15 ਜੁਲਾਈ 2025: Tesla india: ਭਾਰਤ ‘ਚ ਆਪਣੇ ਪਹਿਲੇ ਸ਼ੋਅਰੂਮ ਦੀ ਸ਼ੁਰੂਆਤ ਦੇ ਨਾਲ ਟੇਸਲਾ ਨੇ ਦੇਸ਼ ‘ਚ ਆਪਣੀ ਪਹਿਲੀ ਇਲੈਕਟ੍ਰਿਕ ਕਾਰ ਮਾਡਲ ਵਾਈ (Model Y) ਵੀ ਲਾਂਚ ਕੀਤੀ ਹੈ। ਕੰਪਨੀ ਨੇ ਇਸ ਕਾਰ ਦੀ ਕੀਮਤ ਲਗਭਗ 60 ਲੱਖ ਰੁਪਏ (ਐਕਸ-ਸ਼ੋਰੂਮ) ਰੱਖੀ ਹੈ। ਟੇਸਲਾ ਦਾ ਪਹਿਲਾ ਸ਼ੋਅਰੂਮ ਮੁੰਬਈ ‘ਚ ਬਾਂਦਰਾ ਕੁਰਲਾ ਕੰਪਲੈਕਸ (ਬੀਕੇਸੀ) ਦੇ ਮੈਕਸਿਟੀ ਮਾਲ ‘ਚ ਖੁੱਲ੍ਹਾ ਹੈ। ਜਾਣਕਾਰੀ ਮੁਤਾਬਕ ਗਾਹਕਾਂ ਨੂੰ ਇਸ ਕਾਰ ਦੀ ਡਿਲੀਵਰੀ ਇਸ ਸਾਲ ਸਤੰਬਰ ਤੱਕ ਸ਼ੁਰੂ ਹੋ ਜਾਵੇਗੀ।
ਕੰਪਨੀ ਦੀ ਅਧਿਕਾਰਤ ਵੈੱਬਸਾਈਟ ਦੇ ਮੁਤਾਬਕ ਮੁੰਬਈ, ਦਿੱਲੀ ਅਤੇ ਗੁਰੂਗ੍ਰਾਮ ਲਈ ਮਾਡਲ Y ਦੀ ਬੁਕਿੰਗ ਸ਼ੁਰੂ ਕਰ ਦਿੱਤੀ ਗਈ ਹੈ। ਅਧਿਕਾਰਤ ਵੈੱਬਸਾਈਟ ਦੇ ਮੁਤਾਬਕ ਗਾਹਕਾਂ ਨੂੰ ਇਸ ਕਾਰ ਦੇ ਫੁੱਲ-ਸੈਲਫ ਡਰਾਈਵਿੰਗ (FSD) ਵੇਰੀਐਂਟ ਲਈ ਵੱਖਰੇ ਤੌਰ ‘ਤੇ 6 ਲੱਖ ਰੁਪਏ ਦੇਣੇ ਪੈਣਗੇ।
ਟੇਸਲਾ ਮਾਡਲ Y ਦੀਆਂ ਵਿਸ਼ੇਸ਼ਤਾਵਾਂ (Tesla Model Y Features)
ਇਸ ਇਲੈਕਟ੍ਰਿਕ ਕਾਰ ਨੂੰ ਦੋ ਵੱਖ-ਵੱਖ ਵੇਰੀਐਂਟਾਂ ‘ਚ ਪੇਸ਼ ਕੀਤਾ ਗਿਆ ਹੈ – ਲੌਂਗ ਰੇਂਜ ਆਲ ਵ੍ਹੀਲ ਡਰਾਈਵ (AWD) ਅਤੇ ਲੌਂਗ ਰੇਂਜ ਰੀਅਰ ਵ੍ਹੀਲ ਡਰਾਈਵ (RWD)। ਇਸਦੇ RWD ਵੇਰੀਐਂਟ ‘ਚ ਇੱਕ ਸਿੰਗਲ ਇਲੈਕਟ੍ਰਿਕ ਮੋਟਰ ਹੈ, ਜੋ ਲਗਭਗ 295 hp ਦੀ ਪਾਵਰ ਅਤੇ 420 Nm ਦਾ ਟਾਰਕ ਪੈਦਾ ਕਰਦੀ ਹੈ। ਇਸਦੀ ਪ੍ਰਮਾਣਿਤ ਰੇਂਜ 500 ਕਿਲੋਮੀਟਰ ਦੱਸੀ ਜਾਂਦੀ ਹੈ। ਕਾਰ ਨੂੰ 0 ਤੋਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਫੜਨ ‘ਚ ਸਿਰਫ਼ 5.6 ਸਕਿੰਟ ਲੱਗਦੇ ਹਨ।
AWD ਲੰਬੀ ਰੇਂਜ ਵਾਲੇ ਵੇਰੀਐਂਟ ਦੀ ਗੱਲ ਕਰੀਏ ਤਾਂ ਇਸਦੀ ਪ੍ਰਮਾਣਿਤ ਡਰਾਈਵਿੰਗ ਰੇਂਜ 622 ਕਿਲੋਮੀਟਰ ਹੈ। ਇਸ ਦੇ ਨਾਲ ਹੀ, ਇਸਦਾ ਮੋਟਰ 384 bhp ਪਾਵਰ ਅਤੇ 510 Nm ਟਾਰਕ ਪੈਦਾ ਕਰਦਾ ਹੈ। ਇਸਦੀ ਟਾਪ ਸਪੀਡ 217 ਕਿਲੋਮੀਟਰ ਪ੍ਰਤੀ ਘੰਟਾ ਦੱਸੀ ਜਾਂਦੀ ਹੈ।
15 ਮਿੰਟਾਂ ‘ਚ ਚਾਰਜ ਹੋ ਜਾਵੇਗੀ
ਟੈਸਲਾ ਨੇ ਆਪਣੀਆਂ ਮਾਡਲ Y ਕਾਰਾਂ ਨੂੰ ਤੇਜ਼ ਚਾਰਜਿੰਗ ਤਕਨਾਲੋਜੀ ਨਾਲ ਲੈਸ ਕੀਤਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਕਾਰ ਸਿਰਫ਼ 15 ਮਿੰਟਾਂ ‘ਚ 238 ਕਿਲੋਮੀਟਰ ਤੱਕ ਚੱਲਣ ਲਈ ਚਾਰਜ ਹੋ ਜਾਂਦੀ ਹੈ।
ਸੁਰੱਖਿਆ ਵਿਸ਼ੇਸ਼ਤਾਵਾਂ
ਟੇਸਲਾ ਮਾਡਲ Y ਦੇ ਸਾਰੇ ਵੇਰੀਐਂਟ ਲੈਵਲ-2 ADAS ਡਰਾਈਵਿੰਗ ਤਕਨਾਲੋਜੀ ਨਾਲ ਲੈਸ ਹਨ। ਇਸ ‘ਚ ਅੱਗੇ ਟੱਕਰ ਚੇਤਾਵਨੀ, ਆਟੋਮੈਟਿਕ ਐਮਰਜੈਂਸੀ ਬ੍ਰੇਕਿੰਗ, ਲੇਨ ਕੀਪ ਅਸਿਸਟ, ਸਪੀਡ ਲਿਮਟ ਅਸਿਸਟ ਵਰਗੀਆਂ ਕਈ ਵਿਸ਼ੇਸ਼ਤਾਵਾਂ ਹਨ। ਇਸ ਤੋਂ ਇਲਾਵਾ, ਕਾਰ ‘ਚ ਮਿਆਰੀ ਵਜੋਂ 6 ਏਅਰਬੈਗ ਵੀ ਦਿੱਤੇ ਗਏ ਹਨ।
Read More: TVS ਵੱਲੋਂ ਲਾਂਚ Apache RR 310 ਬਾਈਕ ਦੀ ਖ਼ਾਸੀਅਤ ਤੇ ਪਰਫਾਰਮੈਂਸ ‘ਤੇ ਇੱਕ ਨਜ਼ਰ
