ਅਮਰੀਕਾ, 15 ਮਈ 2025: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ (Donald Trump) ਨੇ ਐਪਲ ਦੇ ਸੀਈਓ ਟਿਮ ਕੁੱਕ ਨੂੰ ਕਿਹਾ ਹੈ ਕਿ ਭਾਰਤ ‘ਚ ਫੈਕਟਰੀਆਂ ਲਗਾਉਣ ਦੀ ਕੋਈ ਲੋੜ ਨਹੀਂ ਹੈ। ਮੈਂ ਨਹੀਂ ਚਾਹੁੰਦਾ ਕਿ ਐਪਲ ਦੇ ਉਤਪਾਦ ਭਾਰਤ ‘ਚ ਬਣਾਏ ਜਾਣ। ਭਾਰਤ ਆਪਣਾ ਧਿਆਨ ਰੱਖ ਸਕਦਾ ਹੈ।
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਐਪਲ ਦੇ ਸੀਈਓ ਟਿਮ ਕੁੱਕ ਨਾਲ ਗੱਲ ਕੀਤੀ ਹੈ ਅਤੇ ਉਨ੍ਹਾਂ ਨੂੰ ਭਾਰਤ ‘ਚ ਐਪਲ ਦੇ ਉਤਪਾਦਨ ਦਾ ਵਿਸਥਾਰ ਨਾ ਕਰਨ ਲਈ ਕਿਹਾ ਹੈ। ਬਲੂਮਬਰਗ ਦੀ ਰਿਪੋਰਟ ‘ਚ ਇਹ ਦਾਅਵਾ ਕੀਤਾ ਗਿਆ ਹੈ। ਰਿਪੋਰਟ ਦੇ ਮੁਤਾਬਕ ਟਰੰਪ ਨੇ ਦੋਹਾ ‘ਚ ਇੱਕ ਸਮਾਗਮ ‘ਚ ਟਿਮ ਕੁੱਕ ਨੂੰ ਕਿਹਾ ਕਿ ਸਾਨੂੰ ਭਾਰਤ ‘ਚ ਨਿਰਮਾਣ ‘ਚ ਦਿਲਚਸਪੀ ਨਹੀਂ ਹੈ। ਉਹ ਆਪਣਾ ਧਿਆਨ ਰੱਖ ਸਕਦੇ ਹਨ। ਉਹ ਬਹੁਤ ਵਧੀਆ ਕਰ ਰਹੇ ਹਨ।
ਡੋਨਾਲਡ ਟਰੰਪ (Donald Trump) ਨੇ ਵੀਰਵਾਰ ਨੂੰ ਕਤਰ ਦੀ ਰਾਜਧਾਨੀ ਦੋਹਾ ‘ਚ ਕਾਰੋਬਾਰੀ ਆਗੂਆਂ ਨਾਲ ਇੱਕ ਸਮਾਗਮ ‘ਚ ਐਪਲ ਦੇ ਸੀਈਓ ਨਾਲ ਆਪਣੀ ਗੱਲਬਾਤ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਐਪਲ ਨੂੰ ਹੁਣ ਅਮਰੀਕਾ ‘ਚ ਉਤਪਾਦਨ ਵਧਾਉਣਾ ਪਵੇਗਾ। ਇਸ ਦੇ ਨਾਲ ਹੀ ਟਰੰਪ ਨੇ ਕਿਹਾ ਕਿ ਭਾਰਤ ਨੇ ਸਾਨੂੰ ਵਪਾਰ ‘ਚ ਜ਼ੀਰੋ ਟੈਰਿਫ ਸੌਦੇ ਦੀ ਪੇਸ਼ਕਸ਼ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਵਪਾਰ ‘ਚ ਸਾਡੇ ਤੋਂ ਕੋਈ ਫੀਸ ਲੈਣ ਲਈ ਤਿਆਰ ਨਹੀਂ ਹੈ।
ਜਿਕਰਯੋਗ ਹੈ ਕਿ ਐਪਲ ਦੇ ਸੀਈਓ ਟਿਮ ਕੁੱਕ ਨੇ ਹਾਲ ਹੀ ‘ਚ ਇੱਕ ਇੰਟਰਵਿਊ ‘ਚ ਕਿਹਾ ਹੈ ਕਿ ਅਮਰੀਕੀ ਬਾਜ਼ਾਰ ‘ਚ ਵਿਕਣ ਵਾਲੇ 50% ਆਈਫੋਨ ਭਾਰਤ ‘ਚ ਬਣਾਏ ਜਾ ਰਹੇ ਹਨ। ਕੁੱਕ ਨੇ ਕਿਹਾ ਕਿ ਅਪ੍ਰੈਲ-ਜੂਨ ਤਿਮਾਹੀ ‘ਚ ਭਾਰਤ ਅਮਰੀਕਾ ‘ਚ ਵੇਚੇ ਜਾਣ ਵਾਲੇ ਆਈਫੋਨ ਦਾ ਮੂਲ ਦੇਸ਼ ਬਣ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਏਅਰਪੌਡਸ, ਐਪਲ ਵਾਚ ਵਰਗੇ ਹੋਰ ਉਤਪਾਦ ਵੀ ਜ਼ਿਆਦਾਤਰ ਵੀਅਤਨਾਮ ‘ਚ ਬਣਾਏ ਜਾ ਰਹੇ ਹਨ।
ਚੀਨ ਦੇ ਮੁਕਾਬਲੇ ਘੱਟ ਟੈਰਿਫ ਹੋਣ ਕਾਰਨ ਕੰਪਨੀ ਭਾਰਤ ਅਤੇ ਵੀਅਤਨਾਮ ਨੂੰ ਤਰਜੀਹ ਦੇ ਰਹੀ ਹੈ। ਚੀਨ ‘ਚ ਉੱਚ ਟੈਰਿਫਾਂ ਦੇ ਮੁਕਾਬਲੇ ਭਾਰਤ ਅਤੇ ਵੀਅਤਨਾਮ ਤੋਂ ਆਯਾਤ ‘ਤੇ ਸਿਰਫ 10% ਟੈਕਸ ਹੈ।
Read More: ਅਮਰੀਕੀ ਤੇ ਸਾਊਦੀ ਅਰਬ ਵਿਚਾਲੇ 142 ਬਿਲੀਅਨ ਡਾਲਰ ਦਾ ਰੱਖਿਆ ਸੌਦਾ, ਸੀਰੀਆ ਤੋਂ ਹਟੇਗੀ ਪਾਬੰਦੀ !
