ਅੰਮ੍ਰਿਤਸਰ 26 ਫਰਵਰੀ 2024: ਇੰਡੀਗੋ (IndiGo) ਨੇ 22 ਫਰਵਰੀ, 2024 ਤੋਂ ਆਪਣੀ ਲਖਨਊ-ਅੰਮ੍ਰਿਤਸਰ ਸਿੱਧੀ ਉਡਾਣ ਮੁੜ ਸ਼ੁਰੂ ਕਰ ਦਿੱਤੀ ਹੈ। ਅੰਮ੍ਰਿਤਸਰ ਹਵਾਈ ਅੱਡੇ ਦੀ ਬਿਹਤਰੀ ਅਤੇ ਵਧੇਰੇ ਉਡਾਣਾਂ ਲਈ ਯਤਨਸ਼ੀਲ ਫਲਾਈ ਅੰਮ੍ਰਿਤਸਰ ਇਨੀਸ਼ੀਏਟਿਵ ਦੇ ਕਨਵੀਨਰ ਇੰਡੀਆ ਯੋਗੇਸ਼ ਕਾਮਰਾ ਨੇ ਪ੍ਰੈਸ ਨਾਲ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਲਖਨਊ ਦੇ ਚੌਧਰੀ ਚਰਨ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਅੰਮ੍ਰਿਤਸਰ ਦੇ ਸ੍ਰੀ ਗੁਰੂ ਰਾਮ ਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡਾ, ਅੰਮ੍ਰਿਤਸਰ ਪਹੁੰਚਣ ਤੋਂ ਬਾਅਦ ਜਹਾਜ਼ ਸ੍ਰੀਨਗਰ ਲਈ ਰਵਾਨਾ ਹੁੰਦਾ ਹੈ।
ਕਾਮਰਾ ਅਨੁਸਾਰ ਲਖਨਊ-ਅੰਮ੍ਰਿਤਸਰ ਵਿਚਕਾਰ ਇਹ ਉਡਾਣ 31 ਦਸੰਬਰ, 2023 ਤੋਂ ਮੁਅੱਤਲ ਕਰ ਦਿੱਤੀ ਗਈ ਸੀ ਕਿਉਂਕਿ ਏਅਰਲਾਈਨ ਨੂੰ ਆਪਣੇ ਕਈ ਏਅਰਬੱਸ ਜਹਾਜ਼ਾਂ ਦੇ ਇੰਜਣ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਇਸ ਉਡਾਣ ਦੇ ਮੁੜ ਸ਼ੁਰੂ ਹੋਣ ਨਾਲ, ਇੰਡੀਗੋ (IndiGo) ਹੁਣ ਅੰਮ੍ਰਿਤਸਰ-ਸ਼੍ਰੀਨਗਰ ਵਿਚਕਾਰ ਰੋਜ਼ਾਨਾ 2 ਉਡਾਣਾਂ ਚਲਾ ਰਹੀ ਹੈ।
ਲਖਨਊ ਤੋਂ ਉਡਾਣ ਸਵੇਰੇ 7:15 ਵਜੇ ਰਵਾਨਾ ਹੁੰਦੀ ਹੈ ਅਤੇ ਸਵੇਰੇ 8:50 ਵਜੇ ਅੰਮ੍ਰਿਤਸਰ ਪਹੁੰਚਦੀ ਹੈ। ਫਿਰ ਇਹੀ ਜਹਾਜ਼ ਅੰਮ੍ਰਿਤਸਰ ਤੋਂ ਸਵੇਰੇ 9:25 ਵਜੇ ਰਵਾਨਾ ਹੋ ਕੇ ਸਵੇਰੇ 10:15 ਵਜੇ ਸ੍ਰੀਨਗਰ ਪਹੁੰਚਦਾ ਹੈ। ਸ੍ਰੀਨਗਰ ਤੋਂ ਫਿਰ ਇਹ ਉਡਾਣ ਸਵੇਰੇ 10:45 ਵਜੇ ਰਵਾਨਾ ਹੋ ਕੇ ਸਵੇਰੇ 11:45 ਵਜੇ ਅੰਮ੍ਰਿਤਸਰ ਪਹੁੰਚਦੀ ਹੈ। 30 ਮਿੰਟ ਦੇ ਅੰਮ੍ਰਿਤਸਰ ਰੁਕਣ ਤੋਂ ਬਾਅਦ, ਉਹੀ ਜਹਾਜ਼ ਫਿਰ ਦੁਪਹਿਰ 12:15 ਵਜੇ ਰਵਾਨਾ ਹੋ ਕੇ ਦੁਪਹਿਰ 1:45 ਵਜੇ ਲਖਨਊ ਪਹੁੰਚਦਾ ਹੈ।
ਕਾਮਰਾ ਨੇ ਅੱਗੇ ਦੱਸਿਆ ਕਿ ਇੰਡੀਗੋ ਬੈਂਗਲੁਰੂ – ਅੰਮ੍ਰਿਤਸਰ – ਸ੍ਰੀਨਗਰ ਉਡਾਣ ਦਾ ਵੀ ਸੰਚਾਲਨ ਕਰ ਰਹੀ ਹੈ। ਬੈਂਗਲੁਰੂ ਤੋਂ ਅੰਮ੍ਰਿਤਸਰ ਪਹੁੰਚਣ ਤੋਂ ਬਾਅਦ ਜਹਾਜ਼ ਸ੍ਰੀਨਗਰ ਲਈ ਰਵਾਨਾ ਹੁੰਦਾ ਹੈ ਅਤੇ ਫਿਰ ਉਸੇ ਰੂਟ ‘ਤੇ ਵਾਪਸ ਆਉਂਦਾ ਹੈ। ਅੰਮ੍ਰਿਤਸਰ ਤੋਂ ਸ੍ਰੀਨਗਰ ਲਈ ਦੂਜੀ ਰੋਜ਼ਾਨਾ ਉਡਾਣ ਦੁਪਹਿਰ 1:20 ਵਜੇ ਰਵਾਨਾ ਹੁੰਦੀ ਹੈ ਅਤੇ ਦੁਪਹਿਰ 2:10 ਵਜੇ ਸ੍ਰੀਨਗਰ ਪਹੁੰਚਦੀ ਹੈ। ਫਿਰ ਇਹ ਸ਼੍ਰੀਨਗਰ ਤੋਂ ਦੁਪਹਿਰ 2:45 ‘ਤੇ ਰਵਾਨਾ ਹੁੰਦੀ ਹੈ ਅਤੇ ਦੁਪਹਿਰ 3:40 ‘ਤੇ ਅੰਮ੍ਰਿਤਸਰ ਪਹੁੰਚਦੀ ਹੈ।
