ਸਪੋਰਟਸ, 27 ਅਗਸਤ 2025: ICC ODI Ranking: ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ICC) ਦੀ ਤਾਜ਼ਾ ਵਨਡੇ ਰੈਂਕਿੰਗ ‘ਚ ਭਾਰਤੀ ਬੱਲੇਬਾਜ਼ ਸ਼ੁਭਮਨ ਗਿੱਲ ਅਤੇ ਰੋਹਿਤ ਸ਼ਰਮਾ ਬੱਲੇਬਾਜ਼ਾਂ ਦੀ ਸੂਚੀ ‘ਚ ਸਿਖਰ ‘ਤੇ ਬਣੇ ਹੋਏ ਹਨ, ਜਦੋਂ ਕਿ ਵਿਰਾਟ ਕੋਹਲੀ ਚੌਥੇ ਨੰਬਰ ‘ਤੇ ਹਨ। ਆਸਟ੍ਰੇਲੀਆਈ ਖਿਡਾਰੀਆਂ ਨੂੰ ਵੀ ਹਾਲ ਹੀ ‘ਚ ਸੀਰੀਜ਼ ਦੇ ਆਖਰੀ ਮੈਚ ‘ਚ ਦੱਖਣੀ ਅਫਰੀਕਾ ‘ਤੇ ਰਿਕਾਰਡ ਜਿੱਤ ਤੋਂ ਬਾਅਦ ਫਾਇਦਾ ਹੋਇਆ ਹੈ। ਹਾਲਾਂਕਿ, ਦੱਖਣੀ ਅਫਰੀਕਾ ਨੇ ਸੀਰੀਜ਼ ਜਿੱਤੀ।
ਸ਼ੁਭਮਨ ਗਿੱਲ (784 ਰੇਟਿੰਗ ਅੰਕ) ਅਤੇ ਰੋਹਿਤ (756) ਕ੍ਰਮਵਾਰ ਪਹਿਲੇ ਅਤੇ ਦੂਜੇ ਸਥਾਨ ‘ਤੇ ਬਣੇ ਹੋਏ ਹਨ, ਜਦੋਂ ਕਿ ਪਾਕਿਸਤਾਨ ਦੇ ਬਾਬਰ ਆਜ਼ਮ (739) ਚੋਟੀ ਦੇ ਤਿੰਨਾਂ ‘ਚ ਸ਼ਾਮਲ ਹਨ। ਵਿਰਾਟ ਕੋਹਲੀ ਦੇ 736 ਅੰਕ ਹਨ। ਭਾਰਤੀ ਟੀਮ ਨੇ ਹਾਲ ਹੀ ਦੇ ਮਹੀਨਿਆਂ ‘ਚ ਵਨਡੇ ਮੈਚਾਂ ‘ਚ ਹਿੱਸਾ ਨਹੀਂ ਲਿਆ ਹੈ, ਪਰ ਗੇਂਦਬਾਜ਼ਾਂ ਦੀ ਤਾਜ਼ਾ ਇੱਕ ਰੋਜ਼ਾ ਦਰਜਾਬੰਦੀ ‘ਚ ਕੁਲਦੀਪ ਯਾਦਵ (650) ਅਤੇ ਰਵਿੰਦਰ ਜਡੇਜਾ (616) ਅਜੇ ਵੀ ਕ੍ਰਮਵਾਰ ਤੀਜੇ ਅਤੇ ਨੌਵੇਂ ਨੰਬਰ ‘ਤੇ ਹਨ।
ਰੋਹਿਤ ਅਤੇ ਕੋਹਲੀ ਟੀ-20 ਅਤੇ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਚੁੱਕੇ ਹਨ, ਪਰ ਦੋਵੇਂ ਵਨਡੇ ਫਾਰਮੈਟ ‘ਚ ਸਰਗਰਮ ਹਨ। ਰੋਹਿਤ ਅਤੇ ਕੋਹਲੀ ਦੋਵਾਂ ਨੇ ਆਖਰੀ ਵਾਰ ਫਰਵਰੀ 2025 ‘ਚ ਸੰਯੁਕਤ ਅਰਬ ਅਮੀਰਾਤ ‘ਚ ਆਈਸੀਸੀ ਚੈਂਪੀਅਨਜ਼ ਟਰਾਫੀ ਦੌਰਾਨ ਇੱਕ ਵਨਡੇ ਖੇਡਿਆ ਸੀ, ਜਿਸ ‘ਚ ਉਨ੍ਹਾਂ ਨੇ ਭਾਰਤ ਦੀ ਖਿਤਾਬੀ ਮੁਹਿੰਮ ‘ਚ ਮੁੱਖ ਭੂਮਿਕਾ ਨਿਭਾਈ ਸੀ।
ਆਸਟ੍ਰੇਲੀਆ ਨੇ ਦੱਖਣੀ ਅਫਰੀਕਾ ਵਿਰੁੱਧ ਮੈਕੇ ਵਿਖੇ ਤੀਜੇ ਅਤੇ ਆਖਰੀ ਵਨਡੇ ‘ਚ ਦੋ ਵਿਕਟਾਂ ‘ਤੇ 431 ਦੌੜਾਂ ਦਾ ਵਿਸ਼ਾਲ ਸਕੋਰ ਬਣਾਇਆ, ਜਿਸ ‘ਚ ਉਸਦੇ ਤਿੰਨ ਬੱਲੇਬਾਜ਼ ਟ੍ਰੈਵਿਸ ਹੈੱਡ (142), ਮਿਸ਼ੇਲ ਮਾਰਸ਼ (100) ਅਤੇ ਕੈਮਰਨ ਗ੍ਰੀਨ (118 ਨਾਬਾਦ) ਨੇ ਸੈਂਕੜੇ ਲਗਾਏ। ਇਸ ਪ੍ਰਦਰਸ਼ਨ ਕਾਰਨ ਤਿੰਨਾਂ ਨੂੰ ਰੈਂਕਿੰਗ ‘ਚ ਬਹੁਤ ਫਾਇਦਾ ਹੋਇਆ ਹੈ। ਹੈੱਡ ਇੱਕ ਸਥਾਨ ਦੇ ਸੁਧਾਰ ਨਾਲ 11ਵੇਂ ਸਥਾਨ ‘ਤੇ, ਮਾਰਸ਼ ਚਾਰ ਸਥਾਨ ਦੀ ਛਾਲ ਮਾਰ ਕੇ 44ਵੇਂ ਸਥਾਨ ‘ਤੇ ਅਤੇ ਗ੍ਰੀਨ 40 ਸਥਾਨ ਦੀ ਛਾਲ ਮਾਰ ਕੇ 78ਵੇਂ ਸਥਾਨ ‘ਤੇ ਪਹੁੰਚ ਗਿਆ ਹੈ।
Read More: ICC T20 Ranking: ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਟੀ-20 ਰੈੰਕਿੰਗ ‘ਚ ਨੰਬਰ-1 ਬੱਲੇਬਾਜ਼ ਬਣੇ
