ਦੇਸ਼, 02 ਜੁਲਾਈ 2025: National Herald case: ਨੈਸ਼ਨਲ ਹੈਰਾਲਡ ਮਾਮਲੇ ‘ਚ ਸੋਨੀਆ ਗਾਂਧੀ ਅਤੇ ਰਾਹੁਲ ਗਾਂਧੀ ਦੀਆਂ ਮੁਸ਼ਕਿਲਾਂ ਵਧਦੀਆਂ ਜਾ ਰਹੀਆਂ ਹਨ। ਦਰਅਸਲ, ਈਡੀ ਨੇ ਅਦਾਲਤ ‘ਚ ਦਾਅਵਾ ਕੀਤਾ ਹੈ ਕਿ ਐਸੋਸੀਏਟਿਡ ਜਰਨਲਜ਼ ਲਿਮਟਿਡ (AJL) ਦੀ ਪ੍ਰਾਪਤੀ ‘ਚ ਜਾਅਲੀ ਲੈਣ-ਦੇਣ ਕੀਤਾ ਗਿਆ ਸੀ।
ਈਡੀ ਵੱਲੋਂ ਸਹਾਇਕ ਸਾਲਿਸਟਰ ਜਨਰਲ ਐਸਵੀ ਰਾਜੂ ਅਦਾਲਤ ‘ਚ ਪੇਸ਼ ਹੋਏ। ਐਸਵੀ ਰਾਜੂ ਨੇ ਦੱਸਿਆ ਕਿ ਯੰਗ ਇੰਡੀਅਨ ਨਾਮ ਦੀ ਇੱਕ ਕੰਪਨੀ ਨੇ ਐਸੋਸੀਏਟਿਡ ਜਰਨਲਜ਼ ਲਿਮਟਿਡ ਨੂੰ ਹਾਸਲ ਕੀਤਾ ਹੈ। ਏਜੇਐਲ ਦੀਆਂ ਜਾਇਦਾਦਾਂ 2000 ਕਰੋੜ ਰੁਪਏ ਦੀਆਂ ਹਨ। ਯੰਗ ਇੰਡੀਅਨ ਪ੍ਰਾਈਵੇਟ ਲਿਮਟਿਡ ਸਿਰਫ ਏਜੇਐਲ ਦੀ ਪ੍ਰਾਪਤੀ ਲਈ ਬਣਾਈ ਗਈ ਸੀ।
ਐਸਵੀ ਰਾਜੂ ਨੇ ਦੱਸਿਆ ਕਿ ਏਜੇਐਲ ਦੇ ਡਾਇਰੈਕਟਰ ਨੇ ਆਲ ਇੰਡੀਆ ਕਾਂਗਰਸ ਕਮੇਟੀ ਨੂੰ ਇੱਕ ਪੱਤਰ ਲਿਖਿਆ ਸੀ, ਜਿਸ ‘ਚ ਕਿਹਾ ਗਿਆ ਸੀ ਕਿ ‘ਉਹ ਕਰਜ਼ਾ ਵਾਪਸ ਨਹੀਂ ਕਰ ਸਕਦੇ ਕਿਉਂਕਿ ਅਖਬਾਰ ਦਾ ਪ੍ਰਕਾਸ਼ਨ ਬੰਦ ਹੋ ਗਿਆ ਹੈ ਅਤੇ ਉਨ੍ਹਾਂ ਕੋਲ ਆਮਦਨ ਦਾ ਕੋਈ ਨਿਯਮਤ ਸਰੋਤ ਨਹੀਂ ਹੈ।’ ਐਸਵੀ ਰਾਜੂ ਨੇ ਕਿਹਾ ਕਿ ਸੋਨੀਆ ਗਾਂਧੀ, ਰਾਹੁਲ ਗਾਂਧੀ, ਸੁਮਨ ਦੂਬੇ ਅਤੇ ਸੈਮ ਪਿਤਰੋਦਾ ਯੰਗ ਇੰਡੀਅਨ ‘ਚ ਪ੍ਰਬੰਧਕੀ ਅਹੁਦਿਆਂ ‘ਤੇ ਸਨ।
ਰਾਜੂ ਦਾ ਕਹਿਣਾ ਹੈ ਕਿ ‘ਕੰਪਨੀ ਏਜੇਐਲ ਕੋਲ ਲਗਭਗ 2000 ਕਰੋੜ ਰੁਪਏ ਦੀ ਜਾਇਦਾਦ ਹੈ, ਜੋ ਕਿ 90 ਕਰੋੜ ਰੁਪਏ ਦੇ ਕਰਜ਼ੇ ਦੇ ਬਦਲੇ ਹਾਸਲ ਕੀਤੀ ਗਈ ਸੀ। ਇਹ ਇੱਕ ਧੋਖਾਧੜੀ ਹੈ ਜਿਸ ‘ਚ ਕੋਈ ਅਸਲ ਲੈਣ-ਦੇਣ ਨਹੀਂ ਹੋਇਆ। ਏਜੇਐਲ ਨੂੰ ਕਾਂਗਰਸ ਨੇ ਨਹੀਂ ਸਗੋਂ ਯੰਗ ਇੰਡੀਅਨ ਨੇ ਹਾਸਲ ਕੀਤਾ ਸੀ। ਇਹ ਇੱਕ ਸਾਜ਼ਿਸ਼ ਦੇ ਹਿੱਸੇ ਵਜੋਂ ਕੀਤਾ ਗਿਆ ਸੀ।’
ਕੀ ਹੈ ਪੂਰਾ ਮਾਮਲਾ ? (What is National Herald case ?)
ਨੈਸ਼ਨਲ ਹੈਰਾਲਡ ਦੀ ਸਥਾਪਨਾ ਸਾਬਕਾ ਪ੍ਰਧਾਨ ਮੰਤਰੀ ਪੰਡਿਤ ਜਵਾਹਰ ਲਾਲ ਨਹਿਰੂ ਨੇ 1938 ‘ਚ ਕੀਤੀ ਸੀ। ਇਸਨੂੰ ਇੱਕ ਕਾਂਗਰਸ ਅਖਬਾਰ ਮੰਨਿਆ ਜਾਂਦਾ ਸੀ। 2008 ‘ਚ ਇਨ੍ਹਾਂ ਨੇ ਕਰਜ਼ੇ ਕਾਰਨ ਕੰਮ ਕਰਨਾ ਬੰਦ ਕਰ ਦਿੱਤਾ। 2012 ‘ਚ ਭਾਜਪਾ ਆਗੂ ਸੁਬਰਾਮਨੀਅਮ ਸਵਾਮੀ ਨੇ ਇੱਕ ਸ਼ਿਕਾਇਤ ਦਰਜ ਕਰਵਾਈ, ਜਿਸ ‘ਚ ਦੋਸ਼ ਲਗਾਇਆ ਗਿਆ ਕਿ ਕਾਂਗਰਸ ਲੀਡਰਸ਼ਿਪ ਨੇ ਯੰਗ ਇੰਡੀਅਨ ਲਿਮਟਿਡ ਕੰਪਨੀ ਰਾਹੀਂ ਏਜੇਐਲ ਦੀਆਂ ਜਾਇਦਾਦਾਂ ਨੂੰ ਧੋਖਾਧੜੀ ਨਾਲ ਹਾਸਲ ਕੀਤਾ ਹੈ। ਇਸ ਤੋਂ ਬਾਅਦ ਈਡੀ ਨੇ ਇਸਦੀ ਜਾਂਚ ਸ਼ੁਰੂ ਕਰ ਦਿੱਤੀ।
Read More: National Herald Case: ਨੈਸ਼ਨਲ ਹੈਰਾਲਡ ਮਨੀ ਲਾਂਡਰਿੰਗ ਮਾਮਲੇ ‘ਚ ਸੋਨੀਆ ਗਾਂਧੀ ਤੇ ਰਾਹੁਲ ਗਾਂਧੀ ਨੂੰ ਨੋਟਿਸ ਜਾਰੀ
