ਸਪੋਰਟਸ, 09 ਅਗਸਤ 2025: NZ ਬਨਾਮ ZIM: ਨਿਊਜ਼ੀਲੈਂਡ ਨੇ ਸ਼ਨੀਵਾਰ ਨੂੰ ਜ਼ਿੰਬਾਬਵੇ ਵਿਰੁੱਧ ਦੂਜਾ ਟੈਸਟ ਪਾਰੀ ਅਤੇ 359 ਦੌੜਾਂ ਨਾਲ ਜਿੱਤ ਲਿਆ। ਦੌੜਾਂ ਦੇ ਮਾਮਲੇ ‘ਚ ਇਹ ਨਿਊਜ਼ੀਲੈਂਡ ਦੀ ਟੈਸਟ ‘ਚ ਸਭ ਤੋਂ ਵੱਡੀ ਜਿੱਤ ਹੈ। ਇਹ ਜ਼ਿੰਬਾਬਵੇ ਦੀ ਵੀ ਸਭ ਤੋਂ ਵੱਡੀ ਹਾਰ ਹੈ। ਬੁਲਾਵਾਯੋ ‘ਚ ਦੂਜੇ ਟੈਸਟ ਦੇ ਚੌਥੇ ਦਿਨ, ਨਿਊਜ਼ੀਲੈਂਡ ਨੇ 3 ਵਿਕਟਾਂ ‘ਤੇ 601 ਦੌੜਾਂ ‘ਤੇ ਪਾਰੀ ਘੋਸ਼ਿਤ ਕੀਤੀ। ਜਵਾਬ ‘ਚ ਜ਼ਿੰਬਾਬਵੇ ਦੂਜੀ ਪਾਰੀ ‘ਚ 28.1 ਓਵਰਾਂ ਵਿੱਚ 117 ਦੌੜਾਂ ‘ਤੇ ਢੇਰ ਹੋ ਗਿਆ।
ਨਿਊਜ਼ੀਲੈਂਡ ਦੇ ਜ਼ਕਾਰੀ ਫੌਲਕਸ ਨੇ ਆਪਣੇ ਡੈਬਿਊ ‘ਤੇ ਇਤਿਹਾਸ ਰਚਿਆ। ਉਹ ਆਪਣੇ ਡੈਬਿਊ ਮੈਚ ‘ਚ ਨਿਊਜ਼ੀਲੈਂਡ ਲਈ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲਾ ਗੇਂਦਬਾਜ਼ ਬਣ ਗਿਆ। ਫੌਲਕਸ ਨੇ ਪਹਿਲੀ ਪਾਰੀ ‘ਚ 4 ਵਿਕਟਾਂ ਲਈਆਂ। ਉਨ੍ਹਾਂ ਨੇ ਦੂਜੀ ਪਾਰੀ ‘ਚ 5 ਵਿਕਟਾਂ ਲਈਆਂ। ਇਸ ਜਿੱਤ ਦੇ ਨਾਲ, ਨਿਊਜ਼ੀਲੈਂਡ ਨੇ 2 ਮੈਚਾਂ ਦੀ ਸੀਰੀਜ਼ 2-0 ਨਾਲ ਆਪਣੇ ਕਬਜ਼ੇ ‘ਚ ਲੈ ਲਈ। ਜ਼ਿੰਬਾਬਵੇ ਦੀ ਦੂਜੀ ਪਾਰੀ ‘ਚ 9 ਬੱਲੇਬਾਜ਼ ਦੋਹਰੇ ਅੰਕੜੇ ਨੂੰ ਪਾਰ ਨਹੀਂ ਕਰ ਸਕੇ।
ਨਿਕ ਵੈਲਚ ਨੇ ਜ਼ਿੰਬਾਬਵੇ ਲਈ ਸਭ ਤੋਂ ਵੱਧ ਨਾਬਾਦ 47 ਦੌੜਾਂ ਬਣਾਈਆਂ। ਇਸ ਤੋਂ ਇਲਾਵਾ ਕਪਤਾਨ ਕ੍ਰੇਗ ਇਰਵਿਨ ਨੇ 17 ਦੌੜਾਂ ਬਣਾਈਆਂ। ਬ੍ਰਾਇਨ ਬੇਨੇਟ, ਟ੍ਰੇਵਰ ਵਾਂਡੂ ਅਤੇ ਚਿਵਾਂਗਾ ਬਿਨਾਂ ਖਾਤਾ ਖੋਲ੍ਹੇ ਹੀ ਪੈਵੇਲੀਅਨ ਪਰਤ ਗਏ।
ਨਿਊਜ਼ੀਲੈਂਡ ਲਈ ਮੈਟ ਹੈਨਰੀ ਅਤੇ ਜੈਕਬ ਡਫੀ ਨੇ 2-2 ਵਿਕਟਾਂ ਲਈਆਂ। ਮੈਥਿਊ ਫਿਸ਼ਰ ਨੇ 1 ਵਿਕਟ ਲਈ। ਨਿਊਜ਼ੀਲੈਂਡ ਦੀ ਗੱਲ ਕਰੀਏ ਤਾਂ ਡੇਵੋਨ ਕੌਨਵੇ ਨੇ 153, ਹੈਨਰੀ ਨਿਕੋਲਸ 150 ਅਤੇ ਰਚਿਨ ਰਵਿੰਦਰਾ 165 ਦੌੜਾਂ ਬਣਾ ਕੇ ਨਾਬਾਦ ਰਹੇ। ਵਿਲ ਯੰਗ ਨੇ 74 ਅਤੇ ਜੈਕਬ ਡਫੀ ਨੇ 36 ਦੌੜਾਂ ਬਣਾਈਆਂ। ਇਹ ਸੀਰੀਜ਼ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦਾ ਹਿੱਸਾ ਨਹੀਂ ਸੀ।
