ਚੰਡੀਗੜ੍ਹ, 16 ਫਰਵਰੀ 2023: ਪਾਕਿਸਤਾਨ ਪਾਸੋਂ ਨਸ਼ਾ ਤਸਕਰ ਨਸ਼ੇ ਦੀ ਤਸਕਰੀ (Drug Smuggling) ਲਈ ਵੱਖ-ਵੱਖ ਤਰੀਕੇ ਆਪਣਾ ਰਹੇ ਹਨ, ਹੁਣ ਨਸ਼ਾ ਤਸਕਰੀ ਦਾ ਇੱਕ ਹੋਰ ਨਵਾਂ ਤਰੀਕਾ ਲੱਭ ਲਿਆ ਹੈ। ਪਾਕਿਸਤਾਨ ਨੇ ਤਸਕਰੀ ਲਈ ਪਹਿਲਾਂ ਪਾਈਪ, ਫਿਰ ਡਰੋਨ ਅਤੇ ਹੁਣ ਬਾਰਡਰ ‘ਤੇ ਗੁਬਾਰੇ ਦਾ ਤਰੀਕਾ ਅਪਣਾਇਆ ਹੈ। ਬੀਐਸਐਫ ਨੂੰ ਉਸ ਵੇਲੇ ਵੱਡੀ ਕਾਮਯਾਬੀ ਮਿਲੀ ਜਦੋਂ ਸਰਹੱਦ ਨੇੜਿਓਂ 2 ਕਿੱਲੋ ਹੈਰੋਇਨ ਬਰਾਮਦ ਹੋਈ।
ਇਸ ਮੌਕੇ ਜਾਣਕਾਰੀ ਦਿੰਦਿਆਂ ਡੀਆਈਜੀ ਪ੍ਰਭਾਕਰ ਜੋਸ਼ੀ ਨੇ ਦੱਸਿਆ ਕਿ ਸੀਮਾ ਸੁਰੱਖਿਆ ਬਲ ਨੇ ਥਾਣਾ ਰਾਮਦਾਸ ਅਧੀਨ ਪੈਂਦੇ ਪਿੰਡ ਸਾਹੋਵਾਲ ਵਿੱਚ 73 ਬਟਾਲੀਅਨ ਦੇ ਘੇਰੇ ਵਿੱਚ ਪਿੰਡ ਵਾਸੀਆਂ ਦੀ ਮਦਦ ਨਾਲ 2 ਕਿੱਲੋ ਹੈਰੋਇਨ ਬਰਾਮਦ ਕੀਤੀ ਹੈ। ਇਸ ਦੇ ਨਾਲ ਚਾਰ ਗੁਬਾਰੇ ਵੀ ਬੰਨ੍ਹੇ ਹੋਏ ਸਨ।ਇਸ ਤੋਂ ਜਾਪਦਾ ਹੈ ਕਿ ਪਾਕਿਸਤਾਨ ਤੋਂ ਭਾਰਤ ਵਿੱਚ ਵੀ ਨਸ਼ੀਲੇ ਪਦਾਰਥ ਗੁਬਾਰਿਆਂ ਰਾਹੀਂ ਭੇਜੇ ਜਾਂਦੇ ਸਨ।