ਚੰਡੀਗੜ੍ਹ, 20 ਅਪ੍ਰੈਲ 2024: ਸ਼ੁੱਕਰਵਾਰ ਦਾ ਦਿਨ ਭਾਰਤ ਦੇ ਰੱਖਿਆ ਖੇਤਰ ਲਈ ਬਹੁਤ ਮਹੱਤਵਪੂਰਨ ਦਿਨ ਸੀ। ਭਾਰਤ ਵਿੱਚ ਨਿਰਮਿਤ ਬ੍ਰਹਮੋਸ (BrahMos) ਸੁਪਰਸੋਨਿਕ ਕਰੂਜ਼ ਮਿਜ਼ਾਈਲ ਦੀ ਪਹਿਲੀ ਖੇਪ ਫਿਲੀਪੀਨਜ਼ ਪਹੁੰਚ ਗਈ ਹੈ। ਇਕ ਸਮਝੌਤੇ ਤਹਿਤ ਫਿਲੀਪੀਨਜ਼ ਨੂੰ ਮਿਜ਼ਾਈਲ ਦੀ ਸਪਲਾਈ ਕੀਤੀ ਗਈ ਹੈ। ਇਸ ਹਥਿਆਰ ਪ੍ਰਣਾਲੀ ਲਈ 2022 ਵਿੱਚ ਦੋਵਾਂ ਦੇਸ਼ਾਂ ਵਿਚਾਲੇ 375 ਮਿਲੀਅਨ ਅਮਰੀਕੀ ਡਾਲਰ (ਲਗਭਗ 31.26 ਅਰਬ ਰੁਪਏ) ਦੇ ਸੌਦੇ ‘ਤੇ ਹਸਤਾਖਰ ਕੀਤੇ ਗਏ ਸਨ।
ਇਹ ਰੱਖਿਆ ਉਪਕਰਨਾਂ ਦੇ ਨਿਰਯਾਤ ਦੀ ਦਿਸ਼ਾ ਵਿੱਚ ਭਾਰਤ ਲਈ ਇੱਕ ਮਹੱਤਵਪੂਰਨ ਕਦਮ ਹੈ। ਇਸ ਦੇ ਨਾਲ ਹੀ ਇਹ ਸੌਦਾ ਫਿਲੀਪੀਨਜ਼ ਲਈ ਵੀ ਮਾਅਨੇ ਰੱਖਦਾ ਹੈ। ਦੱਖਣੀ ਚੀਨ ਸਾਗਰ ‘ਚ ਲਗਾਤਾਰ ਝੜੱਪਾਂ ਕਾਰਨ ਫਿਲੀਪੀਨਜ਼ ਦਾ ਚੀਨ ਨਾਲ ਤਣਾਅ ਵਧਦਾ ਜਾ ਰਿਹਾ ਹੈ। ਅਜਿਹੇ ਸਮੇਂ ਵਿੱਚ ਫਿਲੀਪੀਨਜ਼ ਨੂੰ ਮਿਲੀ ਮਿਜ਼ਾਈਲ ਪ੍ਰਣਾਲੀ ਬਹੁਤ ਮਹੱਤਵਪੂਰਨ ਹੈ।
ਬ੍ਰਹਮੋਸ ਮਿਜ਼ਾਈਲ ਚਰਚਾ ‘ਚ ਕਿਉਂ ?
ਭਾਰਤ ਨੇ ਪਹਿਲੀ ਵਾਰ ਬ੍ਰਹਮੋਸ (BrahMos) ਸੁਪਰਸੋਨਿਕ ਮਿਜ਼ਾਈਲਾਂ ਦਾ ਨਿਰਯਾਤ ਕੀਤਾ ਹੈ। ਦਰਅਸਲ, ਭਾਰਤ ਨੇ ਫਿਲੀਪੀਨਜ਼ ਨੂੰ ਬ੍ਰਹਮੋਸ ਸੁਪਰਸੋਨਿਕ ਮਿਜ਼ਾਈਲਾਂ ਦੀ ਸਪਲਾਈ ਸ਼ੁਰੂ ਕਰ ਦਿੱਤੀ ਹੈ। ਇਸ ਤਹਿਤ ਸ਼ੁੱਕਰਵਾਰ ਨੂੰ ਬ੍ਰਹਮੋਸ ਸੁਪਰਸੋਨਿਕ ਮਿਜ਼ਾਈਲਾਂ ਦੀ ਪਹਿਲੀ ਖੇਪ ਫਿਲੀਪੀਨਜ਼ ਪਹੁੰਚੀ। ਸੌਦੇ ਵਿੱਚ ਤਿੰਨ ਬੈਟਰੀਆਂ ਦੀ ਸਪੁਰਦਗੀ, ਆਪਰੇਟਰਾਂ ਅਤੇ ਐਸਕਾਰਟ ਲਈ ਸਿਖਲਾਈ ਦੇ ਨਾਲ-ਨਾਲ ਲੋੜੀਂਦਾ ਏਕੀਕ੍ਰਿਤ ਲੌਜਿਸਟਿਕਸ ਸਪੋਰਟ (ILS) ਪੈਕੇਜ ਸ਼ਾਮਲ ਹੈ। ਬ੍ਰਹਮੋਸ ਸੁਪਰਸੋਨਿਕ ਮਿਜ਼ਾਈਲ ਦੀ ਰੇਂਜ 290 ਕਿਲੋਮੀਟਰ ਹੈ ਅਤੇ ਇਹ 200 ਕਿਲੋਗ੍ਰਾਮ ਵਾਰਹੈੱਡ ਲੈ ਜਾ ਸਕਦੀ ਹੈ।
ਜਾਣਕਾਰੀ ਅਨੁਸਾਰ, ਬ੍ਰਹਮੋਸ ਲਈ ਸੌਦਾ 2017 ਦੀ ਸ਼ੁਰੂਆਤ ਵਿੱਚ ਸੰਕਲਪਿਤ ਕੀਤਾ ਗਿਆ ਸੀ। ਉਸ ਸਮੇਂ, ਫਿਲੀਪੀਨਜ਼ ਦੇ ਰਾਸ਼ਟਰਪਤੀ ਦੇ ਦਫਤਰ ਨੇ ਇਸ ਨੂੰ ਤਰਜੀਹੀ ਪ੍ਰੋਜੈਕਟਾਂ ਵਿੱਚੋਂ ਇੱਕ ਵਿੱਚ ਸ਼ਾਮਲ ਕਰਨ ਦੀ ਮਨਜ਼ੂਰੀ ਦਿੱਤੀ ਸੀ। ਦੋਵੇਂ ਧਿਰਾਂ 2021 ਦੀ ਸ਼ੁਰੂਆਤ ਵਿੱਚ ਇੱਕ ਸਮਝੌਤੇ ‘ਤੇ ਪਹੁੰਚਣਾ ਚਾਹੁੰਦੀਆਂ ਸਨ, ਪਰ ਕੋਰੋਨਾ ਮਹਾਂਮਾਰੀ ਕਾਰਨ ਯੋਜਨਾ ਵਿੱਚ ਦੇਰੀ ਹੋਈ |
ਇੱਕ ਪਾਸੇ ਫਿਲੀਪੀਨਜ਼ ਆਪਣੀ ਸੁਰੱਖਿਆ ਲਈ ਬ੍ਰਹਮੋਸ ਮਿਜ਼ਾਈਲ ਦੀ ਵਰਤੋਂ ਕਰੇਗਾ, ਦੂਜੇ ਪਾਸੇ ਇਹ ਸੌਦਾ ਭਾਰਤ ਦੇ ਰੱਖਿਆ ਖੇਤਰ ਲਈ ਬਹੁਤ ਮਹੱਤਵਪੂਰਨ ਹੈ। ਇਸ ਸੌਦੇ ਨਾਲ ਰੱਖਿਆ ਹਾਰਡਵੇਅਰ ਦਾ ਪ੍ਰਮੁੱਖ ਨਿਰਯਾਤਕ ਬਣਨ ਲਈ ਭਾਰਤ ਦੀਆਂ ਕੋਸ਼ਿਸ਼ਾਂ ਨੂੰ ਹੁਲਾਰਾ ਮਿਲਣ ਦੀ ਉਮੀਦ ਹੈ।