ਸਪੋਰਟਸ, 17 ਸਤੰਬਰ 2025: BCCI selection committee: ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਰਾਸ਼ਟਰੀ ਚੋਣ ਕਮੇਟੀ ‘ਚ ਬਦਲਾਅ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। ਸਾਬਕਾ ਭਾਰਤੀ ਤੇਜ਼ ਗੇਂਦਬਾਜ਼ ਰੁਦਰ ਪ੍ਰਤਾਪ ਸਿੰਘ (ਆਰਪੀ ਸਿੰਘ) ਅਤੇ ਖੱਬੇ ਹੱਥ ਦੇ ਸਪਿਨਰ ਪ੍ਰਗਿਆਨ ਓਝਾ ਨੂੰ ਰਾਸ਼ਟਰੀ ਚੋਣ ਕਮੇਟੀ ‘ਚ ਸ਼ਾਮਲ ਕੀਤਾ ਜਾਵੇਗਾ।
ਆਰਪੀ ਸਿੰਘ ਅਤੇ ਪ੍ਰਗਿਆਨ ਓਝਾ ਨੂੰ ਚੋਣਕਾਰਾਂ ਦੇ ਅਹੁਦਿਆਂ ਲਈ ਅਰਜ਼ੀ ਦੇਣ ਲਈ ਕਿਹਾ ਗਿਆ ਹੈ। ਕ੍ਰਿਕਟ ਸਲਾਹਕਾਰ ਕਮੇਟੀ (CAC) ਵੱਲੋਂ BCCI ਦੀ ਸਾਲਾਨਾ ਆਮ ਬੈਠਕ (AGM) ਤੋਂ ਪਹਿਲਾਂ ਉਨ੍ਹਾਂ ਦੇ ਨਾਵਾਂ ਨੂੰ ਮਨਜ਼ੂਰੀ ਦੇਣ ਦੀ ਉਮੀਦ ਹੈ।
ਸੁਬਰੋਤੋ ਬੈਨਰਜੀ ਅਤੇ ਐਸ. ਸ਼ਰਥ ਨੂੰ ਮੌਜੂਦਾ ਚੋਣ ਕਮੇਟੀ ਤੋਂ ਹਟਾ ਦਿੱਤਾ ਜਾਵੇਗਾ। ਸਾਬਕਾ ਭਾਰਤੀ ਕ੍ਰਿਕਟਰ ਅਜੀਤ ਅਗਰਕਰ ਮੁੱਖ ਚੋਣਕਾਰ ਹਨ। ਆਰਪੀ ਸਿੰਘ ਕੇਂਦਰੀ ਜ਼ੋਨ ਤੋਂ ਚੋਣਕਾਰ ਬਣਨਗੇ। ਬੀਸੀਸੀਆਈ ਨੇ ਪਿਛਲੇ ਮਹੀਨੇ ਦੋ ਰਾਸ਼ਟਰੀ ਚੋਣਕਾਰਾਂ ਦੇ ਅਹੁਦਿਆਂ ਲਈ ਅਰਜ਼ੀਆਂ ਮੰਗੀਆਂ ਸਨ। ਮੀਡੀਆ ਰਿਪੋਰਟਾਂ ਦੇ ਮੁਤਾਬਕ ਕਿਸੇ ਵੀ ਪ੍ਰਮੁੱਖ ਨਾਮ ਨੇ ਚੋਣਕਾਰ ਬਣਨ ‘ਚ ਦਿਲਚਸਪੀ ਨਹੀਂ ਦਿਖਾਈ।
ਸਾਬਕਾ ਭਾਰਤੀ ਤੇਜ਼ ਗੇਂਦਬਾਜ਼ ਪ੍ਰਵੀਨ ਕੁਮਾਰ ਨੇ ਇਸ ਅਹੁਦੇ ਲਈ ਅਰਜ਼ੀ ਦਿੱਤੀ ਸੀ। ਉੱਤਰ ਪ੍ਰਦੇਸ਼ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਆਸ਼ੀਸ਼ ਵਿੰਸਟਨ ਜ਼ੈਦੀ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਸ਼ਕਤੀ ਸਿੰਘ ਕੇਂਦਰੀ ਜ਼ੋਨ ਤੋਂ ਹੋਰ ਉਮੀਦਵਾਰ ਸਨ।
ਆਰਪੀ ਸਿੰਘ ਦਾ ਕਰੀਅਰ
ਆਰਪੀ ਸਿੰਘ ਭਾਰਤ ਦੀ 2007 ਟੀ-20 ਵਿਸ਼ਵ ਕੱਪ ਜੇਤੂ ਟੀਮ ਦਾ ਮੈਂਬਰ ਸੀ। ਆਰਪੀ ਸਿੰਘ ਨੇ 82 ਅੰਤਰਰਾਸ਼ਟਰੀ ਮੈਚ ਖੇਡੇ ਹਨ, ਜਿਸ ‘ਚ 124 ਵਿਕਟਾਂ ਲਈਆਂ ਹਨ। ਇਸ ‘ਚ 14 ਟੈਸਟ, 58 ਵਨਡੇ ਅਤੇ 10 ਟੀ-20 ਸ਼ਾਮਲ ਹਨ। ਉਹ ਪਾਰਥਿਵ ਪਟੇਲ ਦੀ ਕਪਤਾਨੀ ‘ਚ 2016-17 ‘ਚ ਗੁਜਰਾਤ ਦੀ ਰਣਜੀ ਟਰਾਫੀ ਜੇਤੂ ਟੀਮ ਦਾ ਵੀ ਹਿੱਸਾ ਸੀ।
ਪ੍ਰਗਿਆਨ ਓਝਾ ਦਾ ਕਰੀਅਰ
ਪ੍ਰਗਿਆਨ ਓਝਾ ਨੂੰ ਦੱਖਣੀ ਜ਼ੋਨ ਤੋਂ ਚੁਣਿਆ ਜਾ ਰਿਹਾ ਹੈ। ਓਝਾ ਨੇ ਆਪਣੇ ਕਰੀਅਰ ‘ਚ 144 ਅੰਤਰਰਾਸ਼ਟਰੀ ਵਿਕਟਾਂ ਲਈਆਂ, ਜਿਨ੍ਹਾਂ ‘ਚੋਂ 113 ਟੈਸਟ ਕ੍ਰਿਕਟ ‘ਚ ਆਈਆਂ। ਉਸਦਾ ਆਖਰੀ ਅੰਤਰਰਾਸ਼ਟਰੀ ਮੈਚ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਦਾ ਆਖਰੀ ਟੈਸਟ ਮੈਚ ਵੀ ਸੀ, ਜਿਸ ‘ਚ ਓਝਾ ਨੇ 10 ਵਿਕਟਾਂ ਲਈਆਂ ਸਨ। ਓਝਾ, ਜਿਸਨੇ ਹੈਦਰਾਬਾਦ ਲਈ ਘਰੇਲੂ ਕ੍ਰਿਕਟ ‘ਚ ਵਧੀਆ ਪ੍ਰਦਰਸ਼ਨ ਕੀਤਾ ਹੈ ਅਤੇ ਬੰਗਾਲ ਅਤੇ ਬਿਹਾਰ ਲਈ ਵੀ ਖੇਡਿਆ ਹੈ, ਐਸ ਸ਼ਰਥ ਦੀ ਜਗ੍ਹਾ ਲਵੇਗਾ।
Read More: latest updates in our Sports News section
