ਬਿਹਾਰ, 31 ਅਕਤੂਬਰ 2025: ਰਾਸ਼ਟਰੀ ਲੋਕਤੰਤਰੀ ਗਠਜੋੜ (NDA) ਨੇ ਆਪਣਾ ਮੈਨੀਫੈਸਟੋ ਜਾਰੀ ਕਰ ਦਿੱਤਾ ਹੈ। ਪਟਨਾ ਦੇ ਇੱਕ ਵੱਡੇ ਹੋਟਲ ‘ਚ ਸਾਰੀਆਂ ਐਨਡੀਏ ਭਾਈਵਾਲ ਪਾਰਟੀਆਂ ਦੇ ਮੁੱਖ ਨੇਤਾ “ਸੰਕਲਪ ਪੱਤਰ 2025” ਸਿਰਲੇਖ ਵਾਲਾ ਮੈਨੀਫੈਸਟੋ ਜਾਰੀ ਕਰਨ ਲਈ ਇਕੱਠੇ ਹੋਏ। ਮੁੱਖ ਮੰਤਰੀ ਨਿਤੀਸ਼ ਕੁਮਾਰ, ਭਾਜਪਾ ਦੇ ਰਾਸ਼ਟਰੀ ਪ੍ਰਧਾਨ ਜੇਪੀ ਨੱਡਾ, ਕੇਂਦਰੀ ਮੰਤਰੀ ਜੀਤਨ ਰਾਮ ਮਾਂਝੀ, ਚਿਰਾਗ ਪਾਸਵਾਨ ਅਤੇ ਸੰਸਦ ਮੈਂਬਰ ਉਪੇਂਦਰ ਕੁਸ਼ਵਾਹਾ, ਬਿਹਾਰ ਭਾਜਪਾ ਚੋਣ ਇੰਚਾਰਜ ਧਰਮਿੰਦਰ ਪ੍ਰਧਾਨ, ਭਾਜਪਾ ਪ੍ਰਧਾਨ ਦਿਲੀਪ ਜੈਸਵਾਲ ਅਤੇ ਜੇਡੀਯੂ ਦੇ ਕਾਰਜਕਾਰੀ ਪ੍ਰਧਾਨ ਸੰਜੇ ਝਾਅ ਦੀ ਮੌਜੂਦਗੀ ‘ਚ ਜਾਰੀ ਕੀਤੇ ਗਏ, ਮੈਨੀਫੈਸਟੋ ਨੂੰ ਵਿਕਸਤ ਬਿਹਾਰ ਲਈ ਇੱਕ ਬਲੂਪ੍ਰਿੰਟ ਦੱਸਿਆ ਗਿਆ।
ਹਾਲਾਂਕਿ, ਜਿਵੇਂ ਹੀ ਮੈਨੀਫੈਸਟੋ ਜਾਰੀ ਹੋਇਆ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਅਤੇ ਮੰਤਰੀ ਚਿਰਾਗ ਪਾਸਵਾਨ ਸਮੇਤ ਸਾਰੇ ਸੀਨੀਅਰ ਆਗੂ ਚਲੇ ਗਏ। ਇਸ ਤੋਂ ਬਾਅਦ, ਉਪ ਮੁੱਖ ਮੰਤਰੀ ਸਮਰਾਟ ਚੌਧਰੀ ਨੇ ਐਨਡੀਏ ਵੱਲੋਂ ਮੈਨੀਫੈਸਟੋ ਬਾਰੇ ਜਾਣਕਾਰੀ ਦਿੱਤੀ।
NDA ਦੇ ਚੋਣ ਮੈਨੀਫੈਸਟੋ ‘ਚ ਕੀਤੇ ਵਾਅਦੇ
1. ਇੱਕ ਕਰੋੜ ਤੋਂ ਵੱਧ ਸਰਕਾਰੀ ਨੌਕਰੀਆਂ ਅਤੇ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਣਗੇ।
2. ਹਰ ਜ਼ਿਲ੍ਹੇ ‘ਚ ਮੈਗਾ ਸਕਿਲ ਸੈਂਟਰ ਖੋਲ੍ਹੇ ਜਾਣਗੇ।
3. ਬਿਹਾਰ ਸਪੋਰਟਸ ਸਿਟੀ ਅਤੇ ਬਲਾਕਾਂ ‘ਚ ਖੇਡਾਂ ਲਈ ਉੱਤਮਤਾ ਕੇਂਦਰ ਸਥਾਪਿਤ ਕੀਤੇ ਜਾਣਗੇ।
4. ਹਰੇਕ ਜ਼ਿਲ੍ਹੇ ‘ਚ ਇੱਕ ਫੈਕਟਰੀ ਅਤੇ 10 ਨਵੇਂ ਉਦਯੋਗਿਕ ਪਾਰਕ ਬਣਾਏ ਜਾਣਗੇ।
5. 100 MSME ਪਾਰਕ ਅਤੇ 50,000 ਤੋਂ ਵੱਧ ਕਾਟੇਜ ਉਦਯੋਗ ਸਥਾਪਿਤ ਕੀਤੇ ਜਾਣਗੇ।
6. ਡਿਫੈਂਸ ਕੋਰੀਡੋਰ ਅਤੇ ਸੈਮੀਕੰਡਕਟਰ ਨਿਰਮਾਣ ਪਾਰਕ ਸਥਾਪਤ ਕੀਤੇ ਜਾਣਗੇ।
7. ਮਹਿਲਾ ਰੁਜ਼ਗਾਰ ਯੋਜਨਾ ਤਹਿਤ ਔਰਤਾਂ ਨੂੰ ₹2 ਲੱਖ ਤੱਕ ਦੀ ਸਹਾਇਤਾ ਮਿਲੇਗੀ।
8. 1 ਕਰੋੜ ਔਰਤਾਂ ਲਖਪਤੀ ਦੀਦੀ ਬਣਨਗੀਆਂ।
9. ‘ਮਿਸ਼ਨ ਕਰੋੜਪਤੀ’ ਰਾਹੀਂ ਮਹਿਲਾ ਉੱਦਮੀ ਕਰੋੜਪਤੀ ਬਣਨਗੀਆਂ।
10. ਕਿਸਾਨ ਸਨਮਾਨ ਨਿਧੀ ਸਹਾਇਤਾ ₹6,000 ਤੋਂ ਵਧਾ ਕੇ ₹9,000 ਕੀਤੀ ਜਾਵੇਗੀ।
11. ਮਛੇਰਿਆਂ ਨੂੰ ₹4,500 ਤੋਂ ₹9,000 ਤੱਕ ਸਹਾਇਤਾ ਮਿਲੇਗੀ।
12. ਸਾਰੀਆਂ ਫਸਲਾਂ ਲਈ MSP ਦੀ ਗਰੰਟੀ ਹੋਵੇਗੀ। 13. ਖੇਤੀਬਾੜੀ-ਬੁਨਿਆਦੀ ਢਾਂਚੇ ‘ਚ ₹9 ਲੱਖ ਕਰੋੜ ਦਾ ਨਿਵੇਸ਼ ਕੀਤਾ ਜਾਵੇਗਾ।
14. ਹਰੇਕ ਸਬ-ਡਿਡਵੀਜ਼ਨ ‘ਚ ਅਨੁਸੂਚਿਤ ਜਾਤੀ ਅਤੇ ਅਨੁਸੂਚਿਤ ਜਨਜਾਤੀ ਦੇ ਵਿਦਿਆਰਥੀਆਂ ਲਈ ਰਿਹਾਇਸ਼ੀ ਸਕੂਲ ਬਣਾਏ ਜਾਣਗੇ।
15. ਉੱਚ ਸਿੱਖਿਆ ਸੰਸਥਾਵਾਂ ‘ਚ ਪੜ੍ਹ ਰਹੇ ਸਾਰੇ ਅਨੁਸੂਚਿਤ ਜਾਤੀ ਦੇ ਵਿਦਿਆਰਥੀਆਂ ਨੂੰ ਪ੍ਰਤੀ ਮਹੀਨਾ ₹2,000 ਦਿੱਤੇ ਜਾਣਗੇ।
16. ਈਬੀਸੀ ਜਾਤੀਆਂ ਨੂੰ ₹10 ਲੱਖ ਤੱਕ ਦੀ ਸਹਾਇਤਾ ਮਿਲੇਗੀ।
17. ਗਰੀਬ ਪਰਿਵਾਰਾਂ ਦੇ ਵਿਦਿਆਰਥੀਆਂ ਨੂੰ ਨਰਸਰੀ ਤੋਂ ਪੋਸਟ ਗ੍ਰੈਜੂਏਟ ਪੱਧਰ ਤੱਕ ਮੁਫ਼ਤ ਗੁਣਵੱਤਾ ਵਾਲੀ ਸਿੱਖਿਆ ਮਿਲੇਗੀ।
18. ਸਕੂਲਾਂ ‘ਚ ਮਿਡ-ਡੇਅ ਮੀਲ ਦੇ ਨਾਲ-ਨਾਲ ਪੌਸ਼ਟਿਕ ਨਾਸ਼ਤਾ ਪ੍ਰਦਾਨ ਕੀਤਾ ਜਾਵੇਗਾ।
19. 50 ਲੱਖ ਨਵੇਂ ਪੱਕੇ ਘਰ, ਮੁਫ਼ਤ ਰਾਸ਼ਨ, 125 ਯੂਨਿਟ ਮੁਫ਼ਤ ਬਿਜਲੀ ਅਤੇ ਸਮਾਜਿਕ ਸੁਰੱਖਿਆ ਪੈਨਸ਼ਨ ਯੋਜਨਾ ਜਾਰੀ ਰਹੇਗੀ।
20. ਜ਼ਿਲ੍ਹਿਆਂ ਦੇ ਪ੍ਰਮੁੱਖ ਸਕੂਲਾਂ ਦਾ ₹5,000 ਕਰੋੜ ਨਾਲ ਨਵੀਨੀਕਰਨ ਕੀਤਾ ਜਾਵੇਗਾ।
21. 7 ਐਕਸਪ੍ਰੈਸਵੇਅ ਅਤੇ 3,600 ਕਿਲੋਮੀਟਰ ਰੇਲਵੇ ਟਰੈਕਾਂ ਦਾ ਆਧੁਨਿਕੀਕਰਨ ਕੀਤਾ ਜਾਵੇਗਾ।
22. ਹਰ ਜ਼ਿਲ੍ਹੇ ‘ਚ ਇੱਕ ਵਿਸ਼ਵ ਪੱਧਰੀ ਮੈਡੀਕਲ ਸਿਟੀ ਅਤੇ ਇੱਕ ਮੈਡੀਕਲ ਕਾਲਜ ਬਣਾਇਆ ਜਾਵੇਗਾ।
23. ਮਾਂ ਜਾਨਕੀ ਦੇ ਜਨਮ ਸਥਾਨ ਨੂੰ ਇੱਕ ਵਿਸ਼ਵ ਪੱਧਰੀ ਅਧਿਆਤਮਿਕ ਸ਼ਹਿਰ ਵਜੋਂ ਵਿਕਸਤ ਕੀਤਾ ਜਾਵੇਗਾ। ਇਸਨੂੰ ਸੀਤਾਪੁਰਮ ਦੇ ਧਾਰਮਿਕ ਸ਼ਹਿਰ ਵਜੋਂ ਵਿਕਸਤ ਕੀਤਾ ਜਾਵੇਗਾ।
24. ਪਟਨਾ, ਦਰਭੰਗਾ, ਪੂਰਨੀਆ ਅਤੇ ਭਾਗਲਪੁਰ ਵਿੱਚ ਅੰਤਰਰਾਸ਼ਟਰੀ ਹਵਾਈ ਅੱਡੇ ਬਣਾਏ ਜਾਣਗੇ, ਅਤੇ ਚਾਰ ਨਵੇਂ ਸ਼ਹਿਰਾਂ ‘ਚ ਮੈਟਰੋ ਲਾਈਨਾਂ ਬਣਾਈਆਂ ਜਾਣਗੀਆਂ।
25. ਅਗਲੇ ਪੰਜ ਸਾਲਾਂ ‘ਚ ਬਿਹਾਰ ਨੂੰ ਹੜ੍ਹ ਮੁਕਤ ਬਣਾਇਆ ਜਾਵੇਗਾ। ਇਸਦੇ ਲਈ, ਇੱਕ ਹੜ੍ਹ ਪ੍ਰਬੰਧਨ ਬੋਰਡ ਸਥਾਪਤ ਕੀਤਾ ਜਾਵੇਗਾ, ਅਤੇ ਹੜ੍ਹ ਤੋਂ ਫਾਰਚੂਨ ਮਾਡਲ ਦੇ ਤਹਿਤ, ਨਦੀਆਂ ਨੂੰ ਜੋੜਨ ਵਾਲੇ ਪ੍ਰੋਜੈਕਟਾਂ, ਬੰਨ੍ਹਾਂ, ਨਹਿਰਾਂ ਅਤੇ ਮੱਛੀ ਪਾਲਣ ਨੂੰ ਉਤਸ਼ਾਹਿਤ ਕੀਤਾ ਜਾਵੇਗਾ।
Read More: “ਮੁੱਖ ਮੰਤਰੀ ਜਾਂ ਪ੍ਰਧਾਨ ਮੰਤਰੀ ਦੀ ਸੀਟ ਖਾਲੀ ਨਹੀਂ”, ਅਮਿਤ ਸ਼ਾਹ ਨੇ ਸੋਨੀਆ ਗਾਂਧੀ ਤੇ ਰਾਹੁਲ ‘ਤੇ ਕਸਿਆ ਤੰਜ
