ਚੰਡੀਗੜ੍ਹ 15 ਮਈ 2023: ਸੁਪਰੀਮ ਕੋਰਟ ਦੇ ਚੌਥੇ ਸਭ ਤੋਂ ਸੀਨੀਅਰ ਜਸਟਿਸ ਐਮਆਰ ਸ਼ਾਹ (MR Shah) ਸੋਮਵਾਰ ਨੂੰ ਸੇਵਾਮੁਕਤ ਹੋ ਗਏ। ਸ਼ਾਹ ਉਨ੍ਹਾਂ ਜੱਜਾਂ ਵਿੱਚੋਂ ਇੱਕ ਹਨ, ਜਿਨ੍ਹਾਂ ਨੇ ਸੁਪਰੀਮ ਕੋਰਟ ਵਿੱਚ ਸਭ ਤੋਂ ਵੱਧ ਫ਼ੈਸਲੇ ਦਿੱਤੇ ਹਨ। ਉਨ੍ਹਾਂ ਨੇ ਲਗਭਗ ਚਾਰ ਸਾਲਾਂ ਵਿੱਚ 712 ਫੈਸਲੇ ਸੁਣਾਏ। ਉਹ ਹਾਲ ਹੀ ਵਿੱਚ ਸ਼ਿਵ ਸੈਨਾ ਵਿਵਾਦ ਅਤੇ ਦਿੱਲੀ ਸਰਕਾਰ ਬਨਾਮ ਐਲਜੀ ਕੇਸਾਂ ਦਾ ਫੈਸਲਾ ਕਰਨ ਵਾਲੀ ਸੰਵਿਧਾਨਕ ਬੈਂਚ ਦਾ ਵੀ ਹਿੱਸਾ ਸੀ।

ਜਸਟਿਸ ਸ਼ਾਹ ਸੋਮਵਾਰ ਨੂੰ ਪਰੰਪਰਾ ਅਨੁਸਾਰ ਸੀਜੇਆਈ ਡੀਵਾਈ ਚੰਦਰਚੂੜ ਦੇ ਨਾਲ ਬੈਂਚ ‘ਤੇ ਬੈਠੇ ਸਨ। ਮੌਜੂਦਾ ਜੱਜ (MR Shah) ਵਜੋਂ ਆਪਣਾ ਆਖਰੀ ਭਾਸ਼ਣ ਦਿੰਦੇ ਹੋਏ ਸ਼ਾਹ ਨੇ ਕਿਹਾ, “ਮੈਨੂੰ ਨਹੀਂ ਪਤਾ ਕਿ ਮੈਂ ਇਸ ਦਾ ਹੱਕਦਾਰ ਹਾਂ ਜਾਂ ਨਹੀਂ, ਪਰ ਮੈਂ ਇਸਨੂੰ ਵਿਦਾਇਗੀ ਤੋਹਫ਼ੇ ਵਜੋਂ ਸਵੀਕਾਰ ਕਰਦਾ ਹਾਂ।” ਰਸਮੀ ਬੈਂਚ ‘ਤੇ ਏਜੀ ਵੈਂਕਟਾਰਮਨੀ, ਐਸਜੀ ਮਹਿਤਾ, ਸੀਨੀਅਰ ਵਕੀਲ ਪ੍ਰਦੀਪ ਕੁਮਾਰ ਰਾਏ, ਏਐਸਜੀ ਐਸਵੀ ਰਾਜੂ ਅਤੇ ਏਐਸਜੀ ਐਨ ਵੈਂਕਟਰਮਨ ਸਮੇਤ ਬਾਰ ਦੇ ਵੱਖ-ਵੱਖ ਮੈਂਬਰਾਂ ਨੇ ਜਸਟਿਸ ਐਮਆਰ ਸ਼ਾਹ ਨੂੰ ਯਾਦ ਕੀਤਾ।

ਜਸਟਿਸ ਸ਼ਾਹ ਦੀ ਸੇਵਾਮੁਕਤੀ ‘ਤੇ ਸੀਜੇਆਈ ਡੀਵਾਈ ਚੰਦਰਚੂੜ ਨੇ ਕਿਹਾ ਕਿ ਜਸਟਿਸ ਸ਼ਾਹ ਨਾਲ ਬੈਠ ਕੇ ਬਹੁਤ ਖੁਸ਼ੀ ਹੋਈ, ਭਾਵੇਂ ਉਹ ਅਪਰਾਧਿਕ ਮਾਮਲੇ ਜਾਂ ਜੀਐਸਟੀ ਬਾਰੇ ਨਵਾਂ ਕਾਨੂੰਨ ਹੋਵੇ। ਉਹ ਹਮੇਸ਼ਾ ਨਵੀਂ ਚੁਣੌਤੀ ਲਈ ਤਿਆਰ ਰਹਿੰਦਾ ਸੀ। ਜੇਕਰ ਮੈਂ ਉਨ੍ਹਾਂ ਨੂੰ ਫੈਸਲਾ ਲਿਖਣ ਲਈ ਭੇਜਦਾ ਹਾਂ, ਤਾਂ ਇਹ 48 ਘੰਟਿਆਂ ਵਿੱਚ ਮੇਰੇ ਡੈਸਕ ‘ਤੇ ਹੋਵੇਗਾ। ਮੈਂ ਹਮੇਸ਼ਾ ਉਨ੍ਹਾਂ ‘ਤੇ ਭਰੋਸਾ ਕੀਤਾ।