ਚੰਡੀਗੜ੍ਹ, 01 ਮਾਰਚ 2025: ਇੰਗਲੈਂਡ ਦੇ ਜੋਸ ਬਟਲਰ (Jos Buttler) ਨੇ ਵਨਡੇ ਅਤੇ ਟੀ-20 ਫਾਰਮੈਟਾਂ ‘ਚ ਟੀਮ ਦੀ ਕਪਤਾਨੀ ਛੱਡ ਦਿੱਤੀ ਹੈ। ਬਟਲਰ ਨੇ ਇਹ ਫੈਸਲਾ ਚੈਂਪੀਅਨਜ਼ ਟਰਾਫੀ 2025 ‘ਚ ਟੀਮ ਦੇ ਮਾੜੇ ਪ੍ਰਦਰਸ਼ਨ ਤੋਂ ਬਾਅਦ ਲਿਆ। ਬਟਲਰ ਸ਼ਨੀਵਾਰ ਨੂੰ ਕਰਾਚੀ ‘ਚ ਦੱਖਣੀ ਅਫਰੀਕਾ ਵਿਰੁੱਧ ਗਰੁੱਪ ਪੜਾਅ ਦੇ ਮੈਚ ‘ਚ ਆਖਰੀ ਵਾਰ ਟੀਮ ਦੀ ਅਗਵਾਈ ਕਰਨਗੇ।
ਜੋਸ ਬਟਲਰ ਨੇ ਮੈਚ ਤੋਂ ਪਹਿਲਾਂ ਸ਼ੁੱਕਰਵਾਰ ਨੂੰ ਪ੍ਰੈਸ ਕਾਨਫਰੰਸ ‘ਚ ਕਪਤਾਨੀ ਛੱਡਣ ਬਾਰੇ ਗੱਲ ਕੀਤੀ। ਇੰਗਲੈਂਡ ਦੀ ਟੀਮ ਚੈਂਪੀਅਨਜ਼ ਟਰਾਫੀ 2025 ‘ਚ ਗਰੁੱਪ ਪੜਾਅ ‘ਚ ਹੀ ਬਾਹਰ ਹੋ ਗਈ ਹੈ।
ਪ੍ਰੈਸ ਕਾਨਫਰੰਸ ‘ਚ ਬਟਲਰ (Jos Buttler) ਨੇ ਕਿਹਾ, ‘ਇਹ ਮੇਰੇ ਲਈ ਕਪਤਾਨੀ ਛੱਡਣ ਦਾ ਸਹੀ ਸਮਾਂ ਹੈ, ਇਹ ਟੀਮ ਲਈ ਵੀ ਸਹੀ ਸਮਾਂ ਹੈ।’ ਮੈਨੂੰ ਉਮੀਦ ਹੈ ਕਿ ਇੱਕ ਨਵਾਂ ਖਿਡਾਰੀ ਟੀਮ ਦੀ ਕਮਾਨ ਸੰਭਾਲੇਗਾ ਅਤੇ ਕੋਚ ਮੈਕੁਲਮ ਦੇ ਨਾਲ ਮਿਲ ਕੇ ਟੀਮ ਨੂੰ ਨਵੀਆਂ ਉਚਾਈਆਂ ‘ਤੇ ਲੈ ਜਾਵੇਗਾ। ਚੈਂਪੀਅਨਜ਼ ਟਰਾਫੀ ਦੇ ਨਤੀਜੇ ਮੇਰੀ ਕਪਤਾਨੀ ਲਈ ਬਹੁਤ ਮਹੱਤਵਪੂਰਨ ਸਨ।
ਜਦੋਂ ਮੈਕੁਲਮ ਵਾਈਟ ਬਾਲ ਕੋਚ ਬਣਿਆ, ਮੈਂ ਉਸ ਨਾਲ ਕੰਮ ਕਰਨ ਲਈ ਬਹੁਤ ਉਤਸ਼ਾਹਿਤ ਸੀ। ਮੈਨੂੰ ਉਮੀਦ ਸੀ ਕਿ ਟੀਮ ਆਪਣੇ ਨਤੀਜੇ ਬਦਲੇਗੀ ਅਤੇ ਤੇਜ਼ੀ ਨਾਲ ਅੱਗੇ ਵਧੇਗੀ। ਹਾਲਾਂਕਿ, ਅਜਿਹਾ ਨਹੀਂ ਹੋ ਸਕਿਆ, ਇਸ ਲਈ ਮੈਂ ਕਪਤਾਨੀ ਛੱਡ ਰਿਹਾ ਹਾਂ।
ਇੰਗਲੈਂਡ ਨੇ ਆਪਣੇ ਦੋਵੇਂ ਸ਼ੁਰੂਆਤੀ ਮੈਚ ਹਾਰੇ ਹਨ, ਜਿਸ ਨਾਲ ਉਸਦੀ ਮੁਹਿੰਮ ਗਰੁੱਪ ਪੜਾਅ ‘ਤੇ ਹੀ ਖਤਮ ਹੋ ਗਈ। ਇੰਗਲੈਂਡ ਨੂੰ ਚੈਂਪੀਅਨਜ਼ ਟਰਾਫੀ ਦੇ ਪਹਿਲੇ ਮੈਚ ਵਿੱਚ ਆਸਟ੍ਰੇਲੀਆ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਆਸਟ੍ਰੇਲੀਆ ਨੇ ਇੰਗਲੈਂਡ ਵਿਰੁੱਧ ਆਈਸੀਸੀ ਵਨਡੇ ਟੂਰਨਾਮੈਂਟ ‘ਚ ਸਭ ਤੋਂ ਵੱਡਾ ਟੀਚਾ ਪ੍ਰਾਪਤ ਕੀਤਾ। ਇਸ ਤੋਂ ਬਾਅਦ, ਅਫਗਾਨਿਸਤਾਨ ਨੇ ਇੰਗਲੈਂਡ ਨੂੰ ਹਰਾ ਕੇ ਸੈਮੀਫਾਈਨਲ ਦੀ ਦੌੜ ਤੋਂ ਬਾਹਰ ਕਰ ਦਿੱਤਾ। ਅਫ਼ਗਾਨਿਸਤਾਨ ਅਤੇ ਇੰਗਲੈਂਡ ਵਿਚਕਾਰ ਮੈਚ ਕਰੋ ਜਾਂ ਮਰੋ ਦੀ ਸਥਿਤੀ ਵਰਗਾ ਸੀ।
ਜਿਕਰਯੋਗ ਹੈ ਕਿ ਜੋਸ ਬਟਲਰ ਨੇ ਜੂਨ 2022 ‘ਚ ਇੰਗਲੈਂਡ ਦੀ ਸੀਮਤ ਓਵਰਾਂ ਦੀ ਟੀਮ ਦੀ ਕਪਤਾਨੀ ਸੰਭਾਲੀ ਅਤੇ 2022 ਦੇ ਟੀ-20 ਵਿਸ਼ਵ ਕੱਪ ‘ਚ ਇੰਗਲੈਂਡ ਨੂੰ ਜਿੱਤ ਦਿਵਾਈ। ਹਾਲਾਂਕਿ, ਟੀਮ ਨੂੰ ਹਾਲ ਹੀ ਦੇ ਟੂਰਨਾਮੈਂਟਾਂ ‘ਚ ਸੰਘਰਸ਼ ਕਰਨਾ ਪਿਆ ਹੈ ਅਤੇ ਉਹ ਆਪਣੇ 50 ਓਵਰਾਂ ਅਤੇ ਟੀ-20 ਵਿਸ਼ਵ ਕੱਪ ਖਿਤਾਬਾਂ ਦਾ ਬਚਾਅ ਕਰਨ ‘ਚ ਅਸਫਲ ਰਹੀ ਹੈ। ਬਟਲਰ ਨੇ 36 ਵਨਡੇ ਮੈਚਾਂ ‘ਚ ਇੰਗਲੈਂਡ ਦੀ ਕਪਤਾਨੀ ਕੀਤੀ, ਜਿਸ ‘ਚੋਂ 13 ਜਿੱਤੇ ਅਤੇ 22 ਹਾਰੇ ਹਨ।
Read More: Eng vs AFG: ਇਬਰਾਹਿਮ ਜ਼ਾਦਰਾਨ ਨੇ ਚੈਂਪੀਅਨਜ਼ ਟਰਾਫੀ ‘ਚ ਬਣਾਇਆ ਸਭ ਤੋਂ ਵੱਡਾ ਵਿਅਕਤੀਗਤ ਸਕੋਰ, ਇੰਗਲੈਂਡ ਬਾਹਰ
