ਦਿੱਲੀ, 16 ਫਰਵਰੀ 2026: India AI Impact Summit 2026: “ਇੰਡੀਆ ਏਆਈ ਇਮਪੈਕਟ ਸਮਿਟ 2026” ਭਾਰਤ ਦੀ ਰਾਜਧਾਨੀ ਨਵੀਂ ਦਿੱਲੀ ‘ਚ 16 ਤੋਂ 20 ਫਰਵਰੀ ਤੱਕ ਭਾਰਤ ਮੰਡਪਮ ਵਿਖੇ ਕਰਵਾਇਆ ਜਾ ਰਿਹਾ ਹੈ। ਇਸ ਸੰਮਲੇਨ ਦੇ ਨਾਲ “ਇੰਡੀਆ ਏਆਈ ਇਮਪੈਕਟ ਐਕਸਪੋ 2026” ਵੀ ਹੋਵੇਗਾ, ਜਿੱਥੇ ਦੁਨੀਆ ਭਰ ਦੀਆਂ ਕੰਪਨੀਆਂ ਆਪਣੇ ਨਵੀਨਤਮ ਏਆਈ ਉਤਪਾਦਾਂ ਅਤੇ ਹੱਲਾਂ ਦਾ ਪ੍ਰਦਰਸ਼ਨ ਕਰਨਗੀਆਂ।
ਇਸ ਪ੍ਰੋਗਰਾਮ ਦਾ ਉਦੇਸ਼ ਇਹ ਦਰਸਾਉਣਾ ਹੈ ਕਿ ਕਿਵੇਂ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਨੂੰ ਸਿੱਖਿਆ, ਸਿਹਤ ਸੰਭਾਲ ਅਤੇ ਖੇਤੀਬਾੜੀ ਸਮੇਤ ਵੱਖ-ਵੱਖ ਖੇਤਰਾਂ ‘ਚ ਵਰਤਿਆ ਜਾ ਸਕਦਾ ਹੈ, ਤਾਂ ਜੋ ਆਮ ਲੋਕਾਂ ਦੇ ਜੀਵਨ ਨੂੰ ਬਦਲਿਆ ਜਾ ਸਕੇ ਅਤੇ ਬਿਹਤਰ ਬਣਾਇਆ ਜਾ ਸਕੇ।
ਸੰਮਲੇਨ ‘ਚ ਜਨਤਾ ਲਈ ਕੀ ਖਾਸ ?
ਇਸ ਮੌਕੇ 30 ਤੋਂ ਵੱਧ ਦੇਸ਼ਾਂ ਦੀਆਂ 300 ਤੋਂ ਵੱਧ ਕੰਪਨੀਆਂ ਲਗਭੱਗ 70,000 ਵਰਗ ਮੀਟਰ ਦੇ ਖੇਤਰ ‘ਚ ਫੈਲੇ ਇਸ ਐਕਸਪੋ ‘ਚ ਹਿੱਸਾ ਲੈਣਗੀਆਂ। ਲੋਕ ਲਾਈਵ ਡੈਮੋ ਰਾਹੀਂ ਇਹ ਦੇਖ ਸਕਣਗੇ ਕਿ ਏਆਈ ਅਸਲ ਜ਼ਿੰਦਗੀ ‘ਚ ਕਿਵੇਂ ਕੰਮ ਕਰਦਾ ਹੈ।
ਨੌਜਵਾਨਾਂ ਲਈ ਵਿਸ਼ੇਸ਼ ਪ੍ਰੋਗਰਾਮ
ਵਿਦਿਆਰਥੀਆਂ ਅਤੇ ਨੌਜਵਾਨਾਂ ਲਈ “YUVAi” ਅਤੇ “AI for ALL” ਵਰਗੇ ਪ੍ਰੋਗਰਾਮ ਕਰਵਾਏ ਜਾਣਗੇ। ਇਹ ਨੌਜਵਾਨਾਂ ਨੂੰ ਇਹ ਸਮਝਣ ‘ਚ ਮੱਦਦ ਕਰਨਗੇ ਕਿ ਏਆਈ ਟੂਲਸ ਨੂੰ ਉਨ੍ਹਾਂ ਦੀ ਪੜ੍ਹਾਈ ਅਤੇ ਕਰੀਅਰ ‘ਚ ਕਿਵੇਂ ਵਰਤਿਆ ਜਾ ਸਕਦਾ ਹੈ।
ਰੋਜ਼ਾਨਾ ਸਮੱਸਿਆਵਾਂ ਦਾ ਹੱਲ
ਐਕਸਪੋ ‘ਚ ਏਆਈ ਮਾਡਲ ਪ੍ਰਦਰਸ਼ਿਤ ਕੀਤੇ ਜਾਣਗੇ ਜੋ ਫਸਲਾਂ ਦੀਆਂ ਬਿਮਾਰੀਆਂ ਦੀ ਪਛਾਣ ਕਰਨ, ਹਸਪਤਾਲਾਂ ‘ਚ ਬਿਹਤਰ ਇਲਾਜ ਪ੍ਰਦਾਨ ਕਰਨ ਅਤੇ ਭਾਸ਼ਾ ਅਨੁਵਾਦ ਦੀ ਸਹੂਲਤ ਦੇਣ ‘ਚ ਮੱਦਦ ਕਰਦੇ ਹਨ।
ਸਟਾਰਟਅੱਪਸ ਨਾਲ ਸਿੱਧੀ ਗੱਲਬਾਤ
ਭਾਰਤੀ ਅਤੇ ਵਿਦੇਸ਼ੀ ਸਟਾਰਟਅੱਪ ਆਪਣੇ ਨਵੀਨਤਾਕਾਰੀ ਉਤਪਾਦਾਂ ਦਾ ਪ੍ਰਦਰਸ਼ਨ ਕਰਨਗੇ। ਜਨਤਾ ਇਨ੍ਹਾਂ ਤਕਨੀਕੀ ਨਵੀਨਤਾਕਾਰਾਂ ਨਾਲ ਸਿੱਧੇ ਤੌਰ ‘ਤੇ ਗੱਲਬਾਤ ਕਰਕੇ ਭਵਿੱਖ ਦੀਆਂ ਤਕਨਾਲੋਜੀਆਂ ਨੂੰ ਸਮਝ ਸਕੇਗੀ। ਮਹਿਮਾਨ ਥੀਮੈਟਿਕ ਪੈਵੇਲੀਅਨਾਂ ‘ਚ ਸਮਾਰਟ ਸਿਹਤ ਨਿਗਰਾਨੀ ਪ੍ਰਣਾਲੀਆਂ ਅਤੇ ਏਆਈ ਟਿਊਟਰਾਂ ਵਰਗੇ ਸਾਧਨਾਂ ਦਾ ਅਨੁਭਵ ਕਰਨ ਦੇ ਯੋਗ ਹੋਣਗੇ।
100 ਤੋਂ ਵੱਧ ਦੇਸ਼ਾਂ ਤੋਂ ਭਾਗੀਦਾਰੀ
100 ਤੋਂ ਵੱਧ ਦੇਸ਼ਾਂ ਦੇ ਡੈਲੀਗੇਟਾਂ ਦੇ ਸੰਮੇਲਨ ‘ਚ ਸ਼ਾਮਲ ਹੋਣ ਦੀ ਉਮੀਦ ਹੈ। ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਅਤੇ ਬ੍ਰਾਜ਼ੀਲ ਦੇ ਰਾਸ਼ਟਰਪਤੀ ਲੁਈਜ਼ ਇਨਾਸੀਓ ਲੂਲਾ ਦਾ ਸਿਲਵਾ ਸਮੇਤ 15-20 ਦੇਸ਼ਾਂ ਦੇ ਰਾਜ ਮੁਖੀ ਅਤੇ ਮੰਤਰੀ ਅਤੇ 50 ਤੋਂ ਵੱਧ ਮੰਤਰੀ ਹਿੱਸਾ ਲੈਣਗੇ।
ਰਾਜਨੇਤਾਵਾਂ ਦੇ ਨਾਲ, ਤਕਨੀਕੀ ਜਗਤ ਦੇ ਪ੍ਰਮੁੱਖ ਨਾਮ ਵੀ ਇਸ ਸਮਾਗਮ ‘ਚ ਮੌਜੂਦ ਰਹਿਣਗੇ। ਸੁੰਦਰ ਪਿਚਾਈ, ਸੈਮ ਅਲਟਮੈਨ ਅਤੇ ਬਿਲ ਗੇਟਸ ਵਰਗੀਆਂ ਪ੍ਰਮੁੱਖ ਹਸਤੀਆਂ ਦੇ ਸੰਮੇਲਨ ‘ਚ ਸ਼ਾਮਲ ਹੋਣ ਦੀ ਉਮੀਦ ਹੈ। ਭਾਰਤੀ ਉਦਯੋਗ ਤੋਂ, ਰਿਲਾਇੰਸ ਇੰਡਸਟਰੀਜ਼ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ, ਟਾਟਾ ਸੰਨਜ਼ ਦੇ ਐਨ ਚੰਦਰਸ਼ੇਖਰਨ, ਇਨਫੋਸਿਸ ਦੇ ਨੰਦਨ ਨੀਲੇਕਣੀ, ਭਾਰਤੀ ਐਂਟਰਪ੍ਰਾਈਜ਼ਿਜ਼ ਦੇ ਸੁਨੀਲ ਭਾਰਤੀ ਮਿੱਤਲ, ਟੀਸੀਐਸ ਦੇ ਸੀਈਓ ਕੇ. ਕ੍ਰਿਤੀਵਾਸਨ, ਅਤੇ ਐਚਸੀਐਲ ਟੈਕ ਦੀ ਰੋਸ਼ਨੀ ਨਾਦਰ ਮਲਹੋਤਰਾ ਵੀ ਮੌਜੂਦ ਰਹਿਣਗੇ।
16 ਫਰਵਰੀ ਨੂੰ ਮਾਹਰਾਂ ਅਤੇ ਨੀਤੀ ਨਿਰਮਾਤਾਵਾਂ ਵਿਚਾਲੇ ਗੋਲਮੇਜ਼ ਵਿਚਾਰ-ਵਟਾਂਦਰੇ ਹੋਣਗੇ । ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਸ਼ਾਮ 5 ਵਜੇ ‘ਇੰਡੀਆ ਏਆਈ ਐਕਸਪੋ’ ਦਾ ਉਦਘਾਟਨ ਕਰਨਗੇ।
Read More: ਬੰਗਲਾਦੇਸ਼ ਦੀ ਨਵੀਂ ਸਰਕਾਰ ਦੇ ਪ੍ਰਧਾਨ ਮੰਤਰੀ ਦਾ ਸਹੁੰ ਚੁੱਕ ਸਮਾਗਮ
