ਪੰਜਾਬ, 05 ਨਵੰਬਰ 2025: ਰਾਜਸਥਾਨ ਦੇ ਇੱਕ ਸਬਜ਼ੀ ਵਿਕਰੇਤਾ ਨੇ ਪੰਜਾਬ ਸਟੇਟ ਲਾਟਰੀ – ਦੀਵਾਲੀ ਬੰਪਰ 2025 ਵਿੱਚ ₹11 ਕਰੋੜ (ਲਗਭਗ $1.2 ਮਿਲੀਅਨ) ਜਿੱਤੇ ਹਨ। ਸਬਜ਼ੀ ਵੇਚਣ ਵਾਲੇ ਇਸ ਵਿਅਕਤੀ ਦੀ ਕਿਸਮਤ ਰਾਤੋ-ਰਾਤ ਚਮਕ ਉੱਠੀ |
ਲਾਟਰੀ ਜਿੱਤ ਵਾਲੇ ਅਮਿਤ ਸੇਹਰਾ ਨੇ ਆਪਣੇ ਦੋਸਤ ਤੋਂ ਪੈਸੇ ਉਧਾਰ ਲਏ ਅਤੇ ਬਠਿੰਡਾ ਦੀ ਇੱਕ ਦੁਕਾਨ ਤੋਂ ਲਾਟਰੀ ਟਿਕਟ ਖਰੀਦੀ। ਉਸਨੇ ਪੰਜਾਬ ਸਟੇਟ ਲਾਟਰੀ – ਦੀਵਾਲੀ ਬੰਪਰ 2025 ‘ਚ ਸਭ ਤੋਂ ਵੱਡਾ ਇਨਾਮ ਜਿੱਤਿਆ। ਅੱਖਾਂ ‘ਚ ਹੰਝੂਆਂ ਨਾਲ, ਉਸਨੇ ਕਿਹਾ ਕਿ ਉਸਦੇ ਕੋਲ ਲਾਟਰੀ ਇਨਾਮ ਦਾ ਦਾਅਵਾ ਕਰਨ ਲਈ ਰਸਮੀ ਕਾਰਵਾਈਆਂ ਪੂਰੀਆਂ ਕਰਨ ਲਈ ਚੰਡੀਗੜ੍ਹ ਜਾਣ ਲਈ ਵੀ ਪੈਸੇ ਨਹੀਂ ਸਨ।
ਸੇਹਰਾ, ਜੋ ਜੈਪੁਰ ਦੇ ਕੋਟਪੁਤਲੀ ‘ਚ ਰਹਿੰਦਾ ਹੈ ਅਤੇ ਇੱਕ ਗੱਡੀ ‘ਤੇ ਸਬਜ਼ੀਆਂ ਵੇਚਦਾ ਹੈ, ਉਨ੍ਹਾਂ ਨੇ ਕਿਹਾ ਕਿ ਇਹ ਪਰਮਾਤਮਾ ਦਾ ਆਸ਼ੀਰਵਾਦ ਸੀ ਕਿ ਉਸਨੇ ਉਸਨੂੰ ਇੰਨਾ ਅਚਾਨਕ ਅਤੇ ਵੱਡਾ ਇਨਾਮ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਹ ਪੈਸਾ ਆਪਣੇ ਦੋ ਛੋਟੇ ਬੱਚਿਆਂ ਦੀ ਸਿੱਖਿਆ ‘ਤੇ ਖਰਚ ਕਰੇਗਾ। ਸਬਜ਼ੀ ਵਿਕਰੇਤਾ ਨੇ ਕਿਹਾ ਕਿ ਉਹ ਆਪਣੇ ਦੋਸਤ ਮੁਕੇਸ਼ ਨੂੰ ਲਾਟਰੀ ਟਿਕਟ ਲਈ ਪੈਸੇ ਉਧਾਰ ਦੇਣ ਲਈ ₹1 ਕਰੋੜ ਵੀ ਦੇਵੇਗਾ। ਪੰਜਾਬ ਰਾਜ ਲਾਟਰੀ ਦੇ ਨਤੀਜੇ 31 ਅਕਤੂਬਰ ਨੂੰ ਘੋਸ਼ਿਤ ਕੀਤੇ ਗਏ ਸਨ।
ਅਮਿਤ ਨੇ ਕਿਹਾ ਕਿ ਉਸਨੇ ਦੋ ਟਿਕਟਾਂ ਖਰੀਦੀਆਂ ਸਨ। ਇੱਕ ਆਪਣੇ ਲਈ ਅਤੇ ਇੱਕ ਆਪਣੀ ਪਤਨੀ ਲਈ। ਉਸਦੀ ਪਤਨੀ ਦੀ ਟਿਕਟ ਨੇ 1,000 ਰੁਪਏ ਜਿੱਤੇ, ਜਦੋਂ ਕਿ ਉਸਦੀ ਟਿਕਟ ਨੇ 11 ਕਰੋੜ ਰੁਪਏ ਜਿੱਤੇ। ਉਹ ਇਸ ਪੈਸੇ ਦੀ ਵਰਤੋਂ ਆਪਣੇ ਬੱਚਿਆਂ ਦੀ ਸਿੱਖਿਆ ਅਤੇ ਘਰ ਬਣਾਉਣ ਲਈ ਕਰਨਗੇ।
