ਚੰਡੀਗੜ੍ਹ, 21 ਮਾਰਚ 2023: ਪਾਕਿਸਤਾਨ (Pakistan) ਹੁਣ ਤੱਕ ਦੇ ਸਭ ਤੋਂ ਮਾੜੇ ਦੌਰ ਵਿੱਚੋਂ ਲੰਘ ਰਿਹਾ ਹੈ। ਦੇਸ਼ ‘ਚ ਪਿਛਲੇ ਕਈ ਹਫਤਿਆਂ ਤੋਂ ਆਟੇ ਦੀਆਂ ਕੀਮਤਾਂ ਅਸਮਾਨ ਨੂੰ ਛੂਹ ਰਹੀਆਂ ਹਨ। ਕਰਾਚੀ ਅਤੇ ਦੇਸ਼ ਦੇ ਹੋਰ ਹਿੱਸਿਆਂ ਵਿੱਚ ਆਟੇ ਦੀਆਂ ਕੀਮਤਾਂ ਨੇ ਸਾਰੇ ਰਿਕਾਰਡ ਤੋੜ ਦਿੱਤੇ ਹਨ। ਪਾਕਿਸਤਾਨ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ 20 ਕਿਲੋ ਕਣਕ ਦੇ ਆਟੇ ਦੀ ਬੋਰੀ 3,100 ਪਾਕਿਸਤਾਨੀ ਰੁਪਏ (ਲਗਭਗ 910 ਭਾਰਤੀ ਰੁਪਏ) ਤੱਕ ਪਹੁੰਚ ਗਈ ਹੈ। ਕੀਮਤਾਂ ‘ਚ ਭਾਰੀ ਵਾਧੇ ਕਾਰਨ ਪਾਕਿਸਤਾਨ ਦੇ ਲੋਕ ਸਭ ਤੋਂ ਜ਼ਿਆਦਾ ਪ੍ਰੇਸ਼ਾਨ ਹਨ। ਸਰਕਾਰੀ ਸਬਸਿਡੀ ਵਾਲੇ ਆਟੇ ਲਈ ਲੰਬੀਆਂ ਕਤਾਰਾਂ ਦੇਖਣ ਨੂੰ ਮਿਲ ਰਹੀਆਂ ਹਨ।
ਕਰਾਚੀ ਅਤੇ ਦੇਸ਼ ਦੇ ਹੋਰ ਹਿੱਸਿਆਂ ਵਿੱਚ ਆਟੇ ਦੀਆਂ ਕੀਮਤਾਂ ਨੇ ਸਾਰੇ ਰਿਕਾਰਡ ਤੋੜ ਦਿੱਤੇ ਹਨ। ਤਾਜ਼ਾ ਰਿਪੋਰਟਾਂ ਮੁਤਾਬਕ ਕਰਾਚੀ ਦੇ ਲੋਕ ਦੇਸ਼ ਦਾ ਸਭ ਤੋਂ ਮਹਿੰਗਾ ਆਟਾ ਖਰੀਦਣ ਲਈ ਮਜਬੂਰ ਹਨ। ਇੱਥੇ ਆਟਾ 155 ਪਾਕਿਸਤਾਨੀ ਰੁਪਏ ਪ੍ਰਤੀ ਕਿਲੋ ਤੱਕ ਵਿਕ ਰਿਹਾ ਹੈ। ਸ਼ਹਿਰ ਵਿੱਚ ਪਿਛਲੇ ਇੱਕ ਹਫ਼ਤੇ ਵਿੱਚ 20 ਕਿਲੋਗ੍ਰਾਮ ਆਟੇ ਦਾ ਬੈਗ 200 ਰੁਪਏ ਮਹਿੰਗਾ ਹੋ ਗਿਆ ਹੈ ਅਤੇ ਇਹ 3100 ਰੁਪਏ ਵਿੱਚ ਉਪਲਬਧ ਹੈ। ਪਾਕਿਸਤਾਨ ਦੇ ਇਤਿਹਾਸ ‘ਚ ਪਹਿਲੀ ਵਾਰ ਲੋਕ ਇਸ ਕੀਮਤ ‘ਤੇ ਆਟਾ ਖਰੀਦ ਰਹੇ ਹਨ।
ਅੰਕੜਾ ਬਿਊਰੋ ਦੀ ਰਿਪੋਰਟ ਅਨੁਸਾਰ ਇੱਕ ਹਫ਼ਤੇ ਵਿੱਚ ਆਟੇ ਦਾ ਇੱਕ ਥੈਲਾ ਮੁਲਤਾਨ ਵਿੱਚ 200 ਪਾਕਿਸਤਾਨੀ ਰੁਪਏ, ਪੇਸ਼ਾਵਰ ਵਿੱਚ 100 ਪਾਕਿਸਤਾਨੀ ਰੁਪਏ, ਹੈਦਰਾਬਾਦ ਵਿੱਚ 80 ਪਾਕਿਸਤਾਨੀ ਰੁਪਏ ਅਤੇ ਕਵੇਟਾ ਵਿੱਚ 30 ਪਾਕਿਸਤਾਨੀ ਰੁਪਏ ਮਹਿੰਗਾ ਹੋ ਗਿਆ ਹੈ। ਅਧਿਕਾਰਤ ਅੰਕੜਿਆਂ ਮੁਤਾਬਕ ਖੁਜਦਾਰ ‘ਚ 20 ਕਿਲੋਗ੍ਰਾਮ ਆਟੇ ਦਾ ਬੈਗ 2850 ਰੁਪਏ, ਹੈਦਰਾਬਾਦ ‘ਚ 2800 ਰੁਪਏ, ਕਵੇਟਾ ‘ਚ 2780 ਰੁਪਏ, ਪਿਸ਼ਾਵਰ ‘ਚ 2750 ਰੁਪਏ, ਲਰਕਾਨਾ ‘ਚ 2640 ਰੁਪਏ, ਸੁੱਕਰ ਅਤੇ ਮੁਲਤਾਨ ‘ਚ 2600 ਰੁਪਏ ‘ਤੇ ਪਹੁੰਚ ਗਿਆ ਹੈ।
ਆਟੇ ਦੇ ਇੱਕ ਥੈਲੇ ਦੀ ਕੀਮਤ ਬੰਨੂ ਵਿੱਚ 2550 ਪਾਕਿਸਤਾਨੀ ਰੁਪਏ, ਗੁਜਰਾਂਵਾਲਾ ਵਿੱਚ 2533 ਰੁਪਏ, ਇਸਲਾਮਾਬਾਦ, ਰਾਵਲਪਿੰਡੀ, ਲਾਹੌਰ ਅਤੇ ਸਿਆਲਕੋਟ ਵਿੱਚ 2250 ਰੁਪਏ ਤੱਕ ਪਹੁੰਚ ਗਈ ਹੈ। ਹਾਲਾਂਕਿ, ਸਰਕਾਰੀ ਸਬਸਿਡੀਆਂ ਕਾਰਨ ਲਾਹੌਰ ਅਤੇ ਇਸਲਾਮਾਬਾਦ ਸਮੇਤ ਪੰਜਾਬ ਦੇ ਸਾਰੇ ਵੱਡੇ ਸ਼ਹਿਰਾਂ ਵਿੱਚ ਆਟੇ ਦਾ ਇੱਕ ਥੈਲਾ 1,295 ਰੁਪਏ ਵਿੱਚ ਮਿਲਦਾ ਹੈ।
ਇਕ ਰਿਪੋਰਟ ਮੁਤਾਬਕ ਪਾਕਿਸਤਾਨ (Pakistan) ਵਿਚ 5 ਕਿਲੋ ਅਤੇ 10 ਕਿਲੋ ਆਟੇ ਦੀਆਂ ਬੋਰੀਆਂ ਦੀ ਕੀਮਤ ਇਕ ਸਾਲ ਪਹਿਲਾਂ ਦੇ ਮੁਕਾਬਲੇ ਲਗਭਗ ਦੁੱਗਣੀ ਹੋ ਗਈ ਹੈ। ਇਸਲਾਮਾਬਾਦ ਅਤੇ ਰਾਵਲਪਿੰਡੀ ਵਿੱਚ ਇੱਕ ਨਾਨ 30 ਰੁਪਏ ਵਿੱਚ ਵਿਕ ਰਿਹਾ ਹੈ ਜਦਕਿ ਇੱਕ ਰੋਟੀ 25 ਰੁਪਏ ਵਿੱਚ ਵਿਕ ਰਹੀ ਹੈ।
