ਵਿਦੇਸ਼, 02 ਅਕਤੂਬਰ 2025: ਟੇਸਲਾ ਦੇ ਸੀ.ਈ.ਓ. ਐਲਨ ਮਸਕ ਬੁੱਧਵਾਰ ਨੂੰ ਦੁਨੀਆ ਦੇ ਪਹਿਲੇ ਵਿਅਕਤੀ ਬਣ ਗਏ, ਜਿਨ੍ਹਾਂ ਦੀ ਕੁੱਲ ਜਾਇਦਾਦ 500 ਅਰਬ ਡਾਲਰ ਤੱਕ ਪਹੁੰਚ ਗਈ ਹੈ। ਉਨ੍ਹਾਂ ਨੇ ਇਹ ਉਪਲਬੱਧੀ ਟੇਸਲਾ ਦੇ ਸ਼ੇਅਰਾਂ ‘ਚ ਵਾਧੇ ਅਤੇ ਉਨ੍ਹਾਂ ਦੀਆਂ ਹੋਰ ਤਕਨੀਕੀ ਕੰਪਨੀਆਂ ਦੇ ਤੇਜ਼ੀ ਨਾਲ ਵਧ ਰਹੇ ਮੁੱਲਾਂਕਣ ਕਾਰਨ ਪ੍ਰਾਪਤ ਕੀਤੀ। ਫੋਰਬਸ ਅਰਬਪਤੀਆਂ ਦੀ ਸੂਚੀ ਦੇ ਮੁਤਾਬਕ ਬੁੱਧਵਾਰ ਸ਼ਾਮ 4:15 ਵਜੇ (IST) ਤੱਕ ਮਸਕ ਦੀ ਕੁੱਲ ਜਾਇਦਾਦ $500.1 ਅਰਬ ਡਾਲਰ ਸੀ।
ਮਸਕ ਦੀ ਦੌਲਤ ਦਾ ਇੱਕ ਮਹੱਤਵਪੂਰਨ ਹਿੱਸਾ ਟੇਸਲਾ ਨਾਲ ਜੁੜਿਆ ਹੋਇਆ ਹੈ। 15 ਸਤੰਬਰ ਤੱਕ, ਮਸਕ ਕੋਲ ਟੇਸਲਾ ਦੇ 12.4% ਤੋਂ ਵੱਧ ਸ਼ੇਅਰ ਸਨ। ਟੇਸਲਾ ਦੇ ਸ਼ੇਅਰ ਇਸ ਸਾਲ ਹੁਣ ਤੱਕ 14% ਤੋਂ ਵੱਧ ਵਧੇ ਹਨ ਅਤੇ ਬੁੱਧਵਾਰ ਨੂੰ ਹੋਰ 3.3% ਵਧੇ ਹਨ, ਜਿਸ ਨਾਲ ਮਸਕ ਦੀ ਦੌਲਤ ਇੱਕ ਦਿਨ ‘ਚ 6 ਅਰਬ ਡਾਲਰ ਤੋਂ ਵੱਧ ਵਧ ਗਈ ਹੈ। ਸਾਲ ਦੀ ਸ਼ੁਰੂਆਤ ‘ਚ ਟੇਸਲਾ ਦੇ ਸ਼ੇਅਰ ਡਿੱਗ ਗਏ ਸਨ, ਪਰ ਹੁਣ ਮੁੜ ਉਭਰ ਆਏ ਹਨ। ਨਿਵੇਸ਼ਕਾਂ ਦਾ ਵਿਸ਼ਵਾਸ ਹੋਰ ਵਧਿਆ ਹੈ ਕਿਉਂਕਿ ਮਸਕ ਨੇ ਆਪਣੇ ਕਾਰੋਬਾਰ ‘ਤੇ ਦੁਬਾਰਾ ਧਿਆਨ ਕੇਂਦਰਿਤ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
ਟੇਸਲਾ ਦੇ ਬੋਰਡ ਆਫ਼ ਡਾਇਰੈਕਟਰਜ਼ ਦੀ ਚੇਅਰਵੁਮੈਨ ਰੌਬਿਨ ਡੇਨਹੋਮ ਨੇ ਪਿਛਲੇ ਮਹੀਨੇ ਕਿਹਾ ਸੀ ਕਿ ਮਸਕ ਹੁਣ ਕੰਪਨੀ ‘ਚ ਪੂਰੀ ਤਰ੍ਹਾਂ ਸਰਗਰਮ ਹੈ। ਇਸ ਤੋਂ ਪਹਿਲਾਂ, ਉਹ ਕੁਝ ਮਹੀਨਿਆਂ ਤੋਂ ਵ੍ਹਾਈਟ ਹਾਊਸ ਨਾਲ ਸਬੰਧਤ ਕੰਮ ‘ਚ ਰੁੱਝਿਆ ਹੋਇਆ ਸੀ। ਕੁਝ ਦਿਨਾਂ ਬਾਅਦ, ਮਸਕ ਨੇ ਟੇਸਲਾ ਦੇ ਲਗਭਗ $1 ਅਰਬ ਡਾਲਰ ਦੇ ਸ਼ੇਅਰ ਖਰੀਦਣ ਦਾ ਐਲਾਨ ਕੀਤਾ, ਜੋ ਕਿ ਟੇਸਲਾ ਦੇ ਭਵਿੱਖ ‘ਚ ਉਸਦੇ ਮਜ਼ਬੂਤ ਵਿਸ਼ਵਾਸ ਨੂੰ ਦਰਸਾਉਂਦਾ ਹੈ। ਕੰਪਨੀ ਹੁਣ ਇੱਕ ਰਵਾਇਤੀ ਕਾਰ ਨਿਰਮਾਤਾ ਹੋਣ ਤੋਂ ਪਰੇ ਜਾਣ ਅਤੇ ਏਆਈ ਅਤੇ ਰੋਬੋਟਿਕਸ ਦੀ ਦੁਨੀਆ ਵਿੱਚ ਇੱਕ ਵੱਡੀ ਸ਼ਕਤੀ ਬਣਨ ਲਈ ਕੰਮ ਕਰ ਰਹੀ ਹੈ।
ਹਾਲਾਂਕਿ, ਟੇਸਲਾ ਦੇ ਸ਼ੇਅਰਾਂ ਨੂੰ ਕਾਰਾਂ ਦੀ ਵਿਕਰੀ ‘ਚ ਗਿਰਾਵਟ ਅਤੇ ਮੁਨਾਫ਼ੇ ‘ਤੇ ਲਗਾਤਾਰ ਦਬਾਅ ਕਾਰਨ ਨੁਕਸਾਨ ਹੋਇਆ ਹੈ। ਨਤੀਜੇ ਵਜੋਂ, ਇਸਦੇ ਸ਼ੇਅਰ “ਮੈਗਨੀਫਿਸੈਂਟ ਸੇਵਨ” ਵਜੋਂ ਜਾਣੀਆਂ ਜਾਂਦੀਆਂ ਵੱਡੀਆਂ ਤਕਨੀਕੀ ਕੰਪਨੀਆਂ ਦੇ ਸਮੂਹ ਵਿੱਚ ਸਭ ਤੋਂ ਕਮਜ਼ੋਰ ਪ੍ਰਦਰਸ਼ਨ ਕਰਨ ਵਾਲੇ ਸਟਾਕਾਂ ‘ਚੋਂ ਇੱਕ ਰਹੇ ਹਨ।
Read More: ਐਲਨ ਮਸਕ ਨੇ ਅਮਰੀਕਾ ‘ਚ ਆਪਣੀ ਨਵੀਂ ਪਾਰਟੀ ਦੀ ਸ਼ੁਰੂਆਤ ਦਾ ਕਰਤਾ ਐਲਾਨ
