ਹੈ। ਸੜਕ ਦੇ ਨਿਸ਼ਾਨ ਅਤੇ ਕੁਝ ਅੰਤਿਮ ਛੋਹਾਂ ਬਾਕੀ ਹਨ, ਜੋ ਅਗਲੇ ਕੁਝ ਦਿਨਾਂ ;ਚ ਪੂਰੀਆਂ ਹੋ ਜਾਣਗੀਆਂ। ਅਧਿਕਾਰੀਆਂ ਨੇ ਦੱਸਿਆ ਕਿ ਟ੍ਰਾਇਲ ਰਨ 29 ਅਤੇ 30 ਨਵੰਬਰ ਨੂੰ ਕੀਤੇ ਜਾਣਗੇ, ਜਿਸ ਤੋਂ ਬਾਅਦ ਇਹ ਰਸਤਾ ਪੂਰੀ ਤਰ੍ਹਾਂ ਖੋਲ੍ਹ ਦਿੱਤਾ ਜਾਵੇਗਾ। ਇਸ ਵੇਲੇ ਇਸ ਸੜਕ ‘ਤੇ ਕੁਝ ਆਵਾਜਾਈ ਹੈ।
ਟ੍ਰੈਫਿਕ ਮਾਹਰਾਂ ਦਾ ਕਹਿਣਾ ਹੈ ਕਿ ਗ੍ਰੀਨਫੀਲਡ ਰੋਡ ਦੇ ਖੁੱਲ੍ਹਣ ਨਾਲ ਬੱਦੀ, ਨਿਊ ਚੰਡੀਗੜ੍ਹ ਅਤੇ ਮੋਹਾਲੀ ਦੇ ਉਦਯੋਗਿਕ ਖੇਤਰਾਂ ਵਿਚਾਲੇ ਯਾਤਰਾ ਤੇਜ਼ ਅਤੇ ਆਸਾਨ ਹੋ ਜਾਵੇਗੀ। ਇਸ ਨਾਲ ਵਪਾਰਕ ਗਤੀਵਿਧੀਆਂ ਨੂੰ ਵੀ ਹੁਲਾਰਾ ਮਿਲਣ ਦੀ ਉਮੀਦ ਹੈ। ਪ੍ਰੋਜੈਕਟ ‘ਚ ਸ਼ਾਮਲ ਇੰਜੀਨੀਅਰਾਂ ਨੇ ਕਿਹਾ ਕਿ ਸੁਰੱਖਿਆ ਨੂੰ ਤਰਜੀਹ ਦਿੰਦੇ ਹੋਏ ਆਧੁਨਿਕ ਤਕਨਾਲੋਜੀ ਦੀ ਵਰਤੋਂ ਕੀਤੀ ਹੈ। ਸੜਕ ਦੇ ਦੋਵੇਂ ਪਾਸੇ ਸਰਵਿਸ ਲੇਨ ਬਣਾਏ ਗਏ ਹਨ ਅਤੇ ਅਤਿ-ਆਧੁਨਿਕ ਸੜਕ ਸਾਈਨ ਬੋਰਡ ਲਗਾਏ ਹਨ।
Read More: ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਵੱਲੋਂ ‘ਲੀਡਰਸ਼ਿਪ ਇਨ ਮੈਂਟਲ ਹੈਲਥ’ ਪ੍ਰੋਗਰਾਮ ਦੀ ਸ਼ੁਰੂਆਤ
