ਵਾਰਾਣਸੀ, 08 ਨਵੰਬਰ 2025: ਪ੍ਰਧਾਨ ਮੰਤਰੀ ਮੋਦੀ ਨੇ ਵਾਰਾਣਸੀ ਤੋਂ ਚਾਰ ਵੰਦੇ ਭਾਰਤ ਐਕਸਪ੍ਰੈਸ ਟ੍ਰੇਨਾਂ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਉਨ੍ਹਾਂ ਕਿਹਾ, “ਹੁਣ ਵਿਦੇਸ਼ੀ ਯਾਤਰੀ ਵੀ ਵੰਦੇ ਭਾਰਤ ਐਕਸਪ੍ਰੈਸ ਤੋਂ ਹੈਰਾਨ ਹੁੰਦੇ ਹਨ। ਵੰਦੇ ਭਾਰਤ ਇੱਕ ਅਜਿਹੀ ਟ੍ਰੇਨ ਹੈ ਜੋ ਭਾਰਤੀਆਂ ਦੀ, ਭਾਰਤੀਆਂ ਦੁਆਰਾ ਅਤੇ ਭਾਰਤੀਆਂ ਲਈ ਬਣਾਈ ਗਈ ਹੈ। ਉਨ੍ਹਾਂ ਕਿਹਾ ਕਿ ਕੀ ਅਸੀਂ ਇਹ ਪਹਿਲਾਂ ਕਰ ਸਕਦੇ ਸੀ? ਇਹ ਸਭ ਵਿਦੇਸ਼ਾਂ ‘ਚ ਹੁੰਦਾ ਸੀ। ਹੁਣ ਅਸੀਂ ਇਹ ਕਰ ਰਹੇ ਹਾਂ, ਇਹ ਇੱਥੇ ਬਣਾਇਆ ਜਾ ਰਿਹਾ ਹੈ।”
ਪ੍ਰਧਾਨ ਮੰਤਰੀ ਮੋਦੀ ਨੇ ਆਪਣਾ ਭਾਸ਼ਣ “ਨਮਹ ਪਾਰਵਤੀ ਪਤੇ” ਨਾਲ ਸ਼ੁਰੂ ਕੀਤਾ ਅਤੇ ਲਗਭਗ 18 ਮਿੰਟ ਤੱਕ ਸੰਬੋਧਨ ਕੀਤਾ। ਪ੍ਰਧਾਨ ਮੰਤਰੀ ਨੇ ਰੇਲਗੱਡੀ ‘ਚ ਸਕੂਲੀ ਵਿਦਿਆਰਥੀਆਂ ਨਾਲ ਵੀ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ। ਇਸ ਦੌਰਾਨ, ਇੱਕ ਬੱਚੇ ਨੇ ਪ੍ਰਧਾਨ ਮੰਤਰੀ ਨੂੰ ਇੱਕ ਕਵਿਤਾ ਸੁਣਾਈ।
ਪ੍ਰਧਾਨ ਮੰਤਰੀ ਦੁਆਰਾ ਉਦਘਾਟਨ ਕੀਤੀਆਂ ਗਈਆਂ ਟ੍ਰੇਨਾਂ ਵਾਰਾਣਸੀ ਅਤੇ ਖਜੂਰਾਹੋ, ਫਿਰੋਜ਼ਪੁਰ ਅਤੇ ਦਿੱਲੀ, ਏਰਨਾਕੁਲਮ ਅਤੇ ਬੰਗਲੁਰੂ, ਅਤੇ ਲਖਨਊ ਅਤੇ ਸਹਾਰਨਪੁਰ ਵਿਚਕਾਰ ਚੱਲਣਗੀਆਂ। ਇਹ ਅੱਠਵੀਂ ਵੰਦੇ ਭਾਰਤ ਟ੍ਰੇਨ ਹੈ ਜੋ ਵਾਰਾਣਸੀ ਨੂੰ ਮਿਲੀ ਹੈ। ਇਹ ਮੋਦੀ ਦੀ ਇਸ ਸਾਲ ਵਾਰਾਣਸੀ ਦੀ ਪੰਜਵੀਂ ਯਾਤਰਾ ਹੈ ਅਤੇ ਸੰਸਦ ਮੈਂਬਰ ਵਜੋਂ ਉਨ੍ਹਾਂ ਦੇ ਕਾਰਜਕਾਲ ਦੌਰਾਨ ਉਨ੍ਹਾਂ ਦੀ 53ਵੀਂ ਯਾਤਰਾ ਹੈ।
ਪ੍ਰਧਾਨ ਮੰਤਰੀ ਸ਼ੁੱਕਰਵਾਰ ਸ਼ਾਮ 5 ਵਜੇ ਵਾਰਾਣਸੀ ਪਹੁੰਚੇ। ਉਹ ਹਵਾਈ ਅੱਡੇ ਤੋਂ ਬਨਾਰਸ ਰੇਲ ਇੰਜਣ ਫੈਕਟਰੀ (ਬਰੇਕਾ) ਗੈਸਟ ਹਾਊਸ ਤੱਕ ਸੜਕ ਰਾਹੀਂ ਗਏ। ਭਾਜਪਾ ਵਰਕਰਾਂ ਨੇ 27 ਕਿਲੋਮੀਟਰ ਦੇ ਰਸਤੇ ‘ਤੇ ਵੱਖ-ਵੱਖ ਥਾਵਾਂ ‘ਤੇ ਪ੍ਰਧਾਨ ਮੰਤਰੀ ਦਾ ਸਵਾਗਤ ਕੀਤਾ।
Read More: PM ਮੋਦੀ ਵੰਦੇ ਭਾਰਤ ਐਕਸਪ੍ਰੈਸ ਨੂੰ ਦੇਣਗੇ ਹਰੀ ਝੰਡੀ, ਕਸ਼ਮੀਰ ਨੂੰ ਦੇਸ਼ ਦੇ ਬਾਕੀ ਹਿੱਸਿਆਂ ਨਾਲ ਜੋੜਨ ਪਹਿਲੀ ਟ੍ਰੇਨ
