ਲੰਡਨ, 14 ਜੂਨ 2025: AUS ਬਨਾਮ SA WTC Final: ਦੱਖਣੀ ਅਫ਼ਰੀਕਾ ਓਪਨਰ ਏਡਨ ਮਾਰਕਰਾਮ (Aiden Markram) (ਨਾਬਾਦ 102) ਦੇ ਸੈਂਕੜੇ ਅਤੇ ਕਪਤਾਨ ਤੇਂਬਾ ਬਵੁਮਾ (ਨਾਬਾਦ 65) ਨਾਲ ਤੀਜੀ ਵਿਕਟ ਲਈ 143 ਦੌੜਾਂ ਦੀ ਅਟੁੱਟ ਸਾਂਝੇਦਾਰੀ ਦੇ ਪਿੱਛੇ ਇਤਿਹਾਸ ਰਚਣ ਦੇ ਨੇੜੇ ਹੈ।
ਦੱਖਣੀ ਅਫ਼ਰੀਕਾ ਨੇ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਫਾਈਨਲ ‘ਚ ਸ਼ੁੱਕਰਵਾਰ ਨੂੰ ਤੀਜੇ ਦਿਨ ਦੇ ਅੰਤ ‘ਚ ਦੋ ਵਿਕਟਾਂ ‘ਤੇ 213 ਦੌੜਾਂ ਬਣਾ ਕੇ ਆਪਣੀ ਸਥਿਤੀ ਮਜ਼ਬੂਤ ਕਰ ਲਈ ਹੈ। ਦੱਖਣੀ ਅਫ਼ਰੀਕਾ ਨੂੰ 27 ਸਾਲਾਂ ‘ਚ ਆਪਣਾ ਪਹਿਲਾ ਆਈਸੀਸੀ ਖਿਤਾਬ ਜਿੱਤਣ ਲਈ 69 ਹੋਰ ਦੌੜਾਂ ਦੀ ਲੋੜ ਹੈ |
ਏਡਨ ਮਾਰਕਰਮ ਨੇ ਬਣਾਇਆ ਰਿਕਾਰਡ
ਲਾਰਡਜ਼ ‘ਚ ਇੱਕ ਸੈਂਕੜਾ ਦੇ ਨਾਲ ਮਾਰਕਰਾਮ (Aiden Markram) ਆਸਟ੍ਰੇਲੀਆ ਦੇ ਮਹਾਨ ਸਰ ਡੌਨ ਬ੍ਰੈਡਮੈਨ ਅਤੇ ਵੈਸਟਇੰਡੀਜ਼ ਦੇ ਗੋਰਡਨ ਗ੍ਰੀਨਿਜ ਦੇ ਵਿਸ਼ੇਸ਼ ਕਲੱਬ ‘ਚ ਸ਼ਾਮਲ ਹੋ ਗਿਆ। ਭਾਰਤ ਕੋਲ ਅਜੀਤ ਅਗਰਕਰ ਦੇ ਰੂਪ ‘ਚ ਇਸ ਕਲੱਬ ‘ਚ ਇੱਕ ਖਿਡਾਰੀ ਵੀ ਹੈ। ਮਾਰਕਰਾਮ ਦਾ ਸੈਂਕੜਾ ਦੱਖਣੀ ਅਫ਼ਰੀਕੀ ਬੱਲੇਬਾਜ਼ ਵੱਲੋਂ ਆਈਸੀਸੀ ਟੂਰਨਾਮੈਂਟ ਦੇ ਫਾਈਨਲ ‘ਚ ਲਗਾਇਆ ਗਿਆ ਪਹਿਲਾ ਸੈਂਕੜਾ ਹੈ। ਇਹ ਟੈਸਟਾਂ ‘ਚ ਉਨ੍ਹ ਦਾ ਅੱਠਵਾਂ ਸੈਂਕੜਾ ਹੈ।
ਏਡਨ ਮਾਰਕਰਮ ਲਾਰਡਜ਼ ਵਿਖੇ ਚੌਥੀ ਪਾਰੀ ‘ਚ ਸੈਂਕੜਾ ਲਗਾਉਣ ਵਾਲੇ ਛੇਵੇਂ ਬੱਲੇਬਾਜ਼ (ਇੰਗਲੈਂਡ ਤੋਂ ਬਾਹਰ ਕਿਸੇ ਬੱਲੇਬਾਜ਼ ਦੁਆਰਾ) ਬਣੇ। ਉਨ੍ਹਾਂ ਤੋਂ ਪਹਿਲਾਂ, ਆਸਟ੍ਰੇਲੀਆ ਦੇ ਮਹਾਨ ਬ੍ਰੈਡਮੈਨ ਨੇ 1938 ‘ਚ ਇੰਗਲੈਂਡ ਵਿਰੁੱਧ, ਵੈਸਟ ਇੰਡੀਜ਼ ਦੇ ਰਾਏ ਫਰੈਡਰਿਕਸ ਨੇ 1976 ‘ਚ ਇੰਗਲੈਂਡ ਵਿਰੁੱਧ, ਵੈਸਟ ਇੰਡੀਜ਼ ਦੇ ਗੋਰਡਨ ਗ੍ਰੀਨਿਜ ਨੇ 1984 ‘ਚ ਇੰਗਲੈਂਡ ਵਿਰੁੱਧ, ਭਾਰਤ ਦੇ ਅਜੀਤ ਅਗਰਕਰ ਨੇ 2002 ‘ਚ ਇੰਗਲੈਂਡ ਵਿਰੁੱਧ ਅਤੇ ਆਸਟ੍ਰੇਲੀਆ ਦੇ ਮਾਈਕਲ ਕਲਾਰਕ ਨੇ 2009 ‘ਚ ਇੰਗਲੈਂਡ ਵਿਰੁੱਧ ਇਹ ਕਾਰਨਾਮਾ ਕੀਤਾ ਸੀ।
ਦੱਖਣੀ ਅਫ਼ਰੀਕਾ ਦੀ ਟੀਮ ਆਪਣੇ ਕ੍ਰਿਕਟ ਇਤਿਹਾਸ ‘ਚ ਤੀਜੀ ਵਾਰ ਆਈਸੀਸੀ ਪੁਰਸ਼ ਟੂਰਨਾਮੈਂਟ ਦਾ ਫਾਈਨਲ ਖੇਡ ਰਹੀ ਹੈ। ਟੀਮ ਨੇ ਇਸ ਤੋਂ ਪਹਿਲਾਂ 1998 ‘ਚ ਚੈਂਪੀਅਨਜ਼ ਟਰਾਫੀ ਅਤੇ 2024 ‘ਚ ਟੀ-20 ਵਿਸ਼ਵ ਕੱਪ ਦਾ ਖਿਤਾਬ ਮੈਚ ਖੇਡਿਆ ਸੀ। ਹਾਲਾਂਕਿ, ਟੀਮ ਦਾ ਕੋਈ ਵੀ ਖਿਡਾਰੀ ਦੋਵਾਂ ਮੈਚਾਂ ‘ਚ ਸੈਂਕੜਾ ਨਹੀਂ ਲਗਾ ਸਕਿਆ।
Read More: AUS ਬਨਾਮ SA WTC Final: ਦੱਖਣੀ ਅਫਰੀਕਾ ਵਿਸ਼ਵ ਟੈਸਟ ਚੈਂਪੀਅਨ ਦਾ ਖ਼ਿਤਾਬ ਜਿੱਤਣ ਤੋਂ 69 ਦੌੜਾਂ ਦੂਰ
