ਸਪੋਰਟਸ, 25 ਜੁਲਾਈ 2025: IND ਬਨਾਮ PAK: ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਕ੍ਰਿਕਟ ਮੈਚ ਦੁਬਾਰਾ ਦੇਖਣ ਨੂੰ ਮਿਲ ਸਕਦਾ ਹੈ | ਇਹ ਮੈਚ ਏਸ਼ੀਆ ਕੱਪ 2025 ‘ਚ ਖੇਡੇ ਜਾਣਗੇ। ਏਸ਼ੀਅਨ ਕ੍ਰਿਕਟ ਕੌਂਸਲ (ACC) ਨੇ ਏਸ਼ੀਆ ਕੱਪ 2025 ਦੀ ਮੇਜ਼ਬਾਨੀ ਭਾਰਤ ਨੂੰ ਸੌਂਪ ਦਿੱਤੀ ਹੈ। ਇਹ ਟੂਰਨਾਮੈਂਟ ਸਤੰਬਰ ‘ਚ ਯੂਏਈ ‘ਚ ਖੇਡਿਆ ਜਾਵੇਗਾ।
ਇਹ ਫੈਸਲਾ ਵੀਰਵਾਰ ਨੂੰ ਢਾਕਾ ‘ਚ ਹੋਈ ਏਸੀਸੀ ਦੀ ਬੈਠਕ ‘ਚ ਲਿਆ ਗਿਆ, ਜਿਸ ‘ਚ ਸਾਰੇ 25 ਮੈਂਬਰ ਦੇਸ਼ਾਂ ਨੇ ਹਿੱਸਾ ਲਿਆ। ਬੀਸੀਸੀਆਈ ਵੱਲੋਂ ਉਪ ਪ੍ਰਧਾਨ ਰਾਜੀਵ ਸ਼ੁਕਲਾ ਵਰਚੁਅਲੀ ਸ਼ਾਮਲ ਹੋਏ। ਬੀਸੀਸੀਆਈ ਦੇ ਇੱਕ ਅਧਿਕਾਰੀ ਨੇ ਕਿਹਾ ਕਿ ਭਾਰਤ ਆਪਣੇ ਸਾਰੇ ਮੈਚ ਦੁਬਈ ‘ਚ ਖੇਡੇਗਾ। ਭਾਰਤ ਅਤੇ ਪਾਕਿਸਤਾਨ ਨੇ ਆਪਸੀ ਸਹਿਮਤੀ ਨਾਲ 2027 ਤੱਕ ਸਾਰੇ ਅੰਤਰਰਾਸ਼ਟਰੀ ਟੂਰਨਾਮੈਂਟਾਂ ‘ਚ ਨਿਰਪੱਖ ਸਥਾਨਾਂ ‘ਤੇ ਖੇਡਣ ਦਾ ਫੈਸਲਾ ਕੀਤਾ ਹੈ।
ਜਿਕਰਯੋਗ ਹੈ ਕਿ ਭਾਰਤ-ਪਾਕਿਸਤਾਨ (IND ਬਨਾਮ PAK) ਨੂੰ ਇੱਕੋ ਸਮੂਹ ‘ਚ ਰੱਖਿਆ ਜਾ ਸਕਦਾ ਹੈ। ਇਸ ਨਾਲ ਦੋਵਾਂ ਟੀਮਾਂ ਵਿਚਾਲੇ 3 ਮੈਚ ਖੇਡੇ ਜਾ ਸਕਦੇ ਹਨ। ਪਹਿਲਾਂ ਲੀਗ ਪੜਾਅ ‘ਚ, ਫਿਰ ਘੱਟੋ-ਘੱਟ ਇੱਕ ਮੈਚ ਸੁਪਰ ਸਿਕਸ ‘ਚ ਵੀ ਹੋ ਸਕਦਾ ਹੈ। ਜੇਕਰ ਦੋਵੇਂ ਟੀਮਾਂ ਫਾਈਨਲ ‘ਚ ਪਹੁੰਚਦੀਆਂ ਹਨ, ਤਾਂ ਤੀਜਾ ਮੈਚ ਵੀ ਸੰਭਵ ਹੈ।
ਜਿਕਰਯੋਗ ਹੈ ਕਿ ਏਸ਼ੀਆ ਕੱਪ 1984 ‘ਚ ਸ਼ੁਰੂ ਹੋਇਆ ਸੀ ਅਤੇ ਹੁਣ ਤੱਕ 16 ਵਾਰ ਕਰਵਾਇਆ ਜਾ ਚੁੱਕਾ ਹੈ। ਭਾਰਤ ਨੇ ਇਹ ਖ਼ਿਤਾਬ ਸਭ ਤੋਂ ਵੱਧ ਵਾਰ, 8 ਵਾਰ ਜਿੱਤਿਆ ਹੈ, ਜਦੋਂ ਕਿ ਸ਼੍ਰੀਲੰਕਾ ਨੇ ਇਹ ਟਰਾਫੀ 6 ਵਾਰ ਅਤੇ ਪਾਕਿਸਤਾਨ ਨੇ 2 ਵਾਰ ਜਿੱਤੀ ਹੈ।
ਭਾਰਤੀ ਟੀਮ ਇਸ ਸਾਲ ਫਰਵਰੀ ‘ਚ ਹੋਈ ਚੈਂਪੀਅਨਜ਼ ਟਰਾਫੀ ਲਈ ਪਾਕਿਸਤਾਨ ਨਹੀਂ ਗਈ ਸੀ। ਭਾਰਤ ਦੇ ਸਾਰੇ ਮੈਚ ਯੂਏਈ ‘ਚ ਹੋਏ ਸਨ, ਇੰਨਾ ਹੀ ਨਹੀਂ, ਇੱਕ ਸੈਮੀਫਾਈਨਲ ਅਤੇ ਫਾਈਨਲ ਵੀ ਯੂਏਈ ‘ਚ ਹੋਇਆ ਸੀ। ਭਾਰਤ ਨੇ ਫਾਈਨਲ ‘ਚ ਨਿਊਜ਼ੀਲੈਂਡ ਨੂੰ ਹਰਾ ਕੇ ਖਿਤਾਬ ਜਿੱਤਿਆ ਸੀ।
Read More: IND vs PAK: ਭਾਰਤੀ ਟੀਮ ਦੀ ਚੈਂਪੀਅਨਜ਼ ਟਰਾਫੀ ਸ਼ੁਰੂਆਤ ਜਿੱਤ ਨਾਲ ਹੋਈ, ਬੰਗਲਾਦੇਸ਼ ਨੂੰ 6 ਵਿਕਟਾਂ ਨਾਲ ਹਰਾਇਆ
