ਹਰਿਆਣਾ, 05 ਸਤੰਬਰ 2025:Haryana flood news: ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੀਆਂ ਨਦੀਆਂ ਅਤੇ ਉਨ੍ਹਾਂ ਦਾ ਵਹਾਅ ਹੁਣ ਹਰਿਆਣਾ ਦੇ ਪੇਂਡੂ ਖੇਤਰਾਂ ਤੋਂ ਬਾਅਦ ਸ਼ਹਿਰਾਂ ‘ਚ ਤਬਾਹੀ ਮਚਾ ਰਿਹਾ ਹੈ। ਪਾਣੀ ਭਰਨ ਕਾਰਨ ਛੇ ਰਾਸ਼ਟਰੀ ਰਾਜਮਾਰਗਾਂ ‘ਤੇ ਵਾਹਨਾਂ ਦੀ ਗਤੀ ਅਤੇ ਜਨ-ਜੀਵਨ ਪ੍ਰਭਾਵਿਤ ਹੋਇਆ ਹੈ।
ਹਿਸਾਰ ‘ਚ ਹਾਂਸੀ-ਬਰਵਾਲਾ ਰਾਸ਼ਟਰੀ ਰਾਜਮਾਰਗ-148B ‘ਤੇ ਪਿੰਡ ਚਾਨੌਤ ਦੇ ਨੇੜੇ ਲਗਭਗ ਇੱਕ ਕਿਲੋਮੀਟਰ ਦੇ ਖੇਤਰ ‘ਚ ਪਾਣੀ ਭਰਨ ਕਾਰਨ ਵਾਹਨਾਂ ਨੂੰ ਦੂਜੇ ਰਸਤੇ ਵੱਲ ਮੋੜ ਦਿੱਤਾ ਗਿਆ ਹੈ। ਵੀਰਵਾਰ ਨੂੰ ਮੀਂਹ ਅਤੇ ਪਾਣੀ ਭਰਨ ਕਾਰਨ ਪੰਜ ਜਣਿਆਂ ਦੀ ਮੌਤ ਹੋ ਗਈ, ਜਦੋਂ ਕਿ ਇੱਕ ਵਹਿ ਗਿਆ। ਯਮੁਨਾ, ਘੱਗਰ, ਟਾਂਗਰੀ ਅਤੇ ਮਾਰਕੰਡਾ ਖ਼ਤਰੇ ਦੇ ਨਿਸ਼ਾਨ ‘ਤੇ ਹਨ, ਜਿਸ ਕਾਰਨ ਲਗਾਤਾਰ ਖ਼ਤਰਾ ਬਣਿਆ ਹੋਇਆ ਹੈ।
ਹਿਸਾਰ ‘ਚ ਹਿਸਾਰ-ਚੰਡੀਗੜ੍ਹ NH-52 ਅਤੇ ਦਿੱਲੀ-ਹਿਸਾਰ NH-9 ਪਾਣੀ ‘ਚ ਡੁੱਬੇ ਹੋਏ ਹਨ। ਇਨ੍ਹਾਂ ਤੋਂ ਇਲਾਵਾ, ਅੰਬਾਲਾ ‘ਚ ਅੰਬਾਲਾ-ਰੁੜਕੀ NH-344 ‘ਤੇ ਪਾਣੀ ਵਹਿ ਰਿਹਾ ਹੈ। ਇਸ ਕਾਰਨ, ਹਾਈਵੇਅ ਦੇ ਇੱਕ ਪਾਸੇ ਨੂੰ ਬੰਦ ਕਰਨਾ ਪਿਆ। ਇਹ ਹਾਈਵੇਅ ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਉਤਰਾਖੰਡ ਅਤੇ ਉੱਤਰ ਪ੍ਰਦੇਸ਼ ਨੂੰ ਜੋੜਦਾ ਹੈ। ਇਸ ਕਾਰਨ ਪੰਜ ਸੂਬਿਆਂ ਦੇ ਵਾਹਨ ਜਾਮ ‘ਚ ਫਸ ਰਹੇ ਹਨ।
ਵੀਰਵਾਰ ਨੂੰ ਅੰਬਾਲਾ ‘ਚ ਅੰਬਾਲਾ-ਜਗਾਧਾਰੀ NH 444-A ‘ਤੇ ਟਾਂਗਰੀ ਨਦੀ ਦਾ ਪਾਣੀ ਆ ਗਿਆ ਹੈ, ਜਦੋਂ ਕਿ ਅੰਬਾਲਾ-ਦਿੱਲੀ ਹਾਈਵੇਅ NH-44 ‘ਤੇ, ਹਿਸਾਰ ਬਾਈਪਾਸ ਦੇ ਨੇੜੇ ਬਲਦੇਵ ਨਗਰ ‘ਚ ਪਾਣੀ ਆਉਣ ਕਾਰਨ ਇੱਕ ਲੇਨ ਨੂੰ ਆਵਾਜਾਈ ਲਈ ਬੰਦ ਕਰ ਦਿੱਤਾ ਗਿਆ ਹੈ। ਮਾਰਕੰਡਾ ਦਾ ਪਾਣੀ ਇਸਮਾਈਲਾਬਾਦ ਬਾਈਪਾਸ ‘ਤੇ ਰਾਸ਼ਟਰੀ ਹਾਈਵੇਅ 152 ਤੱਕ ਵੀ ਪਹੁੰਚ ਗਿਆ। ਅੰਬਾਲਾ-ਸਾਹਾ ਹਾਈਵੇਅ ਅਤੇ ਹਿਸਾਰ ਤੋਂ ਭਦਰਾ ਜਾਣ ਵਾਲੇ ਰਾਜ ਮਾਰਗ ‘ਤੇ ਪਿੰਡ ਆਰਿਆਨਗਰ ‘ਚ ਇੱਕ ਕਿਲੋਮੀਟਰ ਤੱਕ ਪਾਣੀ ਭਰਿਆ ਹੋਇਆ ਹੈ। SDRF ਨੇ ਸਵੇਰੇ ਚਾਰ ਵਜੇ ਬਚਾਅ ਕਾਰਜ ਸ਼ੁਰੂ ਕੀਤਾ ਅਤੇ 300 ਜਣਿਆਂ ਨੂੰ ਬਾਹਰ ਕੱਢਿਆ।
ਬੁੱਧਵਾਰ ਰਾਤ ਅੰਬਾਲਾ ‘ਚ ਘੱਗਰ, ਟਾਂਗਰੀ ਅਤੇ ਮਾਰਕੰਡਾ ਨਦੀਆਂ ‘ਚ ਜ਼ਿਆਦਾ ਪਾਣੀ ਆਉਣ ਕਾਰਨ 146 ਤੋਂ ਵੱਧ ਪਿੰਡਾਂ ‘ਚ ਪਾਣੀ ਭਰ ਗਿਆ। ਇਸ ਤੋਂ ਇਲਾਵਾ ਹਿਸਾਰ ਦੇ 28 ਪਿੰਡਾਂ, ਭਿਵਾਨੀ ਦੇ 15, ਚਰਖੀ ਦਾਦਰੀ ਦੇ 30, ਫਰੀਦਾਬਾਦ ਦੇ 27, ਕੁਰੂਕਸ਼ੇਤਰ ਦੇ 20 ਪਿੰਡ ਅਤੇ ਪਾਣੀਪਤ ਦੀਆਂ ਛੇ ਕਲੋਨੀਆਂ ਦੀਆਂ ਬਾਹਰੀ ਬਸਤੀਆਂ, ਝੌਂਪੜੀਆਂ ਅਤੇ 34 ਸਕੂਲਾਂ ‘ਚ ਪਾਣੀ ਭਰ ਗਿਆ ਹੈ।
ਅੰਬਾਲਾ ‘ਚ ਮਾਰਕੰਡਾ, ਟਾਂਗਰੀ ਅਤੇ ਘੱਗਰ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੇ ਹਨ। ਸਿਰਸਾ ‘ਚ ਘੱਗਰ ਨਦੀ ‘ਚ ਪਾਣੀ ਦਾ ਵਹਾਅ ਪਿਛਲੇ 24 ਘੰਟਿਆਂ ‘ਚ 18,600 ਤੋਂ ਵੱਧ ਕੇ 21,000 ਕਿਊਸਿਕ ਹੋ ਗਿਆ, ਜੋ ਖ਼ਤਰੇ ਦੇ ਨਿਸ਼ਾਨ ਨੂੰ ਪਾਰ ਕਰ ਗਿਆ। ਪਾਣੀਪਤ ‘ਚ ਵੀ ਯਮੁਨਾ 231.50 ਦੇ ਖ਼ਤਰੇ ਦੇ ਨਿਸ਼ਾਨ ਦੇ ਨੇੜੇ ਵਹਿ ਰਹੀ ਹੈ। ਫਰੀਦਾਬਾਦ ‘ਚ ਯਮੁਨਾ ਨਦੀ ਦਾ ਪਾਣੀ ਦਾ ਪੱਧਰ ਲਗਾਤਾਰ ਵੱਧ ਰਿਹਾ ਹੈ। ਬਸੰਤਪੁਰ ਅਤੇ ਇਸਦੇ ਆਲੇ ਦੁਆਲੇ ਦੇ ਕਈ ਪਿੰਡਾਂ ‘ਚ ਪਾਣੀ ਦਾ ਪੱਧਰ ਪੰਜ ਫੁੱਟ ਤੱਕ ਪਹੁੰਚ ਗਿਆ ਹੈ।
ਹੜ੍ਹ ਵਰਗੀ ਸਥਿਤੀ ਦੇ ਮੱਦੇਨਜ਼ਰ, ਹਿਸਾਰ ਅਤੇ ਸਿਰਸਾ, ਫਤਿਹਾਬਾਦ ਦੇ ਰਤੀਆ, ਭੂਨਾ, ਟੋਹਾਣਾ ਅਤੇ ਜਾਖਲ ਦੇ ਸਾਰੇ ਸਕੂਲ ਅਤੇ ਕੈਥਲ ਦੇ ਗੁਹਲਾ-ਚਿੱਕਾ ਦੇ ਸਕੂਲ ਛੇ ਤੱਕ ਬੰਦ ਰਹਿਣਗੇ। ਕੁਰੂਕਸ਼ੇਤਰ ਦੇ ਪਿਹੋਵਾ, ਇਸਮਾਈਲਾਬਾਦ ਅਤੇ ਸ਼ਾਹਾਬਾਦ ਦੇ ਸਕੂਲ ਅਗਲੇ ਹੁਕਮਾਂ ਤੱਕ ਬੰਦ ਰਹਿਣਗੇ। ਇਸ ਤੋਂ ਇਲਾਵਾ, ਕਰਨਾਲ ਅਤੇ ਪਾਣੀਪਤ ‘ਚ ਯਮੁਨਾ ਨਦੀ ਦੇ ਕੰਢੇ ਸਥਿਤ ਪਿੰਡਾਂ ਦੇ 125 ਸਕੂਲ ਅਗਲੇ ਹੁਕਮਾਂ ਤੱਕ ਬੰਦ ਰਹਿਣਗੇ। ਅੰਬਾਲਾ ਵਿੱਚ ਜੋ ਸਕੂਲ ਹੜ੍ਹ ਨਾਲ ਭਰੇ ਹੋਏ ਹਨ, ਉਹ ਬੰਦ ਰਹਿਣਗੇ।
Read More: ਹੜ੍ਹਾਂ ‘ਚ ਜਾਨਾਂ ਗੁਆਉਣ ਵਾਲੇ ਪਰਿਵਾਰਾਂ ਨੂੰ ਪੰਜਾਬ ਸਰਕਾਰ ਨੇ ਦਿੱਤੀ ਵਿੱਤੀ ਸਹਾਇਤਾ
