ਚੰਡੀਗੜ੍ਹ, 29 ਜਨਵਰੀ, 2024: ਅਮਰੀਕਾ (America) ਦੇ ਜਾਰਜੀਆ ਵਿੱਚ ਇੱਕ ਭਾਰਤੀ ਵਿਦਿਆਰਥੀ ਦਾ ਕਤਲ ਕਰ ਦਿੱਤਾ ਗਿਆ। ਅਮਰੀਕੀ ਮੀਡੀਆ ਫੌਕਸ ਨਿਊਜ਼ ਮੁਤਾਬਕ 25 ਸਾਲਾ ਵਿਦਿਆਰਥੀ ਵਿਵੇਕ ਸੈਣੀ ਦਾ ਕਤਲ ਇਕ ਬੇਘਰ ਵਿਅਕਤੀ ਨੇ ਕੀਤਾ ਸੀ। ਉਸ ਨੇ ਵਿਵੇਕ ਦੇ ਸਿਰ ‘ਤੇ ਹਥੌੜੇ ਨਾਲ 50 ਵਾਰ ਕੀਤੇ।
ਮਿਲੀ ਜਾਣਕਾਰੀ ਮੁਤਾਬਕ ਵਿਵੇਕ ਇੱਕ ਫੂਡ ਮਾਰਟ ਵਿੱਚ ਕੰਮ ਕਰਦਾ ਸੀ। ਇੱਕ ਬੇਘਰ ਆਦਮੀ ਸਟੋਰ ਦੇ ਬਾਹਰ ਆਉਂਦਾ ਸੀ। ਵਿਵੇਕ ਅਤੇ ਸਟੋਰ ਦੇ ਹੋਰ ਕਰਮਚਾਰੀਆਂ ਨੇ ਇਸ ਬੇਘਰ ਵਿਅਕਤੀ ਨੂੰ ਰਹਿਣ ਲਈ ਜਗ੍ਹਾ ਦਿੱਤੀ ਸੀ ਅਤੇ ਉਹ ਇੱਥੇ ਰਹਿੰਦਾ ਸੀ। ਪਰ 16 ਜਨਵਰੀ ਨੂੰ ਜਦੋਂ ਵਿਵੇਕ ਨੇ ਉਸ ਨੂੰ ਜਗ੍ਹਾ ਖਾਲੀ ਕਰਨ ਲਈ ਕਿਹਾ ਤਾਂ ਉਸ ਨੇ ਗੁੱਸੇ ‘ਚ ਆ ਕੇ ਵਿਵੇਕ ਦਾ ਕਤਲ ਕਰ ਦਿੱਤਾ।
ਅੱਜ ਇਸ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਪੁਲਿਸ ਨੇ ਦੱਸਿਆ ਕਿ ਜਾਰਜੀਆ ਵਿੱਚ ਇੱਕ ਭਾਰਤੀ ਵਿਦਿਆਰਥੀ ਦਾ ਕਤਲ ਕਰਨ ਵਾਲੇ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਫੂਡ ਮਾਰਟ ਵਿੱਚ ਵਿਵੇਕ ਦੇ ਨਾਲ ਕੰਮ ਕਰਨ ਵਾਲੇ ਇੱਕ ਕਰਮਚਾਰੀ ਨੇ ਪੁਲਿਸ ਨੂੰ ਦੱਸਿਆ – ਜੂਲੀਅਨ ਫਾਕਨਰ ਨਾਮ ਦਾ ਇੱਕ ਬੇਘਰ ਵਿਅਕਤੀ ਅਕਸਰ ਸਾਡੇ ਸਟੋਰ ਦੇ ਬਾਹਰ ਆ ਕੇ ਬੈਠਦਾ ਸੀ। ਅਸੀਂ ਉਸਨੂੰ ਛੱਡਣ ਲਈ ਕਦੇ ਨਹੀਂ ਕਿਹਾ। ਵਿਵੇਕ ਨੇ ਉਸ ਨੂੰ ਭੋਜਨ ਅਤੇ ਪਾਣੀ ਵੀ ਦਿੱਤਾ। ਇੱਕ ਵਾਰ ਜੂਲੀਅਨ ਨੇ ਇੱਕ ਕੰਬਲ ਮੰਗਿਆ, ਸਾਡੇ ਕੋਲ ਕੋਈ ਨਹੀਂ ਸੀ ਪਰ ਅਸੀਂ ਉਸਨੂੰ ਇੱਕ ਜੈਕਟ ਦੇ ਦਿੱਤੀ।
ਸਰਦੀਆਂ ਦਾ ਮੌਸਮ ਹੋਣ ਕਰਕੇ ਉਸ ਨੂੰ ਰਹਿਣ ਲਈ ਨਿੱਘੀ ਥਾਂ ਵੀ ਦਿੱਤੀ। ਜਿੰਨਾ ਅਸੀਂ ਕਰ ਸਕਦੇ ਸੀ, ਅਸੀਂ ਕੀਤਾ। ਜੂਲੀਅਨ ਦਾ ਸਟੋਰ ‘ਚ ਆਉਣਾ ਜਾਣਾ ਵੱਧ ਗਿਆ | 16 ਜਨਵਰੀ ਨੂੰ ਵਿਵੇਕ ਨੇ ਉਸ ਨੂੰ ਕਿਸੇ ਹੋਰ ਥਾਂ ਜਾਣ ਲਈ ਕਿਹਾ। ਉਸਨੂੰ ਧਮਕੀ ਵੀ ਦਿੱਤੀ ਗਈ ਕਿ ਜੇਕਰ ਉਹ ਨਾ ਗਿਆ ਤਾਂ ਪੁਲਿਸ ਬੁਲਾ ਲਈ ਜਾਵੇਗੀ।
ਇਸ ਤੋਂ ਬਾਅਦ ਜੂਲੀਅਨ ਵਿਵੇਕ ‘ਤੇ ਹਮਲਾ ਕਰਕੇ ਉਸ ਨੂੰ ਮਾਰ ਦਿੰਦਾ ਹੈ। ਵਿਵੇਕ 2 ਸਾਲ ਪਹਿਲਾਂ ਪੜ੍ਹਾਈ ਲਈ ਅਮਰੀਕਾ (America) ਆਇਆ ਸੀ। ਉਸਨੇ ਹਾਲ ਹੀ ਵਿੱਚ ਆਪਣੀ ਮਾਸਟਰਸ ਪੂਰੀ ਕੀਤੀ ਸੀ। ਇਕ ਅਧਿਕਾਰੀ ਨੇ ਦੱਸਿਆ- ਜਦੋਂ ਅਸੀਂ ਫੂਡ ਮਾਰਟ ਦੇ ਬਾਹਰ ਪਹੁੰਚੇ ਤਾਂ ਅਸੀਂ ਵਿਦਿਆਰਥੀ ਨੂੰ ਸਟੋਰ ਦੇ ਦਰਵਾਜ਼ੇ ‘ਤੇ ਪਿਆ ਦੇਖਿਆ। 53 ਸਾਲਾ ਉਕਤ ਦੋਸ਼ੀ ਨੇੜੇ ਹੀ ਖੜ੍ਹਾ ਸੀ। ਜ਼ਮੀਨ ‘ਤੇ ਬਹੁਤ ਖੂਨ ਸੀ। ਮੁਲਜ਼ਮ ਦੇ ਹੱਥ ਵਿੱਚ ਖੂਨ ਨਾਲ ਲੱਥਪੱਥ ਹਥੌੜਾ ਸੀ। ਅਸੀਂ ਐਂਬੂਲੈਂਸ ਬੁਲਾਈ ਅਤੇ ਦੋਸ਼ੀ ਨੂੰ ਹਥਿਆਰ ਰੱਖਣ ਲਈ ਕਿਹਾ। ਅਧਿਕਾਰੀ ਨੇ ਕਿਹਾ ਕਿ ਵਿਵੇਕ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਮੁਲਜ਼ਮ ਦੀ ਤਲਾਸ਼ੀ ਦੌਰਾਨ ਉਸ ਕੋਲੋਂ ਦੋ ਚਾਕੂ ਵੀ ਮਿਲੇ ਹਨ। ਇੱਕ ਹੋਰ ਹਥੌੜਾ ਵੀ ਮਿਲਿਆ ਹੈ। ਅਸੀਂ ਤੁਰੰਤ ਜੂਲੀਅਨ ਨੂੰ ਗ੍ਰਿਫਤਾਰ ਕਰ ਲਿਆ। ਫਿਲਹਾਲ ਦੋਸ਼ੀ ਜੂਲੀਅਨ ਜੇਲ੍ਹ ‘ਚ ਹੈ।
