ਸਰੀ/ਕੈਨੇਡਾ, 9 ਅਕਤੂਬਰ 2023: ਕੌਮਾਂਤਰੀ ਪੱਧਰ ਦੀ ਦੋ ਰੋਜ਼ਾ ਪੰਜਵੀਂ ਪੰਜਾਬੀ ਕਾਨਫਰੰਸ ਅੱਜ ਕੈਨੇਡਾ ਦੇ ਸਰੀ ਸ਼ਹਿਰ ‘ਚ ਸ਼ੁਰੂ ਹੋ ਗਈ l ਵੱਖ -ਵੱਖ ਸ਼ਖ਼ਸੀਅਤਾਂ ਵਲੋਂ ਸਮਾਂ ਰੌਸ਼ਨ ਨਾਲ ਸ਼ੁਰੂ ਹੋਈ ਪੰਜਾਬੀ ਕਾਨਫਰੰਸ ਦੇ ਪਹਿਲੇ ਪ੍ਰਧਾਨਗੀ ਮੰਡਲ ‘ਚ ਡਾ. ਸਾਧੂ ਸਿੰਘ, ਡਾ. ਐਸ. ਪੀ. ਸਿੰਘ, ਡਾ. ਬੀ. ਐਸ. ਘੁੰਮਣ, ਰਾਏ ਅਜ਼ੀਜ਼ ਉਲ੍ਹਾ ਖਾਨ, ਡਾ. ਗੁਰਪਿੰਦਰ ਸਿੰਘ ਸਮਰਾ ਅਤੇ ਸੰਮੇਲਨ ਦੇ ਮੁੱਖ ਪ੍ਰਬੰਧਕ ਸ਼ਾਮਲ ਸਨ l

ਸ਼ੁਰੂਆਤ ‘ਚ ਕਲਾਸਿਕ ਗਾਇਨ ਰਾਹੀਂ ਸੁਨੀਲ ਸਿੰਘ ਡੋਗਰਾ ਨੇ ਹਾਜ਼ਰੀ ਭਰੀ l ਆਰੰਭਿਕ ਸ਼ਬਦ ‘ਚ ਡਾ. ਐਸ. ਪੀ. ਸਿੰਘ ਨੇ ਕਿਹਾ ਕਿ ਪੰਜਾਬੀ ਮਾਂ ਬੋਲੀ ਤੇ ਸਾਹਿਤ ਨੂੰ ਦੇਸ਼ ਤੋਂ ਇਲਾਵਾ ਵਿਦੇਸ਼ਾਂ ‘ਚ ਵੀ ਪ੍ਰਫੁਲਿਤ ਕਰਨ ਲਈ ਅਜਿਹੇ ਉਪਰਾਲੇ ਸਮੇਂ ਦੀ ਵੱਡੀ ਲੋੜ ਹੈ l ਉਨ੍ਹਾਂ ਦੁਨੀਆਂ ਭਰ ਤੋਂ ਪੁੱਜੇ ਸਾਹਿਤਕਾਰਾਂ ਤੇ ਪੰਜਾਬੀ ਪ੍ਰੇਮੀਆਂ ਨੂੰ ਜੀ ਆਇਆ ਆਖਿਆ ਤੇ ਸੁੱਖੀ ਬਾਠ ਤੇ ਟੀਮ ਨੂੰ ਵਧਾਈ ਦਿੱਤੀ |

ਸਵਾਗਤੀ ਸ਼ਬਦ ਸ਼ਾਹਜਾਦ ਨਜ਼ੀਰ ਖਾਨ ਨੇ ਬੋਲੇ ਕੇ ਹਾਜ਼ਰੀ ਭਰੀ l ਮੰਚ ਸੰਚਾਲਣ ਕਰਦਿਆਂ ਅਮਰੀਕ ਪਲਾਹੀ ਅਤੇ ਕਵਿੰਦਰ ਚਾਂਦ ਨੇ ਇਸ ਪੰਜਾਬੀ ਸੰਮੇਲਨ ਦੌਰਾਨ ਰੱਖੇ ਵਿਸਿਆਂ ਪੰਜਾਬੀ ਸਾਹਿਤ, ਚੇਤਨਤਾ ਅਤੇ ਪਰਵਾਸ ਬਾਰੇ ਚਾਨਣਾ ਪਾਇਆ l ਪਹਿਲੇ ਦਿਨ ਪੰਜਾਬ ਤੋਂ ਪੁੱਜੇ ਪ੍ਰੋ. ਪਾਲੀ ਭੁਪਿੰਦਰ ਨੇ ‘ਪਰਵਾਸ ਅਤੇ ਪ੍ਰਭਾਵ’ ਤੇ ਵਿਚਾਰ ਰੱਖੇ |

ਸਰੀ ਦੇ ਪੁਲਿਸ ਅਧਿਕਾਰੀ ਜੈਗ ਖੋਸਾ ਨੇ ‘ ਬਦਲਦਾ ਸਮਾਜਿਕ ਵਰਤਾਰਾ ਅਤੇ ਕੈਨੇਡੀਅਨ ਕਾਨੂੰਨ’ ਬਾਰੇ ਜਾਣਕਾਰੀ ਦਿੱਤੀ l ਪਹਿਲੇ ਦਿਨ ਹੋਈ ਕਵਿਤਾ ਪੇਸ਼ਕਾਰੀ ‘ਚ ਕਵੀ ਗੁਰਤੇਜ ਕੋਹਾਰਵਾਲਾ, ਤਾਹਿਰ ਸਰਾ, ਡਾ. ਕਰਨੈਲ ਸਿੰਘ ਸ਼ੇਰਗਿੱਲ, ਡਾ. ਗੁਰਮਿੰਦਰ ਸਿੰਘ ਸਿੱਧੂ, ਬਾਬਾ ਨਜਮੀ ਅਤੇ ਸੁਖਵਿੰਦਰ ਅੰਮ੍ਰਿਤ ਨੇ ਆਪਣੀਆਂ ਰਚਨਾਵਾਂ ਪੜੀਆਂ l