ਕੇਰਲ, 10 ਜੂਨ 2025: Singapore-flagged ship: ਕੇਰਲ ਤੱਟ ਦੇ ਨੇੜੇ ਸੜ ਰਹੇ ਸਿੰਗਾਪੁਰ ਦੇ ਝੰਡੇ ਵਾਲੇ ਜਹਾਜ਼ ‘ਚ ਲੱਗੀ ਅੱਗ ਨੂੰ ਬੁਝਾਉਣ ਦੀਆਂ ਕੋਸ਼ਿਸ਼ਾਂ ਅੱਜ ਵੀ ਜਾਰੀ ਹਨ। ਭਾਰਤੀ ਜਲ ਫੌਜ ਦੇ ਜਹਾਜ਼ ਆਈਐਨਐਸ ਸੂਰਤ ਨੇ 18 ਚਾਲਕ ਦਲ ਦੇ ਮੈਂਬਰਾਂ ਨੂੰ ਸੁਰੱਖਿਅਤ ਬਚਾ ਲਿਆ ਹੈ। ਚਾਲਕ ਦਲ ਦੇ ਚਾਰ ਮੈਂਬਰ ਅਜੇ ਵੀ ਲਾਪਤਾ ਹਨ। ਐਤਵਾਰ ਨੂੰ ਜਹਾਜ਼ ਨੂੰ ਅੱਗ ਲੱਗ ਗਈ ਸੀ ਅਤੇ ਮੰਗਲਵਾਰ ਨੂੰ ਵੀ ਜਲ ਫੌਜ ਅਤੇ ਤੱਟ ਰੱਖਿਅਕਾਂ ਦੁਆਰਾ ਇੱਕ ਸੰਯੁਕਤ ਅਤੇ ਤਾਲਮੇਲ ਵਾਲਾ ਬਚਾਅ ਕਾਰਜ ਚਲਾਇਆ ਜਾ ਰਿਹਾ ਹੈ।
ਭਾਰਤੀ ਤੱਟ ਰੱਖਿਅਕ ਜਹਾਜ਼ ਸਚੇਤ ਅਤੇ ਸਮੁੰਦਰ ਪ੍ਰਹਾਰੀ ਅੱਗ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਤੱਟ ਰੱਖਿਅਕ ਦਾ ਡੋਰਨੀਅਰ ਜਹਾਜ਼ ਬਚਾਅ ਕਾਰਜ ਦਾ ਹਵਾਈ ਸਰਵੇਖਣ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ, ਮੰਗਲਵਾਰ ਨੂੰ, ਤੱਟ ਰੱਖਿਅਕ ਜਹਾਜ਼ ਸਮਰਥ ਵੀ ਬਚਾਅ ਕਾਰਜ ਵਿੱਚ ਸ਼ਾਮਲ ਹੋਇਆ ਹੈ।
ਸੋਮਵਾਰ ਨੂੰ ਕੇਰਲ ਤੱਟ ਤੋਂ ਲਗਭਗ 100 ਨੋਟਿਕਲ ਮੀਲ ਦੂਰ ਸਿੰਗਾਪੁਰ ਦਾ ਇੱਕ ਕੰਟੇਨਰ ਜਹਾਜ਼ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਦਰਅਸਲ, ਕੋਲੰਬੋ ਤੋਂ ਮੁੰਬਈ ਜਾ ਰਹੇ ਸਿੰਗਾਪੁਰ ਦੇ ਝੰਡੇ ਵਾਲੇ ਜਹਾਜ਼ ਐਮਵੀ ਵਾਨ ਹੈ 503 ‘ਚ ਅਚਾਨਕ ਅੱਗ ਲੱਗ ਗਈ। ਅੱਗ ਕਾਰਨ ਜਹਾਜ਼ ‘ਚ ਇੱਕ ਵੱਡਾ ਧਮਾਕਾ ਹੋਇਆ।
ਜਹਾਜ਼ (Singapore-flagged ship) ‘ਤੇ ਲਗਭਗ 650 ਕੰਟੇਨਰ ਲੱਦੇ ਹੋਏ ਸਨ, ਜਿਨ੍ਹਾਂ ‘ਚੋਂ ਬਹੁਤ ਸਾਰੇ ਸਮੁੰਦਰ ‘ਚ ਡਿੱਗ ਗਏ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਅੱਗ ਇੰਨੀ ਤੇਜ਼ੀ ਨਾਲ ਫੈਲਣ ਦਾ ਕਾਰਨ ਜਹਾਜ਼ ਦੇ ਕੰਟੇਨਰਾਂ ‘ਚ ਕੋਈ ਖ਼ਤਰਨਾਕ ਜਲਣਸ਼ੀਲ ਰਸਾਇਣ ਹੋ ਸਕਦਾ ਹੈ। ਫਿਲਹਾਲ ਜਹਾਜ਼ ਮਾਲਕਾਂ ਤੋਂ ਕੰਟੇਨਰਾਂ ‘ਚ ਰੱਖੇ ਸਮਾਨ ਬਾਰੇ ਜਾਣਕਾਰੀ ਮੰਗੀ ਗਈ ਹੈ।
ਜਹਾਜ਼ ‘ਤੇ ਮੌਜੂਦ 18 ਚਾਲਕ ਦਲ ਦੇ ਮੈਂਬਰਾਂ ਨੂੰ ਜਲ ਫੌਜ ਦੇ ਜਹਾਜ਼ ਆਈਐਨਐਸ ਸੂਰਤ ਨੇ ਬਚਾਇਆ ਹੈ। ਕੁਝ ਚਾਲਕ ਦਲ ਦੇ ਮੈਂਬਰ ਜ਼ਖਮੀ ਹਨ ਅਤੇ ਉਨ੍ਹਾਂ ‘ਚੋਂ ਦੋ ਦੀ ਹਾਲਤ ਗੰਭੀਰ ਹੈ। ਚਾਰ ਹੋਰਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਚਾਲਕ ਦਲ ਦੇ ਮੈਂਬਰਾਂ ਨੂੰ ਮੰਗਲੁਰੂ ਬੰਦਰਗਾਹ ਲਿਆਂਦਾ ਗਿਆ ਹੈ। ਜ਼ਖਮੀਆਂ ਦਾ ਕੁੰਤੀਕਾਨਾ ਦੇ ਏਜੇ ਹਸਪਤਾਲ ‘ਚ ਇਲਾਜ ਚੱਲ ਰਿਹਾ ਹੈ।
Read More: Corona virus: ਸਿੰਗਾਪੁਰ ਅਤੇ ਹਾਂਗਕਾਂਗ ਤੋਂ ਬਾਅਦ ਭਾਰਤ ‘ਚ ਕਰੋਨਾ ਵਾਇਰਸ ਦੀ ਐਂਟਰੀ !
