ਅਮਰੀਕਾ, 09 ਅਪ੍ਰੈਲ 2026: ਅਮਰੀਕਾ ‘ਚ “ਕੇਟਾਮਾਈਨ ਕਵੀਨ” ਵਜੋਂ ਜਾਣੀ ਜਾਂਦੀ ਜਸਵੀਨ ਸੰਘਾ ਨੂੰ 15 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਲਾਸ ਏਂਜਲਸ ਫੈਡਰਲ ਕੋਰਟ ਦੇ ਜੱਜ ਸ਼ੈਰਿਲਿਨ ਪੀਸ ਗਾਰਨੇਟ ਨੇ 8 ਅਪ੍ਰੈਲ ਨੂੰ ਸਜ਼ਾ ਸੁਣਾਉਂਦੇ ਹੋਏ ਕਿਹਾ ਕਿ ਸੰਘਾ ਨੇ ਹਾਈ-ਪ੍ਰੋਫਾਈਲ ਗਾਹਕਾਂ ਨੂੰ ਨਸ਼ੀਲੇ ਪਦਾਰਥ ਸਪਲਾਈ ਕਰਕੇ ਐਸ਼ੋ-ਆਰਾਮ ਦੀ ਜ਼ਿੰਦਗੀ ਬਤੀਤ ਕੀਤੀ।
ਉਨ੍ਹਾਂ ‘ਤੇ ਮਸ਼ਹੂਰ “ਫ੍ਰੈਂਡਜ਼” ਅਦਾਕਾਰ ਮੈਥਿਊ ਪੈਰੀ ਦੀ ਮੌਤ ‘ਚ ਸਿੱਧੀ ਭੂਮਿਕਾ ਸਾਹਮਣੇ ਆਈ ਹੈ। ਪੈਰੀ ਦੀ ਮੌਤ 2023 ‘ਚ ਓਵਰਡੋਜ਼ ਕਾਰਨ ਹੋਈ ਸੀ। ਜਸਵੀਨ ਨੇ ਖੁਦ ਮੰਨਿਆ ਕਿ ਉਸਨੇ ਪੈਰੀ ਨੂੰ ਕੇਟਾਮਾਈਨ ਵੇਚੀ ਸੀ। ਜਸਵੀਨ ਸੰਘਾ ਦਾ ਪਰਿਵਾਰ ਜਲੰਧਰ ਦੇ ਨੇੜੇ ਫਿਲੌਰ ਨਾਲ ਸੰਬੰਧਿਤ ਹੈ।
ਜਸਵੀਨ ਸੰਘਾ, ਜੋ ਕਿ ਜਲੰਧਰ ਦੇ ਸੰਘਾ ਪਿੰਡ ਦੇ ਸੰਘਾ ਕਬੀਲੇ ਨਾਲ ਸਬੰਧਤ ਹੈ, ਉਨ੍ਹਾਂ ਦਾ ਜਨਮ 22 ਜੁਲਾਈ, 1983 ਨੂੰ ਲੰਡਨ, ਯੂਕੇ ‘ਚ ਹੋਇਆ ਸੀ। ਉਸਦੀ ਮਾਂ, ਨੀਲਮ ਸਿੰਘ, ਅਤੇ ਪਿਤਾ, ਬਲਜੀਤ ਸਿੰਘ ਉਦਯੋਗਪਤੀ ਹਨ। ਉਸਦੇ ਦਾਦਾ-ਦਾਦੀ ਪੂਰਬੀ ਲੰਡਨ ‘ਚ ਇੱਕ ਫੈਸ਼ਨ ਰਿਟੇਲ ਕਾਰੋਬਾਰ ਚਲਾਉਂਦੇ ਹਨ ਅਤੇ ਸ਼ਾਹੀ ਵੰਸ਼ ਦੇ ਹਨ।
ਬਾਅਦ ‘ਚ ਇਹ ਪਰਿਵਾਰ ਕੈਲੀਫੋਰਨੀਆ ਦੇ ਕੈਲਾਬਾਸਾਸ ਚਲਾ ਗਿਆ, ਜਿੱਥੇ ਜਸਵੀਨ ਨੇ ਆਪਣਾ ਬਚਪਨ ਬਿਤਾਇਆ। ਉਹ ਅਮਰੀਕਾ-ਯੂਕੇ ਦੀ ਦੋਹਰੀ ਨਾਗਰਿਕਤਾ ਰੱਖਦੀ ਹੈ। ਜਸਵੀਨ ਸੰਘਾ ਨੇ 2001 ਵਿੱਚ ਕੈਲਾਬਾਸਾਸ ਦੇ ਹਾਈ ਸਕੂਲ ਤੋਂ ਗ੍ਰੈਜੂਏਸ਼ਨ ਕੀਤੀ, ਕੈਲੀਫੋਰਨੀਆ ਯੂਨੀਵਰਸਿਟੀ, ਇਰਵਿਨ ਤੋਂ ਬੀਏ ਕੀਤੀ, ਅਤੇ ਹਲਟ ਬਿਜ਼ਨਸ ਸਕੂਲ ਤੋਂ ਐਮਬੀਏ ਕੀਤੀ। ਉਸਨੇ ਕੁਝ ਸਮੇਂ ਲਈ ਕੰਮ ਵੀ ਕੀਤਾ, ਪਰ ਬਾਅਦ ‘ਚ ਉੱਤਰੀ ਹਾਲੀਵੁੱਡ, ਲਾਸ ਏਂਜਲਸ ‘ਚ ਆਪਣੇ ਘਰ ਨੂੰ ਇੱਕ ਸਟੈਸ਼ ਹਾਊਸ ‘ਚ ਬਦਲ ਦਿੱਤਾ, ਜਿੱਥੇ ਕੇਟਾਮਾਈਨ ਅਤੇ ਹੋਰ ਨਸ਼ੀਲੇ ਪਦਾਰਥ ਵੇਚੇ ਗਏ।
ਦੱਸਿਆ ਜਾ ਰਿਹਾ ਹੈ ਕਿ ਹਾਲੀਵੁੱਡ ਦੀਆਂ ਮਸ਼ਹੂਰ ਹਸਤੀਆਂ ਉਸਦੀਆਂ ਗਾਹਕ ਸਨ। ਸੋਸ਼ਲ ਮੀਡੀਆ ‘ਤੇ, ਉਸਨੇ ਆਪਣੇ ਆਪ ਨੂੰ ਇੱਕ ਆਰਟ ਕਿਊਰੇਟਰ ਅਤੇ ਇੱਕ ਆਲੀਸ਼ਾਨ ਜੀਵਨ ਸ਼ੈਲੀ ਵਾਲੀ ਔਰਤ ਵਜੋਂ ਦਰਸਾਇਆ। ਉਸਦੇ ਕੋਲ ਮਹਿੰਗੇ ਐਲਵੀ ਪਰਸਾਂ ਅਤੇ ਬੈਗਾਂ ਦਾ ਸੰਗ੍ਰਹਿ ਸੀ। ਉਸਨੂੰ ਵਿਦੇਸ਼ ‘ਚ ਛੁੱਟੀਆਂ ਮਨਾਉਣਾ ਪਸੰਦ ਸੀ।
ਜਸਵੀਨ ਨੂੰ ਅਗਸਤ 2024 ‘ਚ ਦੁਬਾਰਾ ਗ੍ਰਿਫਤਾਰ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ, ਉਸਨੂੰ ਮਾਰਚ 2024 ‘ਚ ਇੱਕ ਹੋਰ ਡਰੱਗ ਮਾਮਲੇ ‘ਚ ਗ੍ਰਿਫਤਾਰ ਕੀਤਾ ਗਿਆ ਸੀ। ਸੰਘਾ ਇਸ ਮਾਮਲੇ ‘ਚ ਪੰਜ ਮੁਲਜ਼ਮਾਂ ‘ਚ ਸ਼ਾਮਲ ਸੀ, ਜਿਨ੍ਹਾਂ ‘ਚ ਦੋ ਡਾਕਟਰ ਅਤੇ ਪੈਰੀ ਦਾ ਸਹਾਇਕ ਸ਼ਾਮਲ ਸੀ। ਸਤੰਬਰ 2025 ‘ਚ ਉਸਨੇ ਦੋਸ਼ ਕਬੂਲ ਕੀਤੇ। ਅਦਾਲਤ ‘ਚ, ਜਸਵੀਨ ਦੇ ਵਕੀਲਾਂ ਨੇ ਉਸਦੇ ਪਹਿਲੀ ਵਾਰ ਅਪਰਾਧ ਅਤੇ ਜੇਲ੍ਹ ‘ਚ ਚੰਗੇ ਵਿਵਹਾਰ ਦਾ ਹਵਾਲਾ ਦਿੰਦੇ ਹੋਏ, ਸਜ਼ਾ ਘਟਾਉਣ ਦੀ ਅਪੀਲ ਕੀਤੀ। ਹਾਲਾਂਕਿ, ਜੱਜ ਨੇ ਮਾਮਲੇ ‘ਚ ਸਖ਼ਤੀ ਦਿਖਾਈ।
ਅਕਤੂਬਰ 2023 ‘ਚ ਸੰਘਾ ਨੇ ਪੈਰੀ ਦੇ ਸਹਾਇਕ ਨੂੰ ਕੇਟਾਮਾਈਨ ਵੇਚੀ, ਜਿਸ ਕਾਰਨ ਪੈਰੀ ਦੀ ਮੌਤ ਹੋ ਗਈ। ਸਬੂਤਾਂ ਨੂੰ ਨਸ਼ਟ ਕਰਨ ਦੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ, ਸੰਘਾ ਨੇ ਸਤੰਬਰ 2025 ‘ਚ ਦੋਸ਼ੀ ਮੰਨਿਆ। 8 ਅਪ੍ਰੈਲ ਨੂੰ ਅਦਾਲਤ ਨੇ ਉਸਨੂੰ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਅਤੇ ਪੈਰੀ ਦੀ ਮੌਤ ਦਾ ਦੋਸ਼ੀ ਠਹਿਰਾਇਆ, ਉਸਨੂੰ 15 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ।
Read More: ਇਜ਼ਰਾਈਲੀ ਫੌਜ ਨੇ ਲੇਬਨਾਨ ‘ਤੇ ਦਾਗੀਆਂ ਮਿਜ਼ਾਈਲਾਂ, 250 ਤੋਂ ਵੱਧ ਜਣਿਆਂ ਦੀ ਮੌ.ਤ
