ਚੰਡੀਗੜ੍ਹ, 20 ਮਾਰਚ 2023: (GG vs UP) ਮਹਿਲਾ ਪ੍ਰੀਮੀਅਰ ਲੀਗ ਦੇ 17ਵੇਂ ਮੈਚ ਵਿੱਚ ਅੱਜ ਗੁਜਰਾਤ ਜਾਇੰਟਸ (Gujarat Giants) ਦਾ ਸਾਹਮਣਾ ਯੂਪੀ ਵਾਰੀਅਰਜ਼ (UP Warriors) ਨਾਲ ਹੋਵੇਗਾ। ਇਹ ਮੈਚ ਦੋਵਾਂ ਟੀਮਾਂ ਲਈ ਕਰੋ ਜਾਂ ਮਰੋ ਦਾ ਹੈ। ਹਾਰਨ ਵਾਲੀ ਟੀਮ ਨੂੰ ਟੂਰਨਾਮੈਂਟ ਤੋਂ ਬਾਹਰ ਹੋਣ ਦਾ ਖ਼ਤਰਾ ਹੋਵੇਗਾ। ਇਸ ਦੇ ਨਾਲ ਹੀ ਇਹ ਜਿੱਤ ਉਸ ਟੀਮ ਨੂੰ ਪਲੇਆਫ ਦੇ ਨੇੜੇ ਲੈ ਜਾਵੇਗੀ। ਮੁੰਬਈ ਇੰਡੀਅਨਜ਼ ਅਤੇ ਦਿੱਲੀ ਕੈਪੀਟਲਸ ਦੀਆਂ ਟੀਮਾਂ ਪਹਿਲਾਂ ਹੀ ਪਲੇਆਫ ਲਈ ਕੁਆਲੀਫਾਈ ਕਰ ਚੁੱਕੀਆਂ ਹਨ। ਤਿੰਨ ਟੀਮਾਂ ਸਿਰਫ਼ ਇੱਕ ਥਾਂ ਲਈ ਲੜ ਰਹੀਆਂ ਹਨ।
ਯੂਪੀ ਵਾਰੀਅਰਜ਼ ਦੇ ਛੇ ਮੈਚਾਂ ਵਿੱਚ ਤਿੰਨ ਜਿੱਤਾਂ ਅਤੇ ਤਿੰਨ ਹਾਰਾਂ ਨਾਲ ਛੇ ਅੰਕ ਹਨ। ਟੀਮ ਅੰਕ ਸੂਚੀ ‘ਚ ਤੀਜੇ ਸਥਾਨ ‘ਤੇ ਹੈ। ਯੂਪੀ ਦੀ ਟੀਮ ਇੱਕ ਮੈਚ ਜਿੱਤਦੇ ਹੀ ਪਲੇਆਫ ਵਿੱਚ ਪਹੁੰਚ ਜਾਵੇਗੀ ਅਤੇ ਰਾਇਲ ਚੈਲੰਜਰ ਬੈਂਗਲੁਰੂ ਅਤੇ ਗੁਜਰਾਤ ਦੀਆਂ ਟੀਮਾਂ ਬਾਹਰ ਹੋ ਜਾਣਗੀਆਂ। ਜੇਕਰ ਗੁਜਰਾਤ ਦੀ ਟੀਮ ਜਿੱਤ ਜਾਂਦੀ ਹੈ ਤਾਂ ਉਹ ਯੂਪੀ ਨਾਲ ਅੰਕਾਂ ‘ਤੇ ਬਰਾਬਰ ਹੋ ਜਾਵੇਗੀ। ਗੁਜਰਾਤ (Gujarat Giants) ਅਤੇ ਬੰਗਲੌਰ ਦੋਵਾਂ ਨੇ ਸੱਤ-ਸੱਤ ਮੈਚ ਖੇਡੇ ਹਨ ਅਤੇ ਉਨ੍ਹਾਂ ਕੋਲ ਸਿਰਫ਼ ਇੱਕ ਮੈਚ ਖੇਡਣਾ ਹੈ। ਇਸ ਦੇ ਨਾਲ ਹੀ ਯੂਪੀ ਨੂੰ ਦੋ ਮੈਚ ਖੇਡਣੇ ਹਨ।
