ਸਪੋਰਟਸ, 17 ਜੂਨ 2025: Netherlands vs Nepal: ਟੀ-20 ਟ੍ਰਾਈ ਸੀਰੀਜ਼ ‘ਚ ਨੀਦਰਲੈਂਡ ਅਤੇ ਨੇਪਾਲ ਵਿਚਕਾਰ ਖੇਡੇ ਗਏ ਮੈਚ ‘ਚ ਜਿੱਤ ਜਾਂ ਹਾਰ ਦਾ ਫੈਸਲਾ 3 ਸੁਪਰ ਓਵਰਾਂ (Super Overs) ਤੋਂ ਬਾਅਦ ਕੀਤਾ ਗਿਆ। ਨੀਦਰਲੈਂਡ ਨੇ ਆਖਰਕਾਰ ਇਹ ਮੈਚ ਜਿੱਤ ਲਿਆ। ਟੀ-20 ਇੰਟਰਨੈਸ਼ਨਲ ‘ਚ ਇਹ ਪਹਿਲੀ ਵਾਰ ਹੋਇਆ ਹੈ। ਇਹ 41ਵਾਂ ਟੀ-20 ਇੰਟਰਨੈਸ਼ਨਲ ਮੈਚ ਸੀ, ਜਿਸ ‘ਚ ਜਿੱਤ ਜਾਂ ਹਾਰ ਦਾ ਫੈਸਲਾ ਸੁਪਰ ਓਵਰ ਦੁਆਰਾ ਕੀਤਾ ਗਿਆ ਸੀ।
ਦਰਅਸਲ, ਨੀਦਰਲੈਂਡ, ਨੇਪਾਲ ਅਤੇ ਸਕਾਟਲੈਂਡ ਵਿਚਕਾਰ ਤਿਕੋਣੀ ਲੜੀ ਸਕਾਟਲੈਂਡ ‘ਚ ਖੇਡੀ ਜਾ ਰਹੀ ਹੈ। ਸੋਮਵਾਰ ਨੂੰ ਟੂਰਨਾਮੈਂਟ ਦਾ ਦੂਜਾ ਮੈਚ ਨੀਦਰਲੈਂਡ ਅਤੇ ਨੇਪਾਲ ਵਿਚਕਾਰ ਖੇਡਿਆ ਗਿਆ।
ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਨੀਦਰਲੈਂਡ ਨੇ 20 ਓਵਰਾਂ ‘ਚ 7 ਵਿਕਟਾਂ ਦੇ ਨੁਕਸਾਨ ‘ਤੇ 152 ਦੌੜਾਂ ਬਣਾਈਆਂ। 153 ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਨੇਪਾਲ ਨੇ 20 ਓਵਰਾਂ ‘ਚ 8 ਵਿਕਟਾਂ ਦੇ ਨੁਕਸਾਨ ‘ਤੇ 152 ਦੌੜਾਂ ਬਣਾਈਆਂ, ਸਕੋਰ ਦੀ ਬਰਾਬਰੀ ਕੀਤੀ ਅਤੇ ਮੈਚ ਟਾਈ ਹੋ ਗਿਆ |
ਪਹਿਲਾ ਸੁਪਰ ਓਵਰ
ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਨੇਪਾਲ ਨੇ 19/1 ਦਾ ਸਕੋਰ ਬਣਾਇਆ। ਜਵਾਬ ‘ਚ ਨੀਦਰਲੈਂਡ ਦੇ ਮੈਕਸ ਓ’ਡੋਡ ਅਤੇ ਮਾਈਕਲ ਲੇਵਿਟ ਨੇ ਕਰਨ ਕੇਸੀ ਦੇ ਖਿਲਾਫ਼ 19 ਦੌੜਾਂ ਬਣਾਈਆਂ ਅਤੇ ਸੁਪਰ ਓਵਰ ਵੀ ਬਰਾਬਰ ਰਿਹਾ।
ਦੂਜਾ ਸੁਪਰ ਓਵਰ
ਨੀਦਰਲੈਂਡ ਨੇ ਪਹਿਲਾਂ ਬੱਲੇਬਾਜ਼ੀ ਕੀਤੀ ਅਤੇ ਇੱਕ ਵਿਕਟ ਦੇ ਨੁਕਸਾਨ ‘ਤੇ 17 ਦੌੜਾਂ ਬਣਾਈਆਂ। ਨੇਪਾਲ ਲਈ ਲਲਿਤ ਰਾਜਵੰਸ਼ੀ ਨੇ ਓਵਰ ਸੁੱਟਿਆ। ਨੇਪਾਲ ਦੇ ਬੱਲੇਬਾਜ਼ ਦੀਪੇਂਦਰ ਸਿੰਘ ਆਇਰੀ ਅਤੇ ਰੋਹਿਤ ਪੌਡੇਲ ਨੇ 17 ਦੌੜਾਂ ਬਣਾਈਆਂ ਅਤੇ ਮੈਚ ਇੱਕ ਹੋਰ ਸੁਪਰ ਓਵਰ ਵੱਲ ਵਧਿਆ।
ਤੀਜਾ ਸੁਪਰ ਓਵਰ
ਤੀਜੇ ਸੁਪਰ ਓਵਰ (Super Overs) ‘ਚ ਨੀਦਰਲੈਂਡ ਦੇ ਕਪਤਾਨ ਨੇ ਗੇਂਦ ਆਫ ਸਪਿਨਰ ਜੈਕ ਲਾਇਨ ਕੈਚੇਟ ਨੂੰ ਸੌਂਪ ਦਿੱਤੀ। 21 ਸਾਲਾ ਕੈਚੇਟ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਨੇਪਾਲ ਨੂੰ ਚਾਰ ਗੇਂਦਾਂ ‘ਚ ਇੱਕ ਵੀ ਦੌੜ ਨਹੀਂ ਬਣਨ ਦਿੱਤੀ ਅਤੇ ਰੋਹਿਤ ਪੌਡੇਲ ਅਤੇ ਰੂਪੇਸ਼ ਸਿੰਘ ਬਿਨਾਂ ਦੌੜ ਬਣਾਏ ਵਾਪਸ ਪਰਤੇ। ਅੰਤ ‘ਚ ਮਾਈਕਲ ਲੇਵਿਟ ਨੇ ਸੰਦੀਪ ਲਾਮਿਛਾਨੇ ਦੀ ਪਹਿਲੀ ਗੇਂਦ ‘ਤੇ ਛੱਕਾ ਲਗਾ ਕੇ ਨੀਦਰਲੈਂਡ ਨੂੰ ਜਿੱਤ ਦਿਵਾਈ।
Read More: Women ODI WC 2025 Schedule: ਮਹਿਲਾ ਵਿਸ਼ਵ ਕੱਪ 2025 ਦਾ ਪੂਰਾ ਸ਼ਡਿਊਲ
