ਚੰਡੀਗੜ੍ਹ, 09 ਅਕਤੂਬਰ 2023: ਭਾਰਤੀ ਫੌਜ ਨੇ ਉੱਤਰੀ ਸਿੱਕਮ (North Sikkim) ਦੇ ਹੜ੍ਹ ਪ੍ਰਭਾਵਿਤ ਖੇਤਰਾਂ ਵਿੱਚ ਰਾਹਤ ਅਤੇ ਬਚਾਅ ਲਈ ਇੱਕ ਵੱਡਾ ਅਭਿਆਨ ਸ਼ੁਰੂ ਕੀਤਾ ਹੈ। ਫੌਜ ਹੜ੍ਹਾਂ ਤੋਂ ਬਾਅਦ ਜਿਨ੍ਹਾਂ ਪਿੰਡਾਂ ਨਾਲ ਸੰਪਰਕ ਟੁੱਟ ਗਿਆ ਸੀ ਉਨ੍ਹਾਂ ਨੂੰ ਦੁਬਾਰਾ ਜੋੜਨ ਲਈ ਵੱਡੇ ਪੱਧਰ ‘ਤੇ ਮੁਹਿੰਮ ਚਲਾ ਰਹੀ ਹੈ। ਇਸ ਦਾ ਧਿਆਨ ਚੁੰਗਥਾਂਗ ਰਾਹੀਂ ਉੱਤਰੀ ਸਿੱਕਮ ਨਾਲ ਸੰਪਰਕ ਬਹਾਲ ਕਰਨ ‘ਤੇ ਹੈ, ਜੋ ਵਿਨਾਸ਼ਕਾਰੀ ਹੜ੍ਹਾਂ ਦੌਰਾਨ ਸਭ ਤੋਂ ਵੱਧ ਪ੍ਰਭਾਵਿਤ ਹੋਇਆ ਸੀ। ਫੌਜ ਨੇ ਔਖੇ ਇਲਾਕੇ ਵਿੱਚੋਂ ਇੱਕ ਚੁਣੌਤੀਪੂਰਨ ਕਾਰਵਾਈ ਕੀਤੀ ਅਤੇ ਚੁੰਗਥਾਂਗ ਦੇ ਉੱਤਰ-ਪੱਛਮ ਵਿੱਚ ਰਾਬੋਮ ਦੇ ਅਲੱਗ-ਥਲੱਗ ਪਿੰਡਾਂ ਵਿੱਚ ਪਹੁੰਚ ਕੇ 150-200 ਜਣਿਆਂ ਨੂੰ ਬਚਾਇਆ।
ਕੋਲਕਾਤਾ ‘ਚ ਰੱਖਿਆ ਮੰਤਰਾਲੇ ਦੇ ਬੁਲਾਰੇ ਵਿੰਗ ਕਮਾਂਡਰ ਹਿਮਾਂਸ਼ੂ ਤਿਵਾਰੀ ਮੁਤਾਬਕ ਭਾਰਤੀ ਫੌਜ ਪਿਛਲੇ ਪੰਜ ਦਿਨਾਂ ਤੋਂ ਹੜ੍ਹਾਂ ਤੋਂ ਬਾਅਦ ਕੱਟੇ ਗਏ ਇਲਾਕਿਆਂ (North Sikkim) ਨੂੰ ਜੋੜਨ ‘ਚ ਲੱਗੀ ਹੋਈ ਹੈ। ਫੌਜ ਪਹੁੰਚ, ਸੰਚਾਰ ਅਤੇ ਕਨੈਕਟੀਵਿਟੀ ਦੀ ਤੁਰੰਤ ਬਹਾਲੀ, ਨੁਕਸਾਨ ਦਾ ਮੁਲਾਂਕਣ ਅਤੇ ਕੱਟੇ ਹੋਏ ਖੇਤਰਾਂ ਅਤੇ ਉਨ੍ਹਾਂ ਖੇਤਰਾਂ ਵਿੱਚ ਲੰਬੇ ਸਮੇਂ ਦੇ ਪੁਨਰ ਨਿਰਮਾਣ ਦੀ ਯੋਜਨਾ ਬਣਾ ਰਹੀ ਹੈ । ਉੱਤਰੀ ਸਿੱਕਮ ਦੇ ਚਾਟੇਨ, ਲਾਚੇਨ, ਲਾਚੁੰਗ ਅਤੇ ਥੰਗੂ ਖੇਤਰਾਂ ਵਿੱਚ ਸਾਰੇ ਸੈਲਾਨੀਆਂ ਅਤੇ ਸਥਾਨਕ ਲੋਕਾਂ ਦੀ ਸਥਿਤੀ ਦਾ ਜਾਇਜ਼ਾ ਲਿਆ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ 63 ਵਿਦੇਸ਼ੀ ਨਾਗਰਿਕਾਂ ਸਮੇਤ 2000 ਸੈਲਾਨੀਆਂ ਦੀ ਸੂਚੀ ਤਿਆਰ ਕੀਤੀ ਗਈ ਹੈ ਅਤੇ ਉਨ੍ਹਾਂ ਨੂੰ ਭੋਜਨ, ਡਾਕਟਰੀ ਸਹਾਇਤਾ, ਰਿਹਾਇਸ਼ ਅਤੇ ਟੈਲੀਫੋਨ ਕੁਨੈਕਟੀਵਿਟੀ ਸਬੰਧੀ ਸਹਾਇਤਾ ਪ੍ਰਦਾਨ ਕੀਤੀ ਜਾ ਰਹੀ ਹੈ। ਇੱਕ ਹੈਲਪਲਾਈਨ ਸਥਾਪਿਤ ਕੀਤਾ ਗਿਆ ਹੈ ਜਿਸ ਰਾਹੀਂ ਸਾਰੇ ਸੈਲਾਨੀਆਂ ਦੇ ਰਿਸ਼ਤੇਦਾਰਾਂ ਨੂੰ ਸੈਲਾਨੀਆਂ ਬਾਰੇ ਜਾਣਕਾਰੀ ਦਿੱਤੀ ਜਾ ਰਹੀ ਹੈ। ਮੌਸਮ ਵਿੱਚ ਸੁਧਾਰ ਹੋਣ ਨਾਲ ਅੱਜ 23 ਸੈਲਾਨੀਆਂ ਨੂੰ ਬਾਹਰ ਕੱਢਿਆ ਗਿਆ।
ਭਾਰਤੀ ਫੌਜ ਨੇ ਕੱਟੇ ਗਏ ਪਿੰਡਾਂ ਨੂੰ ਦੁਬਾਰਾ ਜੋੜਨ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਫੌਜ ਦੇ ਜਵਾਨਾਂ ਨੇ ਆਈਟੀਬੀਪੀ ਅਤੇ ਸਥਾਨਕ ਲੋਕਾਂ ਨਾਲ ਮਿਲ ਕੇ ਚੁੰਗਥਾਂਗ ਨੂੰ ਪੈਂਗੌਂਗ ਨਾਲ ਜੋੜਨ ਵਾਲੇ ਲਾਚੇਨ ਚੂ ਉੱਤੇ ਇੱਕ ਪੁਲ ਬਣਾਇਆ ਹੈ। ਆਰਮੀ ਕੋਰ ਦੇ ਸਿਗਨਲਰ 24 ਘੰਟੇ ਕੰਮ ਕਰਕੇ ਉੱਤਰੀ ਸਿੱਕਮ ਵਿੱਚ ਸੰਚਾਰ ਸੰਪਰਕ ਬਹਾਲ ਕਰਨ ਲਈ ਆਪਣੀਆਂ ਕੋਸ਼ਿਸ਼ਾਂ ਜਾਰੀ ਰੱਖ ਰਹੇ ਹਨ।
